Qumar oıynnyń túbi – qurdym. Memlekettiń aqshasyn talan-tarajǵa salǵan adamnyń sońǵy aıaldamasy temirtor ekeni daýsyz. Taldyqorǵanda jaǵa ustatar jaǵdaı boldy. Oblystyq balalar aýrýhanasynyń esepshisi memlekettiń 116 mln teńgesin býkmekerlik báske salyp jibergen.
Jetisý oblystyq ekonomıkalyq tergeý departamentiniń ókilderi ustalǵan esepshiniń bıýdjet qarajatyn bir jyldan asa ýaqyt kóleminde qumar oıynǵa jumsap kelgenin málimdedi. «Ol aqshany óziniń banktik kartasyna aýdaryp, ári qaraı býkmekerlik jeke kabınetindegi shotyna salyp otyrǵan», deıdi departament ókilderi. Qazir kúdikti kinásin tolyqtaı moıyndaǵan.
Aıta keteıik, osydan úsh aı buryn Taldyqorǵandaǵy oblystyq balalar aýrýhanasynyń medısına qyzmetkerlerine birneshe aıdan beri zeınetaqy, áleýmettik jáne medısınalyq tólemderdiń tólenbeı jatqany habarlanǵan bolatyn.
Aq halattylar mindetti tólemderiniń tólenbegenin nesıe rásimdeýge, endi biri aýrýhanaǵa emdelýge barǵanda kezdeısoq bilgen. Qazir densaýlyq saqtaý basqarmasynyń basshylyǵy medısına qyzmetkerlerine tolyq tólem jasaǵanyn jetkizdi. Al esepshiniń isi qazir sotta qaralýda.
«Jalpy aýdarǵan somasy bir jyldan asa ýaqyt kóleminde 116 mln teńge kóleminde. Is boıynsha onyń jasaǵan áreketi aýyr qylmysqa jatady. 7-12 jyl aralyǵynda bas bostandyǵynan aıyrý jazasy kózdelgen», dedi Jetisý oblystyq ekonomıkalyq tergeý departamentiniń asa mańyzdy ister jónindegi tergeýshisi Aslan Bıdasov.
Jetisý oblysy