Keıingi kezderi shaharlardyń tas qabyrǵalaryna til bitirgen beıneleý óneriniń bir bıigi – mural sánge aınaldy. Odan Qaraǵandy da qalys qalǵan joq. Búginde munda uzyn sany on bir mural bar.
Kópqabatty úılerdiń tutas bir qabyrǵasyn alǵan, shahardyń surqaı kelbetine túrli-tústi boıaý qosqan týyndylardy qaraǵandylyqtar jyly qabyldaǵany belgili. Alǵashqy mural 2020 jyly salynsa, sodan beri kenshiler astanasynyń ár bóligindegi ásem óner kópshiliktiń kózaıymyna aınaldy.
Jarqyn jobanyń bastamashysy Ýrbanıstıka ortalyǵy edi. Surǵylt qalanyń shyraıyn kirgizgisi kelgen jastar búginde sol muraldar týraly aýdıogıd jasap shyǵardy. Onda árbir mural jóninde aýdıotanystyrylym jazylǵan. Sol arqyly ár muraldyń beınelený barysy, onyń kúrdeliligi jáne estetıkalyq máni týraly aqparat beriledi. Sondaı-aq aýdıogıdtiń kartasynda mural ornalasqan mekendi de kóre alasyz. Eger mural unap jatsa nemese ózge de oı-pikir qaldyrǵyńyz kelse, marhabat. Jobany jasaýshylar oǵan da múmkindik beredi.
«Aýdıonusqaýlyq tegin. Ony izi.travel/ru saıtynan nemese PlayMarket jáne AppStore arqyly IZI.travel qosymshasyn júktep alý arqyly tyńdaýǵa bolady», deıdi joba avtorlary.
QARAǴANDY