Meńdiqarada da úshem dúnıege keldi

Meńdiqara aýdanyna qarasty Harkov aýylyn­da Nıkolaı, Evgenıı jáne Vıoletta esimdi úshem dú­nıege keldi. Jergilikti tur­ǵyndar mundaı qýa­nyshty oqıǵanyń aýdan tarıhynda osydan 45 jyl buryn ǵana bolǵanyn aıtyp otyr.

Úshemdi dúnıege ákelgen Alena Petrova osymen 7 ba­lanyń anasy atandy. Buǵan deıin shıetteı ba­la-shaǵasymen eki ból­meli tar úıde turyp kelgen Petrovtar otbasyna jer­gi­likti «Qarqyn» agro­fır­masynyń basshysy Erkin Buqanov aýyldan eń­sesi bıik, keń baspa­na tartý etip, úshemniń ana­sy aı saıyn alyp tura­tyn 100 myń teńge kólemin­degi qarjylaı kómek taǵaıyndady.

Alenanyń tolǵaǵy qań­tardyń segizi kúni ýaqtyly merziminen 4 apta erte bastalǵan. Shydatpaı bara jatqan soń, esi shyqqan joldasy áıelin kórshisiniń kóligimen dereý aýdandyq aýrýhanaǵa jetkizedi.

– Beıtanys er adam aýrý­hanaǵa kirgen boıda: «Qysylyp jatyr. Kómek­tesińder!» dep aıqaı saldy. Bárimiz ańtarylyp qaldyq. Máseleniń mánisin túsinisimen, jedel jumysqa kiristik. Tańǵy saǵat 6-da eki ul jáne bir qyz bala dúnıe esigin ashty, – deıdi Meńdiqara aýdandyq aýrýhanasynyń bas dárigeri Rýdava Jakına.

Qursaqta 40 aptanyń aıaqtalýyn kútip jatpaı-aq, mynaý jaryq dúnıeni kórýge asyqqan sábılerdi dárigerler birden shala týǵandardy shıratatyn arnaıy shynybet kıývezge jatqyzyp, bir táýlik boıy baqylaıdy.

Jaǵdaılary turaqty qa­lypqa túsken sábıler bir táýlikten soń, san­avıasııa arqyly Qostanaı qalasyndaǵy oblystyq aýrýhananyń perınataldyq ortalyǵyna jetkiziledi. Eki ul birden jalpy palataǵa ornalasqanymen, qyz bala eki kún boıy jansaqtaý bóliminde jatqan.

– Men Meńdiqarada dárigerlerdiń baqylaýynda jattym. Al balalarymdy Qostanaıǵa alyp ketti degendi estigende, biraz aı­qaıǵa basyp jurtty ábi­gerge saldym. Áıteýir med­bıkeler sabyrǵa shaqyryp, osylaı bolý kerek ekenin túsindirip baqty. Balalarymdy qolyma alyp, omyraýyma qysqan soń ǵana janym tynysh tap­ty. Dárigerler men akýsher­lerge, medbıkelerge myń da bir raqmet, – deıdi úshemniń anasy Alena.

Perınataldyq ortalyq­taǵy balalar bóliminiń meń­gerýshisi Igor Boıkonyń aıtýynsha, úshemder qazir qajetti terapııa alyp jatyr. Jaǵdaılary jaqsy, tipti, aqyryndap salmaq ta qosa bastaǵan.

– Náresteler, ásirese qyz bala áli de bolsa biraz shıraı túsýi kerek. Qazir jaǵdaılary qalyp­ty. Biraq náresteler sha­la týǵandyqtan biraz ýaqyt baqylaýda ustap, em júr­gizip, dárigerlik kútim jasaıtyn bolamyz. Úshemniń anasynyń densaýlyǵy da aqyryndap jaqsaryp keledi, – deıdi nárestelerdi emdep jatqan dáriger Áset О́tegenov.

Qostanaı oblysy