Altaı aımaǵynyń adamdary

Shyǵys Qazaqstan jurtshylyǵynyń gýmanıtarlyq kómegi úshin alǵys aıtty Taıaýda Reseı Federasııasynyń Altaı aımaǵynda alapat tasqyn bolyp, adam shyǵyny da oryn alǵan bolatyn. Shekaralas óńirge shyǵysqazaqstandyqtar jedel gýmanıtarlyq kómek kórsetken edi. Bul týraly («Kómek kerýeni», «EQ», №110, 6 maýsym, 2014 jyl) jýyrda jazǵanbyz. «Kórshi aqysy – táńir aqysy» dep halqymyz  beker aıtpaıdy. Shyǵys óńiriniń kórshilik izgi nıetine barnaýldyqtar sheksiz rızashylyǵyn bildirip otyr. «Jaqyn kórshimiz – Qa­zaq­stan Respýblıkasynyń Shyǵys Qazaqstan oblysy alǵash­qy­lardyń biri bolyp sý tas­qy­nynan zardap shekkenderge kómek kórsetti. Úsh kúnniń ishinde ǵana gýmanıtarlyq júk jınalyp, 5 maýsym kúni Altaı aımaǵynyń ortalyǵyna kelip jetti. Kómekti barshasy kórsetip jatyr. Degenmen, shekaralas Shyǵys Qazaqstan oblysynyń Borodýlıha, Shemonaıha, Zyrıan, Besqaraǵaı aýdandary eń úlken úlesterin qosty». Reseılik «Altaıskaıa pravda» gazeti 6 maý­sym kúngi sanynda «13 tonnadan astam un men jastyq tıegen júk mashınasy: Qazaqstan Respýblıkasynan Altaı aımaǵyna 4 konteıner gýmanıtarlyq kómek keldi» degen taqyryppen jarııalaǵan maqalasynda osylaı dep jazdy. Shyǵysqazaqstandyqtar ke­rýenin  bastap barǵan Vası­lıı Ahaevtyń aıtýynsha, gýma­nı­tarlyq járdemniń ishinde eresekter men balalarǵa arnalǵan kıimder, 100-den astam tósek-oryn jabdyqtary, rezeńke etik, azyq-túlik, ósimdik maıy, 5 tonna makaron, 13 tonnadan asa un bar. 7 mln. teńgeden astam turatyn júktiń jalpy salmaǵy 50 tonnaǵa jýyq. «Altaı – bizdiń ortaq úıimiz» halyqaralyq úılestirý keńesiniń hatshysy Borıs Ların Shyǵys Qazaqstan oblysymen qarym-qatynas qarapaıym áriptestik sheńberinen shyǵyp, izgi iske ulasqanyn jetkizdi. – Bizdiń baılanysymyz jyly kórshilik qatynasqa jalǵasty. Qazaqstannyń kórsetken kómegi biz úshin óte qajet jáne mańyzdy, – dedi B.Ların. Árıne, Shyǵys Qazaqstan óńiri Reseıdiń Altaı aımaǵyna alǵash ret kómektesip turǵan joq. Nıkolaevka eldi mekeninde bolǵan órt kezinde zardap shegýshilerge járdem berip, Nıkolaevka mektebine tutas kompıýter synybyn syılaǵan bolatyn. Ony barnaýldyqtar umyta qoıǵan joq. Qazirgi kezde shyǵysqazaq­standyqtar joldaǵan gýmanı­tarlyq kómekti tótenshe jaǵdaı qyzmetkerleri zardap shekken turǵyndarǵa taratýda. Dýman ANASh, «Egemen Qazaqstan». Shyǵys Qazaqstan oblysy.