«Astana Qazaqstan Team» velokomandasy qysqy transferlik kezeńinde quramyn taǵy bir legıoner veloshabandozben tolyqtyrdy.
27 jastaǵy Nıderland ókili Keıs Bol aldaǵy bir maýsym «Astana» sapynda jarystarǵa qatysatyn boldy. Ol buǵan deıin óz elinde irgetasy qalanǵan Team DSM komandasynyń namysyn qorǵap, sprınterler básekesinde jáne jekeleı kezeńderde birtalaı eleýli tabysqa qol jetkizgen. Atap aıtar bolsaq, keıingi tórt jyldyń ishinde Keıs bir kúndik «Nokere Kors», «Kalıfornııa týry» jáne «Norvegııa týrynda» top jarǵan bolsa, 2020 jyly «Volta Algarve», 2021 jylǵy «Parıj-Nıssa» jáne 2022 jylǵy «Brıtanııa týry» kezeńderinde márege birinshi jetken.
Osynyń aldynda London Olımpıadasynyń chempıony Aleksandr Vınokýrov jetekshilik etetin «Astana» velokomandasy Ulybrıtanııanyń dańqty veloshabandozy, álemdegi eń úzdik sprınterlerdiń biri Mark Kavendıshpen de bir jyldyq kelisimshart jasasqan bolatyn.