Melbýrnde ótip jatqan Aýstralııanyń ashyq birinshiliginiń jekelegen saıysynda Qazaqstannyń bir ǵana tennısshisi qaldy. Ol – elimizdiń birinshi raketkasy Elena Rybakına.
Aleksandr Býblık birinshi jáne Iýlııa Pýtınseva ekinshi aınalymnan asa almaǵannan keıin jasyl qurlyqtaǵy jalǵyz úmitimiz Elena Rybakına edi. Bastapqy básekelerinde ıtalııalyq Elızabetta Kochcharetto men slovenııalyq Kaıa Iývandy shań qaptyryp ketken ol úshinshi kezeńde WTA tiziminde 11-orynda turǵan amerıkalyq Danıel Kollınzben kúsh synasty. Bul tartys 6:2, 5:7, 6:2 esebimen jerlesimizdiń paıdasyna sheshildi. Tórtinshi kezeńde áıgili Iga Shventekpen sheberlik baıqasty. Álemdik reıtıngte kósh bastap turǵan 21 jastaǵy polıak qyzy 2020 jáne 2022 jyldary Rolan Garrosta top jarǵan. Byltyr US Open dodasynda bas júldeni oljalap, Aýstralııanyń ashyq birinshiliginiń jartylaı fınalyna deıin jetti. Odan bólek, WTA-nyń 11 týrnırin utty. Mine, osyndaı myqty oıynshymen esh qaımyqpaı aıqasqan Elena bir jarym saǵatqa sozylǵan saıysta 6:4, 6:4 esebimen jeńiske jetti. Endi Rybakına shırek fınalda latvııalyq Elena Ostapenkomen sheberlik baıqasady.