Jastarymyz jarap tur

Senbi kúni shańǵymen tuǵyrdan sekirýshilerdiń komandalyq saıysynda jerlesterimiz kúmis medal ıelendi. Qazaqstan quramasynyń sapynda Danıl Vasılev pen Sergeı Tkachenko óner kórsetti. Olar 470,3 upaı jınady. Bul tartysta bas júldeni Aýstrııa jeńip alsa, qola medal Japonııaǵa buıyrdy. Dál sol básekede Svıatoslav Nazarenko men Nıkıta Devıatkın juby jetinshi orynǵa taban tiredi.

Short-trekten ótken jarysta taǵy júl­de alýymyzǵa tamasha múmkindik boldy. Áıelderdiń 500 metrlik saıysynda Iаna Han jeńis tuǵyryna bir qadam jetpeı qa­lyp, tórtinshi oryndy qanaǵat tutty. Bul tartys Ońtústik Koreıanyń ókili Chhve Mın Djonnyń aıqyn jeńisimen aıaqtaldy. Onyń otandasy Pak Djı Iýn qolaǵa qol sozsa, qytaılyq Ichao Van kúmispen kúpteldi.

Kóp keshikpeı muhıttyń arǵy ja­ǵalaýynan taǵy bir qýanyshty habar jetti. Quramynda Iаna Han, Málik Ermek, Alına Ájǵalıeva, Álisher Abýl­qatymov, Ádil Ǵalıahmetov jáne Erkebulan Sha­muhanov syndy short-trekshileri bar Qazaqstan komandasy aralas estafetanyń jubanysh fınalynda birinshi oryndy ıelendi. Olardyń kórsetkishi – 2:47.757. Biraq basty fınalda óner kór­setken Ońtústik Koreıa, AQSh jáne Qytaı sportshylarynyń barlyǵy da erejeni óreskel buzǵany úshin jarystan shettetildi. Nátıjesinde, bas júldeni Fransııa quramasy oljalasa, otandastarymyz kúmis medal enshiledi. Al qola júlde japondarǵa buıyrdy.

Jeksenbide bıatlonshylardyń 15 shaqyrymdyq mass-startynda Aleksandr Mýhın kúmis medal ıelendi. Ol fran­­sııalyq Aksel Garneden ǵana qalyp qoıdy. Qola medaldi norvegııalyq Erıan Moseng enshiledi. Dál osy básekede Qazaq­­stannyń ózge sportshylary myndaı satylarǵa jaı­ǵasty: Kırıll Baýer – 4, Vadım Kýrales – 7 jáne Bekentaı Turlybekov – 19.

Esterińizge sala keteıik, buǵan deıin bıatlonshy Vadım Kýrales pen Bekentaı Turlybekov jáne shańǵymen tuǵyrdan sekirýshi Danıl Vasılev aldaryna jan salmaı, altyn tuǵyrǵa kóterilgen edi. Bıatlondy serik etken elimizdiń taǵy bir daryndy sportshysy Aleksandr Mýhın men quramynda Aısha Raqysheva, Nadejda Stepashkına jáne Ksenııa Shalygına syndy shańǵyshylary bar elimizdiń áıelder quramasy estafetada qola medaldi mo­ıyn­darynda jarqyratty.

Qazaqstannyń shaıbaly hokkeıshileri Ońtústik Koreıa (5:1), Majarstan (9:1), Ulybrıtanııa (15:1) jáne Slovakııanyń (4:1) tas-talqanyn shyǵarǵanyn biz buǵan deıin de habarlaǵanbyz. Toptyq týr­nırdiń sońǵy oıynynda AQSh-qa (1:4) ese jiberdik. Soǵan qaramastan jer­les­­­terimiz pleı-offqa shyqty. Jar­ty­laı fınalda Kanadamen kúsh synasty. Bul básekede Úıeńki japyraqtar eli ókil­deriniń mysy basym boldy. Olar bizdiń qaqpamyzdy tórt márte dál kózdedi. Ǵalym Mámbetálıevtiń shákirtteri bir ǵana golmen jaýap berdi. Esep – 1:4. Endi otandas­tarymyz Japonııamen qola medal úshin talasady. Al bas júlde úshin tartys AQSh pen Kanada qurmalary arasynda ótedi.