AQSh-tyń Leık-Plesıd qalasynda uıymdastyrylǵan HHH qysqy Dúnıejúzilik ýnıversıada óz máresine jetti. Jer-jahannyń eń úzdik stýdent-sportshylary bas qosqan jarysta Qazaqstan quramasy sátti óner kórsetip, 11 medal jeńip aldy. Osy nátıjemen jerlesterimiz jalpykomandalyq esepte 11-orynda tur.
Muhıttyń arǵy betindegi stýdentter dodasynyń sońǵy kúninde Qazaqstan quramasynyń qorjynyna taǵy eki medal tústi. Shaıbaly hokkeıden Qazaqstan quramasy qysqy Ýnıversıadanyń qola júldegeri atandy. Jarystyń irikteý kezeńinde barlyq qarsylasyn bet qaratpaı jeńgen jerlesterimiz jartylaı fınalda Kanada quramasyna jol bergenimen, úshinshi oryn úshin ótken matchta Japonııa hokkeıshilerin iri eseppen tize búktirdi – 8:1.
Kezdesýdiń esebin jetinshi mınýtta Maksım Muhametov ashty. Keıin ol 25 jáne 48-mınýttarda da mergendigimen kózge túsip, het-trıktiń avtory atandy. Ekinshi kezeńde Saıan Danııar (23-mınýt), Álıhan О́mirbekov (26), Batyrlan Muratov (39) dáldik tanytsa, sońǵy, sheshýshi 20 mınýtta Álı Qasenov (43) pen Danıl Býtenko (50) qarsylastarynyń qaqpashysyn qapy qaldyrdy. Al Japonııa quramasynyń jalǵyz shaıbasyn Iýto Gondaıra (40-mınýt) saldy. Osylaısha, shaıbaly hokkeıden Qazaqstan quramasy óz tarıhynda ekinshi ret qysqy Ýnıversıadanyń qola júldegeri atandy. Buǵan deıin jerlesterimiz 2007 jyly Italııanyń Týrın qalasynda ótken stýdentter dodasynda Fınlıandııa hokkeıshilerin 5:2 esebimen jeńip, qola júldeni moınyna ilgen bolatyn.
Fınalda AQSh quramasyn 7:2 esebimen tize búktirgen Kanada hokkeıshileri Ýnıversıada jeńimpazy atansa, jarys qojaıyndary kúmis júlde ıelendi.
Shańǵyshylar básekesinde synǵa túsken Ksenııa Shalygına da jarystyń sońǵy kúninde el qorjynyn taǵy bir qolamen tolyqtyrdy. 15 shaqyrymǵa jalǵasqan jarysta jerlesimiz máre syzyǵyn úshinshi bolyp qıdy. Onyń ýaqyt kórsetkishi – 39 mınýt 50.1 sekýnd. Bul tartysta Estonııa quramasynyń ókili Marıel Merlıı Tıanettiń baǵy jandy. Kúmis medal amerıkalyq Kendall Kramerdiń enshisinde ketti. Taǵy bir otandasymyz Nadejda Stepashkına 41:03.2 ýaqyt kórsetkishimen márege 6-shy jetti.
Sondaı-aq bir kún buryn short-trekten elimizdiń erler quramasy estafeta saıysynda qysqy Ýnıversıadanyń kúmis júldesine qol jetkizdi. Qazaqstandyq stýdentter 5 myń metr jarysta tek Koreıa quramasyna ese jiberdi. Qola júldeni Nıderland stýdentteri (7:12.450) qanaǵat tutty.
Ulttyq qurama namysyn Ádil Ǵalıahmetov, Erkebulan Shamuhanov, Valerıı Klımenko men Sanjar Janysov qorǵady. Munyń aldynda short-trekshiler aralas komandalyq estafetada da ekinshi orynnan kóringen bolatyn.
Aıta keteıik, bıylǵy stýdentter alamanynda Qazaqstan quramasynan bıatlonshylar Vadım Kýrales pen Bekentaı Turlybekov jáne shańǵymen tuǵyrdan sekirýshi Danıl Vasılev AQSh-ta Ánuranymyzdy shyrqatsa, bıatlonshy Aleksandr Mýhın men shańǵymen tuǵyrdan sekirýden komandalyq saıysta Danıl Vasılev pen Sergeı Tkachenko kúmispen kúpteldi. Aleksandr Mýhın (bıatlon), shańǵydan komandalyq jarysta Aısha Raqysheva, Nadejda Stepashkına jáne Ksenııa Shalygına qola júldeger atandy.
Qysqy Ýnıversıadanyń jalpykomandalyq esebinde Japonııa sportshylary top jardy. Jarystyń alǵashqy kúninen bastap, sońyna deıin medaldar kestesinde eshkimge des bermegen Kúnshyǵys eliniń ókilderi 21 altyn, 17 kúmis, 10 qola medal jeńip aldy. Ekinshi orynǵa Koreıa sportshylary jaıǵasty. Olardyń enshisinde 12 altyn, 8 kúmis, 9 qola medal bar. Úzdik úshtikti 6 altyn, 1 kúmis jáne alty qolamen Kanada quramasy túıindedi.
Al Qazaqstan 3 altyn, 4 kúmis, 4 qola medalmen jalpy esepte 11-orynǵa taban tiredi. Osydan tórt jyl buryn Reseıdiń Krasnoıarsk qalasynda ótken stýdentter dodasymen salystyrar bolsaq, jerlesterimizde ilgerileý baıqalady. Sol jylǵy Ýnıversıadaǵa 95 sportshymyz qatysyp, 4 kúmis, 3 qolamen 17-orynnan kóringen edi. Bıyl AQSh-qa 78 stýdent-sportshy attanǵan bolatyn.
Kelesi qysqy Ýnıversıada 2025 jyly Italııanyń Týrın qalasynda uıymdastyrylady dep josparlanǵan.