Aýyldyń tútini túzý ushyp, bosaǵasyna bereke úıirilý úshin birlik kerek. Eliniń bas kóterer er-azamattary jumyla qımyldaǵan jerde táp-táýir tirlik bar.
Atbasar qalasynan jıyrma shaqyrymdaı uzap shyqqan soń qaramy ájeptáýir ajarly aýyl kózge iligedi. Túp-túzý kóshelerinde kóldeneń jatqan bir buraý joq. Úıleri de kóztartarlyq. Qora-qopsylarynyń janynda úıilgen qoıanjon maıalar toqtyqty ańǵartyp turǵandaı. Bul – Novoselskoe aýyldyq okrýgi. Etek-jeńi keń pishilgen eldi mekende 334 shańyraq bar. Uzyn-yrǵasy 14 ulttyń ókili, 900-ge jýyq adam bir úıdiń balasyndaı «bir jeńnen qol, bir jaǵadan bas shyǵaryp», tatý-tátti tirshilik etedi. «Birlik bar jerde, tirlik bar» degendeı, bir jaqsysy, yrys-yntymaqqa úıirilip, jyl ótken saıyn áleýmettik-turmystyq jaǵdaıy kóp-kórim jaqsaryp keledi.
– Okrýgtiń ortalyq qonysy – Nıkolskoe aýyly, – deıdi okrýg ákimi Iýlııa Pol, – orta mektep, feldsherlik-akýsherlik pýnkt, Mádenıet úıi, sport kesheni, onnan asa saýda orny jumys isteıdi. Keıingi jyldary shalǵaıdaǵy aýyldarǵa kóp qamqorlyq jasalyp jatyr. Sol jaqsylyqtyń sharapatyn biz de kórip otyrmyz. Elge qaıyrymy tıip turǵan baǵdarlamanyń biri – «Aýyl – el besigi». Osy baǵdarlamanyń aıasynda feldsherlik-akýsherlik pýnktti kúrdeli jóndeýden ótkizip aldyq. Qazirgi kúni aýyldaǵy medısınalyq mekemelerge jetkilikti kóńil bólinip otyr. Bizdiń okrýgtiń turǵyndary da basy aýyryp, baltyry syzdaı qalsa, alǵashqy medısınalyq kómekti tolyq ala alady.
Shynynda da, bul – sharapaty mol sharýa. О́ńirdegi kóptegen eldi mekende medısınalyq qyzmettiń bolmaýy nemese álsizdigi turǵyndardyń kir jýyp, kindik kesken atamekenderinen kóshýine sebepshi bolyp otyrǵanyn jasyrýǵa bolmas. Aýyldyń ajaryn keltirip, jan jadyratar jylylyq uıalatýǵa sebepshi bolyp otyrǵan jergilikti seriktestik basshylary ekenin de biraýyz sózben aıta ketsek, ózgelerge ónege bolar edi. Okrýg ákiminiń aıtýyna qaraǵanda, Pavel Shakola men Iýrıı Skýbak tárizdi seriktestik basshylary el jumysyna aralasyp, qamqorlyq qolyn sozýda. Mine, qaqaǵan qysta shalǵaıdaǵy shaǵyn aýyldar qar kóp túskendikten jol jabylyp qala ma dep alańdap otyrsa, bul jerde mundaı másele týyndamaıdy. Seriktestik basshylary jol boıyn ýaqtyly aınadaı etip tazalap, okrýgte turatyn turǵyndardyń shamasy kelmeı jatqan sharýalaryn eki aıtqyzbaı tyndyryp beredi.
Aýyl turǵyndarynyń áleýmettik-turmystyq jaǵdaıyn jaqsartýmen qatar, jas mamandardyń da ornyǵýyna qolushyn berip jatyr. Byltyr jas mamandarǵa arnaıy tórt úı salyp beripti.
– Maǵan da jaıly páter berildi, – deıdi Gúljanat Ermekqyzy, – osyndaı qamqorlyq kórsetilip jatqan jerde janyńdy salyp jumys isteýge ábden bolady. Bar jaqsylyq, ıgi ister bir arnada toǵysyp, týǵan elimizdiń tuǵyryn bıiktetýge baǵyttalyp jatqany jaqsy emes pe?! Negizinde, aýylǵa kelgen jas maman alamyn dep emes, qyzmetimdi sińirip, eńbek etemin dep kelýi kerek. Al jergilikti seriktestikter tarapynan osyndaı qamqorlyq kórsetilip jatsa, ortaq maqsattaǵy ońdy is sútteı uıyp, berekesi arta túser edi.
Aýyl turǵyny Iýrıı Skýbaktyń aıtýyna qaraǵanda, osy topyraqta týyp-ósken el azamattarynyń birligi myqty bolǵandyqtan, eshqandaı kóshý baıqalmaıdy. Qaıta kerisinshe, ishinara jastar aýylǵa oralyp jatyr. Bul da – jaqsylyqtyń belgisi. Turǵyndardyń pikirine qulaq túrseńiz, seriktestik basshysy Pavel Shakolanyń qarapaıymdylyǵyn, ótinish aıtyp barǵan kisiniń tilegin eki etpeıtinin estýge bolady. El maqtaǵan jigittiń eńsesi bıik.
– Týǵan jerge baılanǵan tamyr eshqashan úzilmeıdi, – deıdi Pavel Shakolanyń ózi, – biz osy jerdiń ıgiligin kórip otyrǵannan keıin qolymyzda barymyzben bólisip, eń aldymen aýyldyń jaǵdaıyn oılaýymyz kerek. Aıtalyq, el kóship ketse, seriktestiktiń jumysyn kim ister edi? Tabys bolsa, ıgilik úıirilse, ol jumysqa jumylǵan jalpy jurttyń birligi. Eldi mekende aýyzsý tarapynda esh másele joq. Kósheler tolyq jaryqtandyryldy, joldy jóndep turamyz. Aýyl mádenıetin órkendetip, turǵyndardyń buqaralyq sportpen aınalysýyna jyl saıyn mol qarjy bólemiz. Osyndaı yqylastyń ıgiligin de kórip otyrmyz.
Aıtsa aıtqandaı, aýyl tirligi alǵa basyp keledi. Sonyń barlyǵy derlik berik birliktiń arqasy. Sol birlikti bekemdep otyrǵan azamattardyń ónimdi eńbegi ózgege ónege bolsa, qanekı?!
Aqmola oblysy,
Atbasar aýdany