Elimizde jastar ındeksi ázirlenip jatyr. Bul týraly Ortalyq kommýnıkasııalar qyzmeti alańynda Aqparat jáne qoǵamdyq damý vıse-mınıstri Danııar Qadyrov habarlady. Jıyntyq jastardyń bilimi, jeke qabileti, qoǵamdyq-saıası kózqarasy, turmystyq jaǵdaıyna taldaý júrgizedi. Nátıjesinde, jastar saıasatyn ulttyq jáne óńirlik deńgeıde baǵalaýǵa múmkindik týady.
Búginde vedomstvo «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasy negizinde zańǵa táýeldi aktiler ázirlep jatyr. Qujat aıasynda Jastar resýrstyq ortalyqtary qyzmetkerleriniń mártebesin ulǵaıtý múmkindigi paıda bolady. Sonymen qatar eńbek jasaqtaryn qurý, uıymdastyrý, qamtamasyz etý jáne olardyń qyzmetine monıtorıng júrgizý kózdelgen.
– 2021 jyly 15 qańtarda Parlament palatalarynyń birlesken otyrysynda Memleket basshysy jastarǵa baılanysty usynystardy naqtylady. Zań jobasyn jan-jaqty talqylaý maqsatynda kóptegen basqosý uıymdastyryldy. Oǵan halyqaralyq mamandar men sarapshylar jumyldyryldy. Jalpy, qujat memlekettik jastar saıasaty salasyn jetildirýge, qoǵamdyq qatynastardy keshendi retteýdiń tıimdi quqyqtyq negizin qalyptastyrýǵa, jumyspen qamtýdy qamtamasyz etýge, jastardyń damýy úshin qolaıly jaǵdaı jasaýǵa baǵyttalǵan. Zańda jastardyń damý ındeksi; jastardyń áleýmettik qyzmetteri; jastarmen jumys jónindegi maman; jastardyń eńbek jasaqtary uǵymdaryn zańnamalyq bekitý usynyldy, – dedi Danııar Qadyrov.
Zańnyń bir tarmaǵy retinde tanystyrylǵan jastar ındeksin qarapaıym tilmen túsindirsek, bul 14 pen 35 jas aralyǵyndaǵy azamattardyń qanshalyqty sportpen aınalysatyny, kásibı biliktiligin shyńdaý úshin trenıngterge qanshalyqty qatysatyny, qoǵamdyq belsendiligi boıynsha naqty málimetterge qol jetkizý tásilderin birizdendirýdiń taptyrmas quraly. Bir jaǵynan jıyntyq – memlekettik jastar saıasatyn iske asyrý boıynsha memlekettik organdar qyzmetiniń tıimdiligin arttyrýǵa jol ashady. Demek osy sanattaǵy qazaqstandyqtarǵa qaı óńirde qandaı qoldaý kórsetý kerek ekenin anyqtaıdy.
– Bizdiń ázirlep jatqanymyz – BUU-nyń jastardy damytýdyń jahandyq ındeksiniń otandyq nusqasy. Indeksti engizý elimizdiń halyqaralyq ustanymyna oń áser etedi, – dedi D.Qadyrov.
Buǵan qosa qujat sheńberinde jastar saıasatynyń negizgi baǵyttaryna qosymsha eki tetik engizilgen. Olar – sıfrlyq saýatty arttyrý jáne volonterlik qozǵalysty damytý.
Jıynda vıse-mınıstr salanyń áleýmettik jelilerdegi aqparattardy qadaǵalaý maqsatynda qandaı jumystar júrgiziletinin atap ótti. Eger áleýmettik jelide memlekettiń tutastyǵyna, Konstıtýsııaǵa qaıshy, ultaralyq jáne dinaralyq arazdyq týyndatatyn jazba bolsa jáne ol quqyq qorǵaý organdary tarapynan dáleldense, buǵattalatynyn jetkizdi.
– Mınıstrlik atalǵan máselelerdi zań sheńberinde qadaǵalap otyr. Qazir «Mass-medıa týraly» zań jobasy qoǵamnyń ashyq talqylaýynan ótip jatyr. Onyń ishinde áleýmettik jeliler jumysy da bar. Jańa zań jobasy 27 qańtarǵa deıin ashyq talqyda bolady. Sondyqtan usynystar bolsa, qaraýǵa ázirmiz, – dedi vıse-mınıstr.
«Jalpy zań jobasy jastardyń damýy úshin qolaıly jaǵdaılar jasaýǵa baǵyttalǵan. Osy rette jastar sanatyna kiretinder sany ulǵaıýyna baılanysty jeńildikpen jalǵa beriletin turǵyn úı baǵdarlamasyna da ózgerister engizý qarastyrylyp jatyr», deıdi Danııar Qadyrov. Aıta keteıik, elimizde buryn jastar sany 3,7 mıllıon bolsa, qazir mejeniń ózgerýine baılanysty 14-ten 35 jasqa deıingi azamattar 5,8 mıllıonǵa jetti.