Búgin Úkimette Abaı oblysyn áleýmettik-ekonomıkalyq damytýdyń keshendi jospary qaraldy, dep habarlaıdy Egemen.kz.
«Josparda 100-den astam is-shara qamtylǵan. Jospardyń jalpy bıýdjeti 1,9 trln teńgege jýyq. Olardyń basym bóligi – jeke ınvestısııalar. Týrızm salasyn damytý aıasynda Semeıde eki jańa saýda oıyn-saýyq ortalyǵy men qonaq úı keshenin, sondaı-aq Alakól jaǵalaýynda demalys bazasyn salý josparlanyp otyr. Jylý kózderin, elektr jáne sýmen jabdyqtaý jelilerin, káriz-tazartý qurylystaryn, kúre joldar men kópirlerdi rekonstrýksııalaý, Semeıde zamanaýı JEO salý boıynsha qadamdar kózdelgen», delingen Úkimet habarlamasynda.
Sonymen qatar, «Aıagóz-Baqty-Qytaı shekarasy» temirjol ýchaskesi, taý-ken baıytý kombınaty, «Aıdarly» mys ken ornyn ıgerý, et kombınaty, «qurǵaq» port jáne logıstıkalyq park sııaqty iri jobalar iske asyrylady.
Keshendi jospar óńirdegi ónerkásip kólemi men aýyl sharýashylyǵy ónimin 1,5 esege, negizgi kapıtalǵa salynatyn ınvestısııalardyń 3,5 esege ósýin qamtamasyz etedi. 14 myń jumys orny qurylady.
«Keshendi jospar jergilikti halyqtyń turmys sapasyn jaqsartýǵa múmkindik beredi», dep atap ótti Premer-mınıstr Álıhan Smaıylov.