Elimizdiń «jasyl» ekonomıkaǵa kóshý» tujyrymdamasyn iske asyrý aıasynda mınıstrlik jańartylatyn energııa kózderin damytýdyń nysanaly ındıkatorlary men olarǵa qol jetkizý joldaryn belgiledi. Máselen, 2020 jylǵa qaraı elimizde jańartylatyn energııa kózderinen óndirilgen qýat úlesi 3 paıyzdy quraıdy. Byltyr jańartylatyn energııa kózderin paıdalanýdy qoldaý týraly zańǵa túzetýler engizildi.
«Bul tirkelgen tarıfter shamasyn eseptep, sektordy qoldaý sharalaryn engizýge múmkindik berdi. Belgilengen sharalar Qazaqstanda jańartylatyn energııa kózderi rynogyn qalyptastyrýǵa jaǵdaı týǵyzady.
Mamyr aıynda Úkimet biz usynǵan tirkelgen tarıfter shamalaryn maquldady. Jel elektr stansalarynda óndiriletin qýattyń kılovatt saǵatyna 22,68 teńge tólense, kún elektr stansasy qýatynyń baǵasy – 1 kılovatt saǵatyna 34,61 teńge. Shaǵyn sý elektr stansalarynda óndirilgen qýattyń kılovat saǵatyna 16,71 teńge, bıogaz qondyrǵylarynyń qýatynyń kılovatt saǵaty 32,23 teńgege baǵalandy. Sonymen qatar, otandyq óndirýshini qoldaý maqsatynda elimizde óndirilgen kremnıı negizindegi fotoelektrlik modýlderdi paıdalanatyn kún elektr stansalarynyń tirkelgen tarıfi engizildi.
Osyndaı stansalarda óndirilgen qýattyń kılovatt saǵaty 70 teńge turady. Tirkelgen tarıfterdiń qoldanylý merzimi – 15 jyl. Olar Úkimet belgilegen tártippen, ınflıasııa deńgeıine qaraı, jyl saıyn ındeksteledi. Osy jaılardy Ortalyq kommýnıkasııalar qyzmetinde ótken kezekti brıfıngte Qorshaǵan orta jáne sý resýrstary mınıstri Nurlan Qapparov málimdedi. Sondaı-aq, ol tirkelgen tarıfter ınvestorlardyń qyzyǵýshylyǵyn arttyryp, jańartylatyn energııa kózderi naryǵyna tartý maqsatynda engizilip otyrǵanyn da atap kórsetti.
Basqosýda mınıstr orman jáne ańshylyq sharýashylyqtary sektoryn damytý, aǵymdaǵy atqarylatyn naqty ister, sonymen birge, janýarlar álemin qorǵaý máseleleri jaıyna da toqtaldy. Orman jáne ańshylyq sharýashylyqtary sektoryn damytý mindetteri qazir ázirlenip jatqan 2020 jylǵa deıingi ekonomıkanyń orman sektoryn damytý jónindegi baǵdarlamada belgilenbek.
Memlekettik orman sharýashylyǵy men tabıǵatty qorǵaý uıymdarynyń kúshimen kóktemgi maýsym barysynda 34 myń gektar jerge aǵash otyrǵyzylǵan. Sonymen qatar, el aýmaǵyndaǵy ormandardy saqtaý jáne kóbeıtý jobasy aıasyndaǵy jumystar jasalýda. Joba aıasynda Aral teńiziniń qurǵaǵan bóliginde fıtomelıorasııalyq sharalar júrgizilip, aýdany 10,6 myń gektar jerge sekseýil otyrǵyzylǵan.
«Semeı ormany» memlekettik tabıǵı rezervaty aýmaǵynda orman aǵashtarynyń kóshetteri ósiriletin keshenniń qurylysy aıaqtalyp keledi. Ony qarasha aıynda iske qosý josparlanǵan.
Mınıstrlik ekologııalyq is-sharalarǵa qalyń jurtshylyqty tartý úrdisin jalǵastyryp keledi. Kóktemde elimizde Jer kúni men Qorshaǵan ortany qorǵaý kúnine oraı orman otyrǵyzý aksııasy ótip, oǵan 226 myńnan astam adam qatysty. Elimizdiń qalalary men aýyldy aımaqtarynda 662 myń aǵash egilgen. Halyqty ekologııalyq aǵartý jáne erekshe qorǵalatyn tabıǵı aýmaqtar problemalaryna qoǵam nazaryn aýdarý maqsattarynda elimizdiń barlyq tabıǵat qorǵaý uıymdary 23 naýryz ben 5 maýsym aralyǵynda «saıabaqtar marshy-2014» aksııasyn ótkizdi. Kóktemde kıik mekendeıtin aýmaqtarda janýarlardy esepteý naýqany júrgizilip, nátıjesinde byltyrǵy kórsetkishtermen salystyrǵanda Qazaqstandy meken etken kıik sany 37 paıyzǵa artyp, 256 myń bastan asqany anyqtalǵan.
Ábdirahman QYDYRBEK,
«Egemen Qazaqstan».