Búgin «Qazmedıa» ortalyǵynda óńirlik merzimdi baspasóz basylymdary forýmy bastaldy, dep habarlaıdy Egemen.kz.
Aqparat jáne qoǵamdyq damý mınıstrliginiń uıymdastyrýymen ótip jatqan óńirlik BAQ forýmyn Aqparat komıtetiniń tóraǵasy Qanat Ysqaqov ashty.
«Forým barysynda medıa salasynda týyndaǵan birqatar máseleni qyzý talqylaý, oı-pikirlerdi ortaǵa salý josparlanyp otyr. Is-sharanyń basty maqsaty - zamanaýı medıa salasy boıynsha ońtaıly tásilder qarastyryp, bir-birimizben tájirıbe almasý, oǵan qosa merzimdi baspasóz salasyndaǵy ózekti máseleler boıynsha pikirtalas alańyn uıymdastyrý. Memleket basshysy Qasym-Jomart Toqaev Qazaqstan halqyna joldaǵan Joldaýynda búginde BAQ básekege qabiletti ári erkin bolýy kerek ekenin atap ótti. Bul qaǵıdat kez kelgen órkenıetti memleket úshin mańyzdy bolyp qala bermek», dedi moderator forýmnyń ashylý saltanatynda.
Qanat Ysqaqovtyń aıtýynsha, búginde merzimdi baspasóz salasynda básekege qabiletti bolý úshin aqparattyń sapasyna aıryqsha nazar aýdarý qajet.
Sondaı-aq ol Qazaqstandaǵy medıany odan ári damytý úshin mınıstrlik jyl saıyn ótkizip otyratyn «Tumar» men Astana Media Week is-sharalarynda óńirlik BAQ salasyna qatysty máseleler qozǵalatynyn atap ótti.