Astana qalasynyń ákimi Jeńis Qasymbek qalada múmkindigi shekteýli 27 myńnan astam adam ońaltý kómegin alyp jatqanyn málim etti. Bul týraly ol Instagram paraqshasynda jazdy, dep habarlaıdy Egemen.kz.
«Biz úshin erekshe qajettilikteri bar jandarǵa qolaıly jaǵdaı jasaý óte mańyzdy. Búgin osy sanattaǵy jandarǵa áleýmettik jáne ońaltý qyzmetterin kórsetetin túrli qoǵamdyq uıymdardyń ókilderimen kezdestim. Onda ınvataksı, protezdik-ortopedııalyq kómek, sanatorıı-kýrorttyq emdeý, ońaltý ortalyqtarynyń jelisin keńeıtý jáne t.b. máseleler kóterildi», dep jazdy ákim.
Onyń aıtýynsha, qazir qalada múmkindigi shekteýli 27 myńnan astam adam ońaltý kómegin alyp jatyr, onyń ishinde 7 myń bala bar.
«Elordada birqatar áleýmettik turǵyn úı salyp jatyrmyz, onda birinshi qabatta áleýmettik nysandar ashylady: balalar ortalyqtary, medısınalyq nysandar, onyń ishinde ońaltý ortalyqtary. Sol sııaqty bıyl ınvataksı sanyn 2 esege arttyrýdy josparlap otyrmyz, osylaısha erekshe qajettilikteri bar jandardy kóbirek qamtı alamyz. Kezdesý barysynda kóterilgen máselelerdi sheshý jumysy qolǵa alyndy, al júıeli máseleler boıynsha mınıstrliktermen jumys isteıtin bolamyz. Qoǵamdyq uıymdardyń ókilderimen turaqty túrde kezdesip, turǵyndarymyz úshin qolaıly jaǵdaı jasaý jolynda birlesip jumys isteımiz», dep jazdy elorda ákimi.