Qazirgi kezde barsha jurttyń nazary Melbýrnde ótip jatqan Aýstralııanyń ashyq birinshiligine aýǵanda, álemniń basqa da qıyrynda tennısten halyqaralyq týrnırlerdiń jalaýy jelbiredi.
Sońǵy ýaqytta óreli ónerimen kózge túsip, ATR reıtınginde 144-orynǵa deıin kóterilgen Tımofeı Skatov Chılıdiń Konsepson qalasynda uıymdastyrylǵan «Chellendjer» sanatyndaǵy dodaǵa qatysýda. Bıo-Bıo ózeniniń jaǵalaýynda jerlesimiz óziniń tusaýkeser kezdesýin álemniń 166-raketkasy, taıpeılik Výn-Lın-Výmen ótkizip, óte shıelenisti oıynda 7:5, 7:6 esebimen jeńiske jetti. Ekinshi kezeńde Skatov ATR tiziminde 230-orynda turǵan kolýmbııalyq Nıkolas Mehıımen kúsh synasady. Dál osy týrnırde Mıhaıl Kýkýshkın de óner kórsetýde. Ol keshe bolıvııalyq Ýgo Dellıenmen kezdesti.
Al Úndistannyń Pýna qalasynda ITF World Tennis Tour týrnıriniń tusaýy kesildi. Júlde qory 40 myń dollardy quraǵan jarysta Jibek Qulambaeva men Gozal Aınıtdınova baq synaýda. Eki arýymyz da alǵashqy aınalymnan súrinbeı ótti.