ASTANA. 14 maýsym. Keshe tań aldynda Brazılııa – Horvatııa quramalary arasynda aıaqtalǵan oıynmen birge álemniń merekelik XX chempıonaty óziniń bastalyp ketti. Brazılııanyń San-Paýlý qalasynda ótken maýsymashar matchty jahannyń mıllıardqa jýyq turǵyny kógildir ekran arqyly tamashalady. Osylaısha 31 kúnge ulasyp, 64 oıynnan quralatyn aıaqdop alamanynyń jarys jolyna túskeni de tarıhı shyndyqqa aınaldy. Bul týraly egemen.kz habarlady.
Al keshegi tún men búgingi tań aldynda dúnıelik dop dodasynyń kelesi kezdesýleri kelege keldi. Bul ýaqyt aralyǵynda Brazılııanyń úsh qalasynda Meksıka – Kamerýn, Ispanııa – Gollandııa jáne Chılı – Avstralııa juptary jasyl alańǵa shyqty. Toptyq týrnırdegi irikteý kezeńi úshin bulardyń qaı-qaısysy da asa mańyzdy bolyp tabylady.
Endi sóz basynda baıraqty básekeniń tusaýkeser turlaýy bolǵan Brazılııa men Horvatııa quramalary arasyndaǵy kezdesýge az-kem toqtalmaı óte almaımyz. Shyny kerek, ol mamandar úshin de, jankúıerler úshin de eshqandaı tańdanys pen sensasııa ákele qoımady. Sebebi, fýtboldan tıtteı habary bar jurttyń kem degende 90 paıyzy bul kúni «selesaonyń» basym túsetinine eshbir kúmán keltire alǵan joq. Al matchtyń basy brazılııalyq fýtbolshylar ǵana emes, sonymen qatar fanattar úshin de esten tandyrarlyq oqıǵadan órbidi. Kezdesýdi úlken úmitterge erkin arqa súıeı alatyndaı shabytty da shymyr shabýyldarmen aıaqtandyrǵan alań ıeleriniń kenet kútpegen jerden óz qaqpalaryna gol soǵyp alýlary biraz jurtty abyrjytyp tastady.
Biraq mundaı-mundaıǵa eńseleri túsip, júıkeleri júnjip ketip jatsa, olar brazılııalyqtar bola ma, sálden keıin-aq tez jınaqtalyp úlgergen «selesao» serkeleri qaıtadan burynǵy yrǵaqty arnalaryna túsip, qarsy qaqpadan «baqyt kiltin» izdestirýlerin jalǵastyrdy. Muny olar jıyrma mınýttyń ishinde qarymta golǵa aınaldyra bildi. Horvattardyń tirekti aımaqta tyǵyz oınaı almaýlary Neımardyń keń keńistik alyp, alǵa qaraı dembil-dembil umtylyp turýyna jol ashty. Brazılııalyqtar ekinshi taımdy tipti qaýyrt ótkizdi. Olar birinshi mınýttan bastap-aq qarsy komandany taptap kete jazdady. Al horvattar qoldarynan kelgenderinshe joıqyn joryqtardy qaıtaryp baǵyp, bir kezderi alań ústindegi oıyndy teńestirýge qol jetkizdi. Alaıda, taımnyń orta sheninde japon tóreshisi Iýıtı Nısımýra óziniń munda tekke júrmegenin anyq baıqatyp qoıdy. Bulaı deıtinimiz, onyń 71-mınýtta belgilegen penaltıiniń ádildigine kúmán kóp. Osynynyń áseri boldy ma, budan keıin horvattardyń oıyny biraz setinep sala bergendeı kórindi. Sol kezderi alań ıeleri esepti ósire túsýge múmkindik te alǵan. Alaıda, odan nátıje shyǵara almaǵasyn olar sońǵy on mınýtta esepti saqtap qalýǵa umtylyp, qarqyndy aıtarlyqtaı báseńsitip jiberdi. Mine, sol kezde «sharshyly» shandozdar oıyn tizginin qolǵa ustap, brazılııalyqtardy edáýir tyqsyryp tastady. Osy tustaǵy beıqamdyq pen tirek aımaqtyń osaldyǵy horvattardyń úshinshi goldy ótkizip qoıýlaryna sebep boldy. Bir mezet zymyrap qarsy shabýylǵa shyqqan Oskar aıyp alańynyń ishine jetpeı turyp-aq qaqpany nysanaǵa aldy. Onyń júgirip kele jatyp tepken sol doby baǵannyń bir buryshyna tıip baryp, tordyń aıasyna top ete tústi – 3:1. Osylaısha Brazılııa quramasy týrnırdegi birinshi jeńisti toılady.
Damır Qojamqul.