ASTANA. 14 maýsym. Chempıonattyń Kýıaba qalasynda Chılı quramasy Avstralııa komandasyn 3:1 etip tize búktirdi. Bul týraly egemen.kz habarlady.
Ázirge álem dop dodasynyń barlyq matchtary qyzyqty da este qalatyndaı bolyp ótip jatyr. Chılı men Avstralııa arasyndaǵy kezdesý de budan shet qalǵan joq. Buǵan qosa, osynyń aldyndaǵy matchtardyń bárinde oryn alǵan tóreshilerdiń júgensizdigi munda baıqala qoımady. Sondyqtan Kot-d`Ivýar elinen kelgen Nýmandez Dýe bastaǵan arbıtrlardyń osy ónegeli isteri keıingilerge juǵysty bolatyn shyǵar degen úmittemiz.
Al V tobyndaǵy eki komanda kezdesken bul oıynda sensasııa oryn almady. Áıtkenmen, «la roha» aral-kontınent jasaǵyn eshbir qıyndyqsyz utyp shyqty dep taǵy aıta almasaq kerek.
Kezdesýdiń basynda Horhe Sampaolıdiń shákirtteri qarsylastaryn taptap óte shyǵatyndaı bolyp kóringen. Olar osy basymdylyqtaryn eki mınýttyń ishinde eki golǵa aınaldyryp, birden alǵa ketken. Goldardy 12-mınýtta Aleksıs Sanches jáne 14-mınýtta Horhe Valdıvııa saldy. Ras, avstralııalyqtar birinshi taımda-aq munyń bir dobynyń qarymtasyn qaıtaryp úlgergen (Tım Kehıll, 35-mınýt). Biraq olardyń qarqyny sonymen bitti.
Al ekinshi taımda osy esep oıyn sońyna deıin ózgermegen kúıi turdy. Munyń áletinde Avstralııa fýtbolshylary shabýyldy údetti. Eger olardyń Tım Kehıll men Mark Breshıano sekildi forvardtarynyń sońǵy soqqylary durys shyqqanda, oıynnyń qalaı aıaqtalaryn kim bilsin! Degenmen, chılılikter osy esepti ustap qaldy. Buǵan qosa, qosymsha ekinshi mınýtta olar taǵy bir gol soǵyp (Jan Bosejýr) jeńistiń júgin jeńildete tústi.
Damır Qojamqul.
Derekkóz: Chempıonat.Rý.
Foto: Chempıonat.Rý.