QAZAQSTAN KEDEN ODAǴYNA QATYSTY KELISSО́ZDERDE О́Z MÚDDESIN BERIK QORǴAÝDA

Keshe Qazaqstan Respýblıkasynyń Premer-Mınıstri Kárim Másimov Keden odaǵyna qatysty máselelerdi talqylaý úshin Sankt-Peterbýrg qalasyna ushyp keldi.

Suńǵat ÁLIPBAI  – Sankt-Peterbýrgten.

Osy qalada osydan 4 kún buryn ǵana Táýelsiz Memleketter Dostastyǵyna, Eýrazııalyq eko­no­mıkalyq qoǵamdastyqqa  jáne osy qoǵamdastyq aıasynda qurylǵan Keden odaǵyna múshe elder úkimet basshylarynyń kezdesýi ótkendigin eske sala ketpekpiz. Sol kezdesýde Keden odaǵyna múshe elderdiń úki­met basshylary aıasynda odaqtyń sanıtarlyq, maldárigerlik sanı­tar­lyq, fıtosanıtarlyq shara­laryn qoldanýdy retteý, odaqtyń basty qujaty Keden kodeksin jú­zege asyrýǵa baılanysty jasalǵan is-sharalar josparyn halyqaralyq kelisimge sáıkestendirý, ózara saý­da qatynastaryn retteý, kedendik baj salyǵyn retteý jáne basqa da máseleler qaralǵan edi. Keden odaǵy aıasynda bas­qo­sýlardyń­ qaı-qaısysynda bolmasyn Qazaqstan basshylyǵy óz eliniń múddesin berik qorǵaý ústinde. О́tken joly da solaı bolǵan edi. Sondyqtan Reseı men Qazaqstan arasynda úshinshi elderden en­gi­zi­letin taýarlarǵa qatysty birqatar máseleler qaıta qaraý úshin sarapshylar keńesine tapsyrylǵan bolatyn. Osy joly Qazaqstan Pre­mer-Mınıstri Kárim Másimov pen  Reseı Federasııasy Úki­metiniń Tóraǵasy Vladımır Pýtın ara­synda ótken kezdesýde osy máseleler kelissózdiń negizgi taqyryptarynyń biri boldy. Kelissózder barysynda je­kelegen ýaǵdalastyqtarǵa qol jetkizildi. Bul jaıynda kelesi nómirde jan-jaqty baıandaıtyn bolamyz.