Búgin Shymkent qalasynyń ákimi Murat Áıtenov qaladaǵy sý basý qaýpi bar aýmaqtardy aralady, dep habarlaıdy Egemen.kz qalalyq ákimdiktiń baspasóz qyzmetine silteme jasap.
Ákim aldymen Badam sý qoımasynda bolyp, onda júrgizilip jatqan sý tasqynyn aldyn-alýǵa baǵyttalǵan jumystarmen tanysqan. Bıyl qalada qardyń jyldaǵydan qalyń jaýǵanyna baılanysty sý qoımasy tolyp ketken. Sý alý qaýpi bolǵan jaǵdaıda shlıýzdardy retteý arqyly «Badam» ózenine jiberý josparlanyp otyr.«Murat Dúısenbekuly «Toǵys» sý qoımasyndaǵy sý tasqynyn aldyn alatyn sharalarmen de tanysty. Syıymdylyǵy 4,6 mln tekshe metrdi quraıtyn qoımaǵa sýdy jınaý búginde avtomatty túrde júrgiziledi. 265 shaqyrymdy quraıtyn toǵan aýmaǵynda qazir sý basý qaýpin aldyn alýǵa baǵyttalǵan sharalar jan-jaqty atqarylyp jatyr», delingen ákimdiktiń Instagram-daǵy paraqshasynda.«Aqsaı qarabastaý» kanaly da qaladaǵy sý tasqyny qaýpi joǵary aýmaq sanalady. Qazir uzyndyǵy 10,5 shaqyrymdy quraıtyn kanaldy qardan-muzdan tazartý jumystary qarqyndy júrgizilip jatyr.
Qalanyń qaýipti aımaqtaryndaǵy sý tasqynyna qarsy jumystardy teksergen qala basshysy jaýaptylarǵa merdiger mekemelerdiń daıyndyǵyn qadaǵalaýdy qatań tapsyrdy.«Sý tasqynyn aldyn alýda aýdan ákimderi men tıisti basqarma basshylary birlese júıeli jumys júrgizýi qajet. Qala turǵyndarynyń qaýipsizdigi úshin eń aldymen, ırrıgasııalyq júıelerdi tazalaý jumystary qarqyndy júrgizilýi tıis. Tehnıkalardyń daıyndyǵyn qadaǵalaý, tıisti sharalardy shuǵyl júzege asyrý - basty nazarda», dedi qala ákimi.