ASTANA. 17 maýsym. Brazılııanyń Salvador qalasynda chempıonattyń G tobyndaǵy Germanııa jáne Portýgalııa quramalary arasyndaǵy oınalǵan oıyn nemisterdiń aıqyn basymdylyǵymen aıaqtaldy. Esep – 4:0. Bul týraly egemen.kz habarlady.
«Nemis máshınesi» sheshýshi shaqtarda árdaıym tastúıin qalypqa túsip, yńǵaıy kelip jatsa, aldyna kelgen kim-kimdi de taptap óte shyǵatynyn osy joly taǵy da anyq tanytty. Onyń dıirmenine túsip ketken Krıshtıaný Ronaldý men onyń áriptesteri úshin bul barynsha sátsiz kún boldy. Olardyń iri eseppen jeńilgenderi óz aldyna, onyń syrtynda jetekshi qorǵaýshysy alańnan qýylyp, taǵy eki oıynshysy jaraqat alyp qaldy. Portýgaldar qarsylastaryna barlyq jaǵynan utyldy. Olar ózderine tán oıynnyń eshbirin kórsete almady. Olar nemisterdiń aldynda fýtboldy jańa úırenip júrgen tálipterdiń keıpin kórsetti.
Matchtyń basynan Ioahım Lıov fýtbol qaýymdastyǵyn óziniń starttyq quramymen qatty tań qaldyrdy. Oıynnyń qarsańynda nemis jýrnalısteri alǵashqy mınýttardan alańǵa Lýkas Podolskı men Andre Shıýrrleniń shyǵatyndaryn bir aýyzdan jarııa etken edi. Biraq jeme-jemge kelgende, negizgi quramda bulardyń ekeýi de bolmaı shyqty. Olardyń alań tórinde oryndaryna Marıo Getse men Mesýt Ozıl jaılasty. Al Paýlý Bentýge kelsek, onyń Ronaldýge ońtaıly oryn qarastyrylǵan shemasynda eshqandaı bir qupııa bolǵan joq.
Kezdesýdiń basyn «býndestım» óz aktıvine jazdy. Búkil alańnyń bıligin birden óz qolyna alyp alǵan Germanııa quramasy birneshe shabýyl uıymdastyryp úlgerdi. Olardyń birinde tipti buryshtamadan dop ta berdi. Budan keıin portýgaldar alǵa umtyldy. Osy shabýyldyń ótinde júrgen Ronaldý birer soqqy jasap ta kórdi. Budan ary eki jaqtyń alma-kezek shabýylyna kezek keldi. Sonyń bir sátinde portýgal qaqpashysy Rýı Patrısıý óz qaqpasyna dop kirip ketýine sebepshi bola jazdady. Onyń laqtyrǵan doby taıaý mańdaǵy Hedıreniń aıaǵyna baryp sart etti. Ony alǵan Samı birden ahýaldy paıymdap, darbazaǵa qaraı zýyldatty. Qudaı saqtaǵanda, onyń atqan snarıady baǵannyń dál janynan zý ete tústi. Biraq bul sáttilik eki mınýtqa ǵana sozyldy. Sonyń artynsha aıyp alańyna kirgen Getseni Joaý Pereıra jerge ala jyǵyldy. Serb tóreshisi Mılorad Majıch oılanbastan 11 metrlik núkteni kórsetti. Ony Tomas Mıýller múltiksiz oryndady – 1:0. Sóıtip, nemister 11-mınýtta alǵa shyqty.
Taımnyń ortasy aýa germanııalyqtar qarqyndy eptep báseńdetti. Osyny paıdalanǵan qarsy jaq tizgindi óz qoldaryna ala bastady. Alaıda, olardy qaqpaǵa tikeleı soqqy jasap, qaýip shaqyratyn ótkirlik jetispeı jatty. «Eýropalyq brazılııalyqtar» kóbine alań ortasymen shapqylaýmen boldy. Mundaı sylbyr oıyndy baıqaǵan nemister bir kezde taǵy da qaýyrt qımylǵa erik berdi. Aldymen Tonı Kroos alańnyń túkpir jaǵynan qarsylastar aıyp alańyndaǵy Mesýt Ozılge keremet pas jetkizdi. Al Ozıl áriptesteri jetýin kútip turdy da, júgirip jetken Getseniń aldyna dopty kólbeı tastaı saldy. Biraq onyń soqqysy aldynan shyǵa kelgen Pereıraǵa tıgen dop artqy aýtqa ketti. Osydan keıin berilgen buryshtama «býndestım» úshin kezekti golmen aıaqtaldy. Buryshtan Kroos jóneltken dopqa Mats Hýmmels buryn jetip, basymen solq etkizdi. Gol! Matchtyń 32-mınýtynda esep osylaı 2:0-ge jetti.
Kezdesýdiń 37-mınýtynda portýgaldardyń qarsylastaryna áldeqandaı qarsylyq kórsete alýynyń sońǵy múmkindikterin julyp áketkendeı oqıǵa oryn aldy. Olardyń Pepe atty oıynshysy Mıýllerdi tyıym salynǵan tásilmen toqtatty. Onymen de qoımaı, qarsylasyna júgirip baryp, ony basymen bir soqty. Osydan keıin alańdaǵy arbıtrdyń buzaqyny alańnan qýǵannan basqa amaly qalmady. Budan keıin Majıchtiń taǵy portýgaldy – Fabıý Kontraýdy da alańnan qýýyna ábden bolatyn edi. Ol dopqa talas kezinde Hedırany shyntaǵymen qasaqana betinen soǵyp jiberdi. Al úzilistiń dál aldynda Ioahım Lıovtiń shákirtteri úshinshi goldy da túsirip, kezdesýdiń qorytyndysyn tolyq shyǵaryp qoıǵandaı boldy.
Kezdesýdiń ekinshi bóliginde oıynnyń kórinisi kóp ózgergen joq. Al budan da kúıreı jeńilýi múmkin ekenin sezgen Paýlý Bentý bul kezeńde qorǵanysty kúsheıte túsýge kúsh saldy. Degenmen, ekinshi taımnyń basy beı-jaı bastaldy. Portýgaldar ózderiniń úreı qushaǵynda júrgenderin bildirmeýge tyrysty. Nemister bolsa, burynǵysynsha alǵa órshelene umtylýdy qoıdy. Biraq bul salystyrmaly tynyshtyq tym uzaqqa barmady. 51-mınýtta Ozıl oıynnan tys qalý sheginde turǵan sátinen alǵa atylyp, Patrısıýmen betpe-bet kelýge múmkindik aldy. Biraq budan ońdy nátıje bola qoımady.
Oıyn sońǵy tórtinshi gol soǵylǵanǵa deıin osyndaı yrǵaqpen júrip jatty. Aqyrynda, 78-mınýtta Kroostyń oń qaptalǵa asyrǵan doby kezekti goldyń negizi boldy. Ol jaqtaǵy Shıýrrle dopty sosyn jerletip qaqpashy alańyna jetkizdi. Ony Patrısıý keri teýip qaıtardy. Mine, sol qaıtqan dop Mıýllerdiń aıaǵyna top ete tústi. Gol!
«Nemis máshınesi» osylaı óziniń náti myqty ekenin taǵy tanytty.
Damır Qojamqul.
Derekkóz: Chempıonat.Rý.
Foto: Sportbox.ru.