EL jáne ELBASY
Kenjebek SAÝYTULY, «Zaman» jeke kásipkerlik qaýymdastyǵynyń basshysy: Astana kúni búginde jalpyhalyqtyq zor mereke retinde, otbasymyzben atap ótetin ádemi merekelik shara bolyp qalyptasyp úlgerdi. Bul kúni Almaty kóshelerinde de merekelik sharalar uıymdastyrylyp, túrli jármeńkeler, mádenı qoıylymdar kóptep ótýde. Kúndiz nemerelermen saıabaqta, qala aýdandarynyń alańdarynda qydyrsaq, keshkisin otbasymyzben dastarqan jaıyp, teledıdardan Astana qalasyndaǵy merekelik konsertti tamashalaımyz. Arqa tósine tý tigip, Qazaq eliniń kindik ordasy – Astanany kórkeıtken, árıne, Elbasymyz Nursultan Ábishuly Nazarbaev. Osydan jıyrma jyl buryn el astanasyn kóshirý týraly sheshim qabyldaǵanda jasy úlken aǵasy retinde, bir áýlettiń aqsaqaly retinde syrttaı tilekshi boldym. Shúkir, synaı qaraıtyn syrt kózdiń suǵyna uryndyrmaı, mineı qaraıtyn mańaıdaǵy myń san adamnyń mazaǵyna qalmaı, Astanany búgingi dárejege jetkizip, onda qanshama halyqaralyq iri kezdesýler men basqosýlardy, tarıh betterinde tereń iz tastaıtyn úlken sharalardy atqaryp úlgerdi. Bul da bolsa Elbasynyń elge tutqa, álemge abyroıly ekendiginiń shynaıy mysaly, anyq dáleli dep bilemin. Astanadaǵy Aqordadan berilip jatqan buıryqtar men qabyldanyp jatqan zańdar Qazaqstan halqynyń alańsyz ómir súrýine, erkin eńbek etýine jáne keleshegine senimdi bolýyna yqpal etip keledi. Men óz urpaǵymnyń bolashaǵy jarqyn bolady degenge kámil senemin. О́ıtkeni, bizde bereke bar, birlik bar, barlyq halyqty bir múdde, bir nıette ustap otyrǵan Elbasy bar. Ol – Qazaq eliniń jarqyn bolashaǵy úshin tynymsyz eńbek etip júrgen eren tulǵa Nursultan Nazarbaev. ALMATY.Sýretti túsirgen Erlan OMAROV.
«Meniń hatymdy úlgi etti»
Zýrab BOBOHIDZE, «Iverııa» etnomádenı birlestiginiń tóraǵasy: Meniń úıim, meniń otbasym, baýyrlarym, úsh balam, bes nemerem osynda. Táýelsizdik jaǵdaıynda men grýzın bolǵanym úshin birde-bir ret óz elimniń ómirinen shet qalý sezimin basymnan ótkergen emespin». Iá, bizdiń Tuńǵysh Prezıdentimiz Nursultan Nazarbaev Assambleıanyń ótken jylǵy sessııasyndaǵy baıandamasynda men týraly dál osylaı aıtqany oryndy edi. Men Elbasyna jazǵan hatymdy osy mazmunda bastap, elimizdegi etnosaralyq tatýlyqty bekite túsetin Qazaqstan halqy Assambleıasyn qurǵany úshin rızashylyǵymdy bildirip edim. Assambleıanyń ár jyl saıynǵy sessııasynda elimizdegi birlik pen dostyqtyń bekı túskenine kýá bolyp kelemiz. Elbasy Qazaqstan halqy Assambleıasyn damytýdyń 2020 jylǵa deıingi tujyrymdamasyn usyndy. Bul – kóńilge qonymdy qujat. О́ıtkeni, tujyrymdamany tyńdaı bastaǵan sátte nege «bir halyq», nege «bir taǵdyr» degen saýaldardyń jaýabyn oısha izdeı bastadym. Sóıtip, oılanyp otyrǵanda, Elbasy tujyrymdamanyń ón boıyna qan júgirte baıandaı kele, árqaısymyzdyń kókeıimizdegi suraqtarǵa jaýap berip tastady. Shyndyǵynda, Qazaqstandaǵy ultaralyq dostyqtyń altyn dińgegin qalyptastyrýda Tuńǵysh Prezıdentimiz Nursultan Nazarbaevtyń eren eńbegi baryn aıryqsha aıtýymyz qajet. О́ıtkeni, Memleket basshysynyń Qazaqstanda halyq Assambleıasyn qurý ıdeıasy óziniń jemisin berdi dep oılaımyn. Bul –ultaralyq dostyqty nyǵaıtýdyń qazaqstandyq modeli. Mundaı model buryn álemdegi birde-bir elde bolmaǵan ǵoı. Qazir kóptegen eldiń basshylary men saıasatkerleri Qazaqstandaǵy ulttardyń berik dostyǵy men tatýlyǵyna qyzyǵyp ta, qyzǵanyp ta qaraıdy. Qazaqstandyq modeldiń utymdy tustaryn ózderinde qoldanýdy qalaıdy. Demek, bizdiń táýelsiz Qazaqstanymyzdyń dostyqtyń mekenine aınalǵanyna bárimiz de súısinemiz, bárimiz de marqaıamyz. Qazaqstanda turatyn ár etnostyń taǵdyry bir ekeni daýsyz. Meniń taǵdyrym Qazaqstandy meken etken árqazaqstandyqtyń taǵdyrymen bite qaınasyp jatyr. О́zim osy elde turǵanyma 40 jyldan asty. Osy jyldar ishinde qazaq jerin meken etken halyqtardyń ózara dostyǵyna qaıran qalýmen kelemin. Buǵan jyl ótken saıyn, Qazaqstannyń ár óńirinde bolǵanda kózim jete túsýde. О́ziniń ana tili bolmasa da, jan syryn aıtatyn, qýanyshy men qıyndyǵyn birge bólisetin dostarynyń ana tilin meńgerip, sol halyqtyń tarıhy men ádebıetin, óneri men mádenıetin tereń bilýge umtylǵan ózge ulttardy kóbirek kezdestirdim. Meniń de syrymdy aıtatyn, qınalǵanda janymnan tabylatyn dostarymnyń arasynda ózge ult ókilderi kóp. Ásirese, qazaq pen orystyń, armıan men tájiktiń jigitterinen dostyqqa adal, sózine berik, joldastyqtyń qadirin sezine alatyn jaqsy dostar tapqanyma qýanamyn. Bir-birimizdi eshqashan ultqa bólmeımiz. Kerisinshe, bir-birimizdiń ulttyq salt-dástúrimizge qurmetpen qarap, balalarymyzdyń ulttyq ánderimiz ben bılerimizdi jetik meńgerýine qoldaý bildiremiz. Osy oraıda, Qazaqstanda ózge ulttardyń ana tili men salt-dástúrin, tól óneri men mádenıetin jańǵyrtýyna qolaıly jaǵdaı jasalǵanyn aıryqsha atar edim. Qazaqstanda, sonyń ishinde Atyraýda turatyn meniń qandastarym da «Iverııa» grýzın etnomádenı birlestigin qurýyna esh kedergige kezikken joq. Qandastarym bul birlestikti basqarý mindetin maǵan júktedi. Árıne, qaı istiń de bastaýynda qıyndyqtar kezdesetini barshaǵa málim ǵoı. Alaıda, biz etnomádenı birlestiktiń jumysyn jolǵa qoıý barysynda memlekettiń qoldaýyn anyq sezindik. Qazir balalarymyz óz tilinde sóıleıdi, ulttyq ónerimizdiń qaınarynan tereń sýsyndaı bastady. Birlestik janynan jastardyń bı ansamblin quryp, onyń múshesi bolýǵa tilek bildirgenderdiń ultyna shekteý qoımadyq. Olardyń arasynda qazaqtyń, orys pen osetınniń jastary bar. Osynyń ózinen bizdiń jastarymyzdyń arasynda da dostyqtyń týy bıik kóterilgenin uǵýǵa bolady. Men Qazaqstandaı tatýlyq, yntymaq uıalaǵan elde turǵanymdy, osy memlekettiń azamaty bolǵanymdy baqytqa sanaımyn. Eger basqa bir elde turatyn bolsaq, ómirimiz alańsyz bolaryna sene alar ma edim? Sebebi, kúnbe-kún buryn bir Odaqtyń bodaýynda bolǵan memleketterdiń birazyndaǵy, sonymen birge, jahan elderindegi bolyp jatqan alaýyzdyq pen turaqsyzdyqtyń teris áseri nege soqtyratynyn estip te, kórip te júrmiz. Osy turǵydan aıtqanda, óz taǵdyrymnyń, balalarymnyń bolashaǵy Qazaqstanmen baılanysty bolǵanyna shúkirshilik etemin. Basqasha aıtar bolsam, qazaq jerindegi ómirimdi baqytty kúnderimniń eń bir shýaqty sátine balaımyn. Biz, Qazaqstandaǵy ózge ulttyń ókilderi ózimizdiń salt-dástúrimizdi, tilimiz ben ónerimizdi damytyp qana qoımaı, eldegi tatýlyq pen dostyqtyń qadirin keıingi býynnyń sanasyna tereń sińirýge úlesimizdi qosyp júrmiz. Osy maqsatpen aýdandardy aralap, birlestik quramyndaǵy bı ansambliniń konsertin ótkizip júrmiz. Biz árbir sharamyzǵa ózge etnomádenı birlestikterdiń múshelerin shaqyramyz. Bárimizdiń ortaq Otanymyz, ystyq uıamyz – Qazaqstan. Bıikte qalyqtaǵan qyran da uıasyndaǵy tynyshtyqtyń buzylmaǵanyn qalaıdy. Endeshe, biz de baqytty ǵumyr keship jatqan uıamyz – Qazaqstandaǵy mamyrajaı dostyǵymyzdyń buzylmaýy úshin bir-birimizdiń ónerimizge ǵana emes, taǵdyrymyzdyń da jaqsy qyrynan qalyptasýyna qoldaý kórsetýimiz qajet dep oılaımyn. Atyraý oblysy.«Úzdik pedagog baıqaýynyń júldegerimin»
Kúlimhan TÚNDEBAEVA, ustaz: Elbasynyń eren eńbegi degende áýelgi kezekte aıtarym, Qazaqstan Respýblıkasy Táýelsizdigin tórtkúl dúnıege pash etip, órkenıetti, damyǵan elder qatarynan oryn alǵany bolyp otyr. Egemendigimizdiń irgesi berik. Al Elbasy eńbeginiń bir ǵana dáleli retinde memlekettik saıasatqa saı Almaty oblysynyń ortalyǵyn Taldyqorǵan qalasy etip belgileýi dep sanaımyz osy óńirdiń halqy. О́zge salalar sekildi halyqqa bilim berý júıesinde de alǵa basýdyń alǵashqy qadamy – ustazdar syndarly synaqtan ótip, oqýshylar halyqaralyq talapqa saı bilim alýyna ashylǵan múmkindik bolyp otyr. Aıtalyq, byltyrǵy jyly men «Úzdik pedagog-2013» baıqaýyna qatysyp, júldeger atandym. Osynaý ıgi sharaǵa daıyndalý barysynda túıgenim, zaman aǵymyna ilesemin degen ustazǵa, oqımyn degen oqýshyǵa jarqyn jol ashylǵan. Bul kezeńdi osydan on jyl burynǵy ýaqytpen salystyrsaq, aıyrmasy jer men kókteı. О́z tájirıbemnen mysal keltirsem, til men ádebıet – tanymdyq is-áreketterdiń quraly, oılaýdyń formasy jáne ony damytýdyń negizi. Osy negizdi júzege asyrýda «Oqýshylardy izdeniske baýlı otyryp, shyǵarmashylyq qabiletin damytý» degen másele boıynsha izdenis jumysyn júrgizdim. Ustanǵan maqsatym – jeke tulǵanyń bilim alýǵa degen ózindik senimin arttyrý, óz betimen jumys isteýine jaǵdaı týǵyzý, qabiletin arttyrý, darynyn damytý. Osy maqsatqa jetý úshin qazirgi pedagogıka salasyndaǵy jańa tehnologııalardyń eń tıimdi tájirıbelerin paıdalanyp jumys istedim. Shyǵarmashylyq pen izdenimpazdyqtyń bastamasy eńbektenip kásibı sheberlikti shyńdaý ekendigin uǵyndym. Mine, osynyń barlyǵy Elbasy tarapynan muǵalimderge jasalǵan jaqsylyqtyń arqasynda múmkin bolyp otyr. Menimen birge áriptesterim de izdene júrip kóp nársege kózderi jetti. Sol qundylyqty oqýshylar sanasyna sińirý – qasıetti boryshymyz. TALDYQORǴAN.«Kıeli besik, qutty shańyraq»
Aleksandr PLOTKO, «Svitanok» ýkraın etnomádenı birlestiginiń tóraǵasy: Elbasymyz Qyzyljar óńirindegi kezekti bir jumys saparynda maslennısa merekesine qatysqany bar. Sonda aqpannyń yzǵarly kúniniń jaımashýaqtanyp, kóktem kelgendeı kúı keshkenimizge áli kúnge deıin tańdanys bildiremin. Resmı jıyn aıaqtalǵannan keıin Nursultan Ábishuly qalyptasqan ádetimen alańdy aralap, jınalǵan jurtshylyqpen emin-erkin aralasyp, hal-jaǵdaılaryn surap jatty. Osy kezde bizdiń qoǵamdyq birlestiktiń bir mosqaldaý áıeli Elbasyn toptyq bıge shaqyrdy. Tóbemizden jaı túsirgendeı áser etken tosyn jaǵdaıǵa ańtarylyp qalyp, áliptiń artyn kútkendeı boldyq. «Nesi bar! Jastyq shaǵymyz ótken Ýkraınanyń bıin nege bilmeske?», dep ózine tán qarapaıym da bııazy minezimen jaýap bergende bárimiz jaıdarylanyp sala berdik. Elbasymyzdyń qıynnan qıystyryp jol taba biletin minezi men bolmys-bitimi halyqpen etene baılanysyp ketkeni sonshalyq, Qazaqstan dese, aldymen kóz aldymyzǵa Nursultan Ábishulyn elestetetinimiz ras. Memleket basshysynyń ultaralyq, konfessııaaralyq syndarly saıasatynyń arqasynda elimiz birlik pen kelisimniń kıeli besigine, tutastyq pen turaqtylyqtyń qutty shańyraǵyna aınalyp otyr. El birliginiń bastaýy bolsyn degen izgi nıetpen qurylǵan Qazaqstan halqy Assambleıasy mańyzy zor jalpyazamattyq ınstıtýttyń rólin atqaryp kele jatqanyna 19 jyldan asyp barady. Osy kezeń aralyǵynda Prezıdentimiz Tóraǵasy bolyp tabylatyn saıası qurylym ómirsheńdigin dáleldep, beıbit qoǵamymyzdyń ajyramas bir bóligine aınaldy. Qazaqstan halqy Assambleıasynyń oblystyq fılıaly aıasynda jıyrmadan astam etnomádenı birlestik qurylyp, tonnyń ishki baýyndaı bite qaınasyp ketken. О́ńirde 40 myńǵa jýyq ýkraındar turady. “Svitanok” ýkraın mádenıeti ortalyǵy” qoǵamdyq birlestigi ana tilimizdi, mádenıetimizdi nasıhattaý maqsatymen qurylǵan. Petropavl qalasyndaǵy №17 ulttyq órkendeý orta mektep-kesheninde 17 bala oqıdy. Olar ana tilin, salt-dástúrlerin, mádenıetin bilýmen qatar, qazaq halqynyń tarıhı qundylyqtarymen de tereń tanysady. Qazaqstan halqynyń birligi men kelisimin, tutastyǵyn nyǵaıtýǵa baǵyttalǵan barlyq is-sharalarǵa únemi qatysyp turamyz. Ata-babalardyń dástúrleri men saltyn joǵaltpaı, bir-birimen ana tilinde qarym-qatynas jasaýǵa Qazaqstanda barlyq múmkindikter týdyrylǵan. Ýkraınada bolyp jatqan qandy oqıǵalarǵa, shıelenisti jaǵdaılarǵa alańdaýshylyq bildire otyryp, osyndaıda tynysh ómirdiń, ózara túsinistiktiń aýadaı qajet ekenine kóz jetkize túsesiń. Elbasy Nursultan Nazarbaevtyń «Qazaqstan joly – 2050: bir maqsat, bir múdde, bir bolashaq» Joldaýynda “Jańa qazaqstandyq patrıotızm” termıniniń paıda bolýy kezdeısoqtyq emes. Qazaqstannyń kópetnosty memleket ekeni aldymen eskerilgeni birden baıqalady. Keńes Odaǵy ydyraǵan kezde til máselesi óte ótkir sezilgeni bárimizdiń esimizde. О́zimiz kýá bolǵandaı, qazaq aýyldarynyń ózinde qazaq tili durys oqytylmady. Qazir jaǵdaı múldem ózgeshe. Qazaq tilin memlekettik til retinde bárimiz qadir tutamyz. Neǵurlym kóp tildi meńgerseń, solǵurlym zamanǵa beıim ómir súretinimizdi Elbasymyz tynbaı aıtyp keledi. Qazir kórip júrgenimizdeı, keı memleketterde til etnostar arasyn biriktirýshi emes, kerisinshe, iritki salýshy qural bolyp tur. Adamnyń qyzyǵýshylyǵy bolsa, kez kelgen tildi úırenýge kedergi joq. О́zim qazaqsha úırenip júrmin. “Eýrazııa” arnasynan jańalyqtardy qazaq tilinde tyńdaımyn. Qazaqstandyq patrıotızm ár adamnyń boıyna bala kúninen sińiriledi. Ol úshin mektep oqýshysy memlekettik rámizderdi qurmet tutyp, qasterlep ósýi kerek. О́zim basshylyq etetin №1 mektep-ınternatta ár dúısenbi saıyn sabaq bastalarda memlekettik Ánurandy oryndaý buljymas qaǵıdaǵa aınalǵan. «Kez kelgen sanaly adam úshin beıbitshilik pen kelisim sózderi eń mańyzdy bolýy tıis», degen Elbasymyzdyń sózderin qazaqstandyqtar boıtumardaı kóretini kámil. Soltústik Qazaqstan oblysy.«Elge qyzmet etýdiń eren úlgisi»
Jumabek KÝKANOV, «Álııa joldary» JShS dırektory: Barsha qazaqstandyqtyń Elbasy týraly halqynyń baǵyna týǵan tulǵa dep baǵalaıtynyna shek keltirmeımin. Onyń táýelsizdiktiń tuǵyrly bolýy jolyndaǵy tarıhı taǵylymdy isteri men izdenisteri Qazaqstandy álemge tanytty, osy arqyly ózin de álemdik saıasattyń altyn dińgegi bolyp júrgenderge ádemi moıyndatty. Elbasynyń osy jyldardaǵy bolattaı berik ustanymy ulan-ǵaıyr jumystyń atqarylýyna uıytqy boldy. Keńestik solaqaı saıasattyń qursaýynan bosap, elimiz egemendik alǵanda, aq túıeniń qarny jarylǵandaı aqjarylqap kúı keshkenimiz kúni keshe bolatyn. Halqynyń qalaýymen memleket tizginin ustaǵan Nursultan Ábishuly sol eleń-alań shaqta da saıasattaǵy jáne ekonomıkalyq damýdaǵy ustanǵan baǵyttaryn aıqyn ańǵartqan-dy. Tarıhı qysqa kezeńde ǵasyrda atqarylatyn sharýalardyń basy qaıyrylǵanyn kózimiz kórip, kóńilimiz sezip otyr. Áýeli ekonomıkany durys jolǵa qoıýdy qolǵa alǵan eli úshin týǵan erdiń saıasatta da álemdi moıyndatatyndaı qadamdar jasaǵanyn aıtý lázim. Osy kezeńde táýelsiz memlekettiń negizi qalanǵany, demokratııalyq qoǵam qalyptasqany, halyqaralyq bedeldi qaýymdastyqtarǵa múshe bolǵany Elbasy esimimen tyǵyz baılanysty. Táýelsiz jas memleketimiz naryqtyq qatynastarǵa tóselip, damýdyń qazaqstandyq aıshyqty jolyn tańdaýynda da Nursultan Ábishulynyń ózindik qoltańbasy jatqany sózsiz. Elordany Arqadaǵy Aqmolaǵa kóshirip, ózge memleketterdiń túsine de kirmeıtin irgeli de iri is tyndyrǵanyn tórtkúl dúnıe túgel bilip otyr. Bul Elbasynyń erligi de, kóregendigi de bolatyn. Azǵantaı ýaqytta asqaq ǵımarattary boı túzegen Astanada álemdik deńgeıdegi úlken jıyndardy ótkizip, olarda ekonomıkalyq damýdyń, beıbitshilik pen turaqtylyqtyń tuǵyryn bekitetin sheshimderge qol jetkizýi bul kisiniń halqynyń baǵyna týǵan uly tulǵa ekeniniń aıqyn dáleli. Táýelsiz elimizdegi halyqtyń birligi men yntymaǵyn saqtaýdaǵy eren eńbeginiń ózi nege turady. Áralýan din ókilderiniń basyn Astanada áldeneshe ret qosýy, Semeı polıgonyndaǵy synaqtardy toqtatyp, Qazaqstandy ıadrolyq qarýsyz elge aınaldyrýy, sońǵy jyldardaǵy ekonomıkalyq bastamalary Nursultan Nazarbaevtyń qajyr-qaıratynyń, eliniń erteńi úshin qyzmet etýdegi janqııarlyǵynyń kórinisi bolsa kerek. О́zi jıyrma jyl buryn bastamashy bolǵan Eýrazııalyq ekonomıkalyq odaqqa qol qoıylýyn zor jetistik demeýge bola ma? Mine, qazir elimiz álemdegi ozyq otyz eldiń qataryna enýge talpynys tanytyp jatyr. Munyń naqty kórinisi ómirimizdiń jaqsarýynan da baıqalýda. Halyqtyń turmysy túzelip, jaǵdaıy jaqsara tústi. Alys aýyldardyń da ajary kirip, eldiń eńsesi kóterildi. Erteńgi kúnge degen senimimiz mol. Elbasynyń shaǵyn jáne orta bıznesti qoldaýdaǵy qadamdary da kóptiń kóńilinen shyqty. Men kásipker retinde muny aıqyn sezinip otyrmyn. Elimizdegi barlyq ıgilikti ister Memleket basshysy N.Nazarbaevtyń tikeleı uıymdastyrýymen júzege asyp jatyr. Osyndaı basshymyz bar elimizdi baqytty dep esepteımin. Aqtóbe oblysy.«Astanany arman qalaǵa aınaldyrǵan»
Olga KORJEVA, Qazaqstan Respýblıkasynyń eńbek sińirgen ártisi, «Qurmet» ordeniniń ıegeri, Almatydaǵy N.Sas atyndaǵy jasóspirimder teatrynyń aktrısasy: Men memleketimizdiń júregi – Astana qalasyn kele jatqan týǵan kúnimen quttyqtaǵym keledi. Astana degen kezde barshamyzdyń oıymyzǵa áýeli Elbasymyz Nursultan Ábishuly Nazarbaev túsedi. Sondyqtan da qurmetti Memleket basshymyzdy da osy Astana qalasynyń ataýly merekesimen shyn júrekten quttyqtasam deımin. Men Elbasyn – Qazaqstan Respýblıkasynyń turaqtylyǵy men tynyshtyǵynyń kepili ǵana emes, osy memlekettiń ilgeri basýyna, ekonomıkalyq, áleýmettik, ǵylym men bilim, sondaı-aq, rýhanı qazyna – óneriniń qaryshtap damýyna úlken eńbegi sińgen tulǵa dep bilemin. Qazirgi tańda Qazaqstan tek Ortalyq Azııamen ǵana shektelmeı, álemniń damyǵan jáne damýshy elderiniń ishindegi eń tynysh el, eń turaqty meken retinde de kúlli dúnıege úlgi bolyp otyr. О́zim óner adamy bolsam da, kúndelikti álem jáne otandyq jańalyqtardy jiti qadaǵalap otyramyn. Bir baıqaǵanym, bizdiń elimizdiń ekonomıkasyna sheteldik ınvestorlardyń qyzyǵýshylyǵy kún sanap artyp keledi. Eger Qazaqstanda osyndaı tynyshtyq bolmasa, álemge tanymal iri kompanııalar óz qarajatyn quıyp táýekelge barmas edi ǵoı. Mine, munyń bári – Elbasy Nursultan Nazarbaevtyń ishki-syrtqy saıasattaǵy kóregendigi men naqty basymdyqtarǵa jasaǵan batyl qadamynyń jemisi. Byltyr jeltoqsan aıynda meniń keýdeme «Qurmet» ordenin Elbasymyzdyń ózi taqqan edi. Sol kezdesý, sol saltanatty sát áli kúnge kóz aldymda, máńgi kóńilimde. Otandyq ekonomıka, zań, ǵylym men bilim, rýhanııat salalaryna eńbegi sińgen qaıratkerlerdi marapattaý kezinde meni asa tańǵaldyrǵany – Prezıdentimizdiń ár adamǵa erekshe kóńil bólip, erekshe iltıpat kórsete biletin, aqsúıek ázilge de kende emes, úlken-kishimen teń dárejede qarym-qatynas jasaıtyn úlken júrekti tulǵa ekendigi boldy. Marapattaý kezegi maǵan kelgende men úlken kisiniń aldynda eptep qysylyp qalsam da: «Qurmetti Prezıdent myrza! Siz bizdiń teatrdyń jańa qoıylymyn tamashalaýǵa kelińizshi», degen tilek qalaı aýzymnan shyǵyp ketkenin bilmeı qaldym. Zor qýanysh pen tereń tolqynysta aýyzǵa túsken sóz sol boldy. Sonda Elbasy jyly jymıyp turyp: «Qandaı qoıylym?», dep surady. Men aǵylshyn klassıgi Bernard Shoýdyń «Mıllıoner áıel» qoıylymy ekenin aıttym. «Árıne, baramyn!», dep jaýap berdi Prezıdent. Memleket basshysy men óner ıesiniń arasyndaǵy shaǵyn áńgimege sol jerdegi kisilerdiń bári rıza bolysyp, aqtaryla kúlisip jatty. Mine, bul da Nursultan Ábishulynyń adamı kelbeti men kishipeıildigin, uly isterdiń basynda júrse de qarapaıym nársege súlesoq qaramaıtyndyǵyn kórsetedi. Bir nárseni atap aıtqym keledi. Áý basta elimizdiń astanasyn Arqa jerine kóshirip, oǵan Astana dep at qoıǵan tusta senimsizdik tanytqandar óte kóp boldy. Birneshe adam emes, búkil qazaqstandyqtardyń sanasyna syımaıtyn másele, barshamyzdyń basymyzǵa kirmeıtin oı edi. Biraq Elbasy sondaı sheshim qabyldady. Endi, mine, otandastarymyz turmaq, shetelderden elimizge qonaq bolyp kelip jatqan kisilerdiń bári tańdaı qaǵysyp, az ǵana ýaqyt ishinde shaǵyn qalashyqtan kóz toıǵysyz záýlim úıler men ǵajaıyp ǵımarattary boı kótergen, mádenıeti jańa deńgeıge shyǵyp, halqy sanattanǵan qııalǵa bergisiz qala, derbes eldiń elordasy – Astana qalasy bolǵanyna kýá bolýda. Astana – arman qala. Alǵash astana mártebesin alǵan tusta gastroldik saparmen barǵanymyz esimde. Sol kezde biz jańa ǵana boı kótere bastaǵan qurylys nysandary men endi-endi jınaqylana bastaǵan qalany, kúndiz-túni jumys istep jatqan jumysshylardy kórgen edik. Araǵa jyl salyp qoıylymdarymyzben barǵan saıyn az ýaqyt ishinde túlep kele jatqan Astananyń qalyptasýy men ósýin óz kózimizben kórdik. Qazir aıtsa, adam nanǵysyz. Úlken-kishimiz Astanaǵa barǵymyz kelip turady. Ol jerde armandarymyz oryndalyp, tilekterimiz qabyl bolatyn sııaqty sezinemiz. Bul da Elbasy Nursultan Nazarbaevtyń Astana qalasynyń mártebesine, qasıetine qosqan orasan eńbegi men tolassyz úlesi dep bilemin. ALMATY.«Prezıdent Jarlyǵymen nagrada aldym»
Amanqos ShAÝHYMBERDIEV, Mańǵystaý oblystyq aýrýhanasynyń bas travmatology, «Eren eńbegi úshin» medaliniń ıegeri: Meniń dáriger bolyp qyzmet etkenime 45 jyl toldy, ıaǵnı jarty ǵasyrǵa jýyq. Osy jyldardyń 37 jylyn bas travmatolog, meńgerýshi bolyp basshylyq qyzmetterge arnadym. Táýelsiz elimizdiń Tuńǵysh Prezıdenti Jarlyǵymen tól nagradamyzǵa qol jetkizip, odan burynyraq «Medısına úzdigi» atanyp, «Pırogov» atyndaǵy medalmen marapattaldym. Muny aıtý sebebim, osynsha ýaqyt maǵan ózim kýá bolǵan kezeńge, ıaǵnı keshe men búginge baıyppen qaraýǵa, nege qol jetkizip, qaı deńgeıde kele jatqandyǵymyzǵa taldaý jasaýǵa múmkindik beredi. Qazir elimizdiń medısına salasy laıyqty damyp keledi, biraq bári qalyptasty deýge erte, áıtse de jaqsy bastamalardyń qolǵa alynyp, mamandardyń shetel ǵalymdarymen tájirıbe almasyp, zamanaýı qural-jabdyqtardyń jetkizilýi, jańadan dárigerlik mekemelerdiń boı kóterýi bizdegi oń ahýaldy bildiredi. Bilim alýyna, qyzmet etýine jaǵdaı jasalǵan jas mamandar jetilip keledi. Mundaı jańalyqtar Mańǵystaý oblysynda da óz órnegin qaldyrýda, jýyrda oblystyq aýrýhananyń «G» blogy paıdalanýǵa beriledi dep kútýdemiz. Cheh elinen ákelingen apparatýralarmen jabdyqtalǵan hırýrgııalyq blokta ózimizdiń bilikti mamandarymyz iske kirispek. Osynyń bári bizdiń táýelsiz elimizdiń jetistigi, «biz daıyn emespiz» dep keri tartý bizdi zaman ıiriminen kenje qaldyrary belgili. Sondyqtan Memleket basshysy N.Nazarbaev damý jolynan aınymaýdy, alǵa batyldyqpen umtylýdy maqsat etip qoıyp, eldi osyǵan jumyldyryp keledi. Shalǵaıdaǵy aýyldarǵa sapaly dárigerlik qyzmet kórsetý úshin aýyl medısınasyn damytýǵa da zor kóńil bólinýde, al jas mamandarǵa «Jol kartasy» baǵdarlamasy kómekke keldi. Qazirgi Qazaqstan medısınasyndaǵy serpilis bizdi zor bolashaqqa úmittendiredi. Berekeli turmys, bazarly qyzmet tek tynyshtyqtyń, órkendeýdiń belgisi. Jumystan bas kóterip, qol qalt etkende alysqa oı jibersek, boıyn tiktegen jańa Astanamyzǵa, álem elderine óz ekpindi únin estirte alǵan Elbasymyzǵa rıza bolamyz. Qyzmet babynda jylyna 1-2 ret jolymyz túsetin elordamyz jyl sanap emes, aı saıyn ózgerip keledi, zaman údesindegi alyp ǵımarattar kóz jaýyn alady. Halqymyzdy osy tynyshtyqtan, osy damýdan aıyrmasyn, bizdiń el ǵasyrlar boıy kórgen qıyndyqtyń sońy máńgilik baqytqa ulassyn dep tileımiz. Mańǵystaý oblystyq aýrýhanasy janyndaǵy ardagerler qoǵamdyq birlestiginiń tóraǵasy retinde mańǵystaýlyq dárigerler atynan Astanamyzdy jáne Elbasymyzdy týǵan kúnderimen quttyqtaımyn. Elimiz, jerimiz bir, arman-maqsatymyz ortaq, taǵdyrymyz da bir, olaı bolsa, barsha halyq bolyp, amandyqpen birge órleıik, abyroıǵa birge jeteıik! Aqtaý.«Elbasy batasyn berip edi»
Bolathan KО́PTILEÝOV, «Qazfosfat» JShS «Mıneraldy tyńaıtqyshtar» zaýytynyń aǵa sheberi: «Nur Otan» partııasynyń kezekten tys ótken HV sezi el ómirindegi aıtarlyqtaı eleýli oqıǵa desek, men úshin erekshe sát – Elbasymyz Nursultan Nazarbaevtan bata alǵanym. Jalpy, Prezıdenttiń qolyn alǵan kez kelgen adamnan surasańyz, Nursultan aǵanyń aýrasy erekshe rýhtandyryp, ózine baýrap alatyn, dem beretin qasıeti bar ekenin jasyrmaı aıtady. Men muny osy joly shynaıy sezindim. Buǵan deıin de, ıaǵnı 2011 jyly ótken sezde de men elimizdegi óndiris salasy jastarynyń atynan Prezıdenttiń aldynda sóz sóılegenmin. Ol kezde jolyǵýdyń sáti túspedi. Biraq, osy joly mindetti túrde ol kisiniń qolyn alamyn dep ózime sert bergen edim. Árıne, Elbasymyz qaı jerde bolsyn halyqpen amandaspaı ketpeıdi. Sol sııaqty ótken sezde de jıyn bitken soń halyqqa qaraı jaqyndady. Aldyńǵy qatardaǵylar qolyn alýǵa asyǵyp jatty. Men taǵy da tasada qalyp, amandasa almaıtyn boldym-aý dep ishteı bir túrli kúıge tústim. Biraq, jańa aıttym ǵoı, ol kisiniń qasyna jaqyndasań, adamǵa bir rýh beredi dep. Bir kezde «Nursultan Ábishuly!» dep qalǵanymdy ózim de sezbeı qaldym. Ol kisi de «Aý!» dep beri buryldy. Eldiń bári bizge qarap qalǵan. Sol sátte qaýmalaǵan adamdar aramyzdy asha berdi. Elbasy men ekeýmizdiń aramyz bir-aq qadam. «Aǵa, sóz surasam bola ma?», dedim. Ol kisi kúlip jiberdi de: «Aıta ber», dedi. «О́tkende bir tús kórdim. Túsimde Siz usynǵan qalamsappen Qazaqstandy órkendetýge arnalǵan jospar quryp jatyr ekenmin. Sol túsim óńime aınalsyn, elimiz ósip-órkendeı bersin degen nıetpen, aq batańyzdy berip, qalamsabyńyzdy óz qolyńyzben usynyńyzshy», dedim. Elbasymyz sol jerde batasyn berip, sońynan «Aýmın!», dedi. Sosyn tórt-bes qadamdaı jerde ózi otyrǵan orynnan qalamsabyn alyp kelip, maǵan usyndy. Elbasymyz qashan da jastardy qoldap, jebep, ylǵı da elimizdiń bolashaǵy retinde baǵalap júredi ǵoı. Sondyqtan bergen batasy men usynǵan qalamyn tek maǵan ǵana emes, elimizdiń búkil jastaryna arnady dep qabyldadym. Jambyl oblysy.