Elordada «Baıtaq» jasyldar partııasynyń II sezi ótti. Quryltaıda saıası qurylymnyń saılaýaldy tuǵyrnamasy bekitildi. Májilis depýtattyǵyna tizim boıynsha 18 kandıdat usynyldy. Olardyń qatarynda áıelder kvotasy boıynsha 4, jastar kvotasymen 1 jáne múgedektigi boıynsha 1 úmitker bar.
Taǵy tórt úmitker majorıtarlyq júıe boıynsha saılaýǵa qatysady. Al jergilikti máslıhattarǵa 160 kandıdat tirkelgen. Esterińizge salsaq, «Baıtaq» jasyldar partııasy 2022 jyldyń sońynda ekologııalyq turaqty qoǵam qurý, halyqtyq demokratııa jáne ekologııaǵa uqypty qaraý qaǵıdattaryn qoldaý maqsatynda qurylǵan bolatyn. Saıası arenaǵa endi qadam basqan jas partııanyń maqsaty aıqyn, jigeri tasyp tur. Muny quryltaı barysynda ańǵardyq. Partııanyń maqsaty – ósimdikter men janýarlar dúnıesin qorǵaý, bıologııalyq ártúrlilikti saqtaý, tabıǵı resýrstardy oryndy paıdalanýdyń jalpy álemdik qaǵıdattaryn engizý, ınnovasııalyq tehnologııalardy engizý jáne qorshaǵan orta salasyn sıfrlandyrý.
Partııa tóraǵasy Azamathan Ámirtaev tizimdegi kandıdattardyń shamamen 15-i Májiliske baratynyna senimdi.
– Biz 2,5 mln daýys jınaımyz dep oılaımyn, ol shamamen tizimdegi 15 adam, sondaı-aq majorıtarlyq tizimdegi kandıdattar bar. Kóp nárse materıaldyq resýrsqa baılanysty. Bizdiń partııa halyqtan shyqty, saılaýǵa qatysý úshin kóp qarajat kerek. Sondyqtan táýekelderdi azaıtý úshin eki jaqtan da qatysamyz dep sheshtik. Bizdiń partııaǵa mindetti túrde laıyqty oryndar buıyrady dep senemin. О́ıtkeni jergilikti jerlerdegi jaqtastarymyz myqty. Halyqtyń qoldaýyn da sezinip júrmiz. Partııalyq tizimge ótken adamdardy depýtattyqqa ótkizemiz. «Baıtaq» jasyl ekonomıka, jasyl energetıka máselesimen aınalysady.
Biz aınalamyzǵa qorshaǵan ortany qorǵaýǵa beıjaı qaramaıtyn azamattardy toptastyrdyq. Túrkistan, Jambyl, Qyzylorda, Atyraý oblystary, Almaty qalasy men elimizdiń batys óńirlerinde belsendiler júıeli jumys istep jatyr,
Biz Parlamentte bıznesmender, baılardy emes, qarapaıym qoǵam belsendilerin kórgimiz keledi. Baılar, bıznesmender tek óz qaltalaryn ǵana oılaıdy. Al biz bolashaq depýtattar eldiń arasynan shyǵyp, halyqty tolǵandyrǵan máselelerdi kótergenin qalaımyz. Elim dep júrgen qarapaıym adamdardy da tartý kerek. Sondyqtan biz bıznesmender men olıgarhtardyń saıası sahnaǵa kelýine qarsymyz, dedi partııa jetekshisi.
Saıası qurylym eldegi ekologııalyq problemalarmen qatar, halyqtyń tabysyn arttyrý men áleýmettik máselelerdi sheshýge basymdyq berýdi kózdep otyr. Quryltaıda baılar men kedeıler arasyndaǵy alshaqtyq máselesi de kóterildi. «Qazaqstanda asa baı jáne kedeı azamattar arasynda alshaqtyq paıda boldy. Teńsizdik jónindegi dúnıejúzilik derekter bazasynan alynǵan aqparatqa sáıkes, 2021 jyly Qazaqstandaǵy eń kóp tabysy bar eresek azamattardyń 1%-y barlyq kiristerdiń 15%-yn quraǵan. Halyqtyń eń baı paıyzy baılyqtyń 30%-yn, al kedeılikte ómir súretinder tek 5%-yn quraýy baılyqty bólýdegi teńsizdikti kúsheıtip otyr», dedi partııa basshylyǵy.