Bıyl Soltústikte qar az. «Kazgıdromettiń» habarlaýyna qaraǵanda topyraq tońynyń qalyńdyǵy – byltyrǵydan 7-40 sm aralyǵynda juqa. Bul degenińiz qar erı bastaǵan ýaqytta toń ońaı jibip, aǵyn sý jerge sińedi degen sóz. Onyń ústine shaǵyn ózenderdegi sý qory da shekten tys kóp emes, qalypty jaǵdaıda. Osy jaǵdaılar sý tasqynyna jol bermeýge tıis.
Jalpy, bıylǵy qys teristikte jaıly bolyp keledi. Aýanyń temperatýrasy -20 gradýstan tómendegen kezder saýsaqpen sanarlyq qana. Ashyq dalada borandar bolyp turǵanymen eldi mekender bıyl sýyqtan da, qalyń qardan da zardap shekken joq. Aldaǵy kúnderdiń qandaı bolary, árıne, belgisiz. Bizde áli tolyq eki aı qys bar.
Oblystyq Tótenshe jaǵdaılar departamenti tabıǵattyń tosyn qylyǵyna árqashanda daıyn bolýdyń sharalaryn qarastyryp júr. Osy maqsatta jýyrda TJD bastyǵy, polkovnık Ramıl Kamalov Shal aqyn aýdanyna jumys saparymen baryp, Sergeev sý qoımasy aýmaǵyndaǵy jaǵdaıdy kózimen kórdi. Sapar barysynda ol aýdan ákimimen, aýdan prokýrorymen jáne sý tasqynyna qarsy is-sharalardy ótkizýge jaýapty laýazymdy tulǵalarmen kezdesýler ótkizdi, sý tasqyny kezeńiniń qaýipsiz ótýiniń ózekti máselelerin talqylady.
2021-2022 jyldary aýdan aýmaǵynda turǵyn úılerdi sý basýǵa jol berilmedi, adamdar men aýyl sharýashylyǵy janýarlaryn evakýasııalaý da júrgizilmedi, qurbandar men zardap shekkender de bolǵan joq. Biraq R.Kamalov báribir tótenshe jaǵdaılarǵa árqashan daıyn bolý kerektigin jetkizdi. «Bıylǵy boljamdar qaýipti emes, biraq tabıǵattyń tosyn qylyǵyna daıyn bolýymyz kerek. Halqymyz «apat aıtyp kelmeıdi» deıdi. Tek saqtanyp otyrsaq qana qapy qalmaımyz», dedi ol óziniń sózinde.
Sonyń ishinde ol jyl saıyn sý tasqynyna azdy-kóp ushyraıtyn aýdandaǵy Sergeevka qalasy, Gorodeskıı, Mergen, Aqanbaraq jáne Novopokrovka aýyldaryna erekshe nazar aýdarý qajettigin eskertti. «Osynaý sý basý qaýpi basym aımaqta shamamen 322 turǵyny bar 114 turǵyn úı bar. Osy aýmaq únemi nazarda bolýy kerek», dedi R.Kamalov.
2022 jyldyń jaz jáne kúz aılarynda jergilikti atqarýshy organdar óz qyzmetteri jáne jekemenshik kásiporyndar men sharýalardyń kúshimen tasqynǵa qarsy ınjenerlik jumystardyń josparyn oryndaý maqsatymen birshama jumystar atqarǵan. Sonyń ishinde eldi mekender men joldardyń qar sýynyń basyp qalýynan saqtaý úshin qajetti materıaldar úıilip, daıyndyq jasalǵan. Tótenshe jaǵdaılar departamentiniń basshysy osy jumystar jasalǵan birneshe aýylǵa soǵyp, daıyndyqtyń barysyn óz kózimen kórdi. Sonyń ishinde Sergeev sý qoımasynyń mańynda Esildiń jaǵasyn kóterý úshin 100 metrlik uzyndyqtyń boıyna tas qalanǵanyn tekserdi. Novopokrovka aýylynyń mańyndaǵy Kishi Torańǵul kóliniń mańyna dıametri bir metr bolatyn eki sý qubyry ornatylǵanyna kóz jetkizdi. Qar qalyń jaýǵan jyldary osy kóldiń sýy jıi tasıtyn. Sonda aǵyn sý jol tappaı Novopokrovka aýylyn, «Kókterek-Ybyraev» baǵytynyń jolyn basyp qalatyn edi. Endi úlken qubyrlarmen aqqan sý aýyldan alystap, jol taýyp ketetin boldy.
Saparyn Shal aqyn aýdanynan bastaǵan TJD bastyǵy R.Kamalov odan ári Aqjar, Aqqaıyń, Taıynsha, Tımırıazev, Esil jáne Ýálıhanov aýdandarynda birneshe kúnge jalǵastyrdy. Jergilikti atqarýshy organdar júrgizgen sý tasqynyna qarsy is-sharalardyń sapasyn tekserý barysynda birneshe usynystar berip, eldi mekenderdi tasqyn sýlardyń yqtımal qaýpinen tıimdi qorǵanýdyń joldaryn aıtty. «Biz kóktemgi kezeńniń kez kelgen ssenarııine daıyn bolyp, halyqtyń qalypty ómir súrýin qamtamasyz etýimiz kerek», dep túsindirdi departament bastyǵy.
«Saq júrseń, toq júresiń» deıdi halqymyz. Soltústikte áli qar myzǵymaı jatsa da tasqynnyń aldyn alý sharalarynyń bastalyp ketkeni kóńilge senim uıalatady. TJD baspasóz hatshysy Evgenıı Jýravlevtiń aıtýyna qaraǵanda osy aqpan aıyna tasqynǵa tosqyn barysy týraly keńester ótkizilip, tehnıkalyq quraldardyń daıyndyq barysyn tekseretin sharalar belgilenipti.
Soltústik Qazaqstan oblysy