Ádebıet te jalynan ustatpaıtyn tarpań asaý sekildi. Kez kelgen qalamgerdiń baǵyn áp-sátte asha qoımaıdy. Desek te ult rýhanııatyna nár beretin ádebıetke ózgeshe qoltańbasymen kelgen, artyna óshpeıtin mol shyǵarmashylyq mura qaldyrǵan qalamgerlerdiń qatarynda akademık Zeınolla Qabdolovtyń esimi sóz óneriniń sýretkeri retinde atalady. Ol – shákirtteri úshin óz ýaqytyn aıamaǵan, ádebıetke adaldyǵynan jańylmaǵan, adamdyq aınasyna qylaýdaı daq túsirmegen bekzat bolmysty jan.
Bilim salasynda da, qazaq rýhanııatynda da akademıktiń dárisin tyńdaǵan, ónegeli tálimin kóńilge túıgen shákirti kóp. Solardyń bári aınalasyna kún shýaǵyndaı jylylyq pen izgiliktiń sáýlesin shashqan dara ustazdy áli kúnge umytpaıdy. Sonyń dálelindeı, munaıly óńirde «Zeınolla Qabdolov: álem jáne ádebıettaný máseleleri» atty halyqaralyq ǵylymı-tájirıbelik konferensııa ótti. Oǵan elimizdegi joǵary oqý oryndary men zııaly qaýym ókilderi, qoǵam qaıratkerleri, Qyrǵyzstan men Túrkııadan kelgen ǵalymdar, akademıktiń uly Baqyt Qabdolov pen shákirtteri qatysty. Jıynǵa kelgen akademıktiń shákirtteriniń arasynda Prezıdent keńesshisi, Ulttyq ǵylym akademııasynyń akademıgi Baýyrjan Omarov, aqyn, Qazaqstan Jazýshylar odaǵy tóraǵasynyń orynbasary Baýyrjan Jaqyp, ádebıettanýshy, Ulttyq ǵylym akademııasynyń korrespondent-múshesi Amantaı Shárip jáne basqalary bar.
Atyraýda tórtinshi ret ótkizilgen konferensııa qonaqtary aldymen Zeınolla Qabdolovtyń músinine gúl shoǵyn qoıdy. Bul músin H.Dosmuhamedov atyndaǵy Atyraý ýnıversıtetiniń aldyndaǵy belgili tulǵalar alańyna qoıylǵan. Sonymen qatar bilim ordasynda ǵalymnyń ádebı tanymdyq murasyn jas urpaqqa nasıhattaý maqsatynda ataýly dárishana ashyldy.
Jańa dárishananyń lentasyn Qyrǵyz Respýblıkasy Sh.Aıtmatov atyndaǵy Til jáne ádebıet ınstıtýtynyń dırektory Abdyldajan Akmatalıev, Ál-Farabı atyndaǵy QazUÝ-dyń professory Janǵara Dádebaev, M.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov qıdy.
Bul konferensııaǵa Memleket basshysy Qasym-Jomart Toqaev quttyqtaý hatyn joldady. Ony Prezıdenttiń keńesshisi Baýyrjan Omarov oqyp berdi. «Zeınolla Qabdolov – ulaǵatty ustaz, ǵıbratty ǵalym ári kórnekti qalamger. Sulý sózdiń súleıi atanǵan jazýshy kórkem týyndylary arqyly halqynyń erekshe yqylasyna bólendi. Onyń shoqtyǵy bıik shyǵarmalary qalyń oqyrmannyń júregine jol taýyp, qazaq rýhanııatynyń altyn qoryna endi. Akademık-jazýshynyń «Ádebıet – ardyń isi» degen sózi qalamger qaýymnyń ómirlik ustanymyna aınaldy. «Qazaqtyń Qabdolovy» atanǵan birtýar tulǵanyń azamattyq bolmysy men adamgershilik qasıetteri árdaıym jastarǵa úlgi-ónege. Kórnekti ǵalymnyń taǵylymdy ómir joly, ádebı jáne ǵylymı murasy áli talaı urpaqqa rýhanı azyq bolary sózsiz. Búgingi alqaly jıynda Zeınolla Qabdolov bastaǵan ult zııalylarynyń el múddesin qorǵaý jolyndaǵy eńbekteri týraly salmaqty oılar men salıqaly tujyrymdar aıtylady dep senemin», delingen quttyqtaý hatta.
Oblys ákimi Serik Shápkenovtiń pikirinshe, Zeınolla Qabdolov – kesteli kórkemsózdiń sheberi. Onyń shyǵarmalary áli de oqylady. О́ıtkeni «Jaqsynyń aty, ǵalymnyń haty ólmeıdi». «Qazaq dalasynyń bir qıyry – Atyraýdan túlep ushqan tanymal tulǵanyń tula boıynan bekzattyq pen tektiliktiń aıqyn kórinip turatyny tamyrynyń tereńdiginen shyǵar. Zeınolla Qabdolovtyń jan sulýlýyǵy, kórkemsózdi kestelep tógetini áli kúnge eldiń jadynda saqtalyp keledi. Ol ádebıetke óz qoltańbasymen, óz izdenisimen, óz pikirimen kelgen edi. Sońǵy demi taýsylǵansha adamdar arasyndaǵy qarym-qatynastyń sypaıylyǵy men syrshyldyǵyn, adaldyǵy men rýhanı baılyǵyn shyǵarmashylyǵyna arqaý etti. Qalamyna qasıet qonǵan qalamgerdiń ulttyq qazynamyzdyń injý-marjanyn terip, qazaqtyń sóz óneriniń qadirin júregimen sezingenin ýaqyttyń ózi dáleldep berdi», dedi ol.
Konferensııada baıandama jasaǵan ǵalymdar Zeınolla Qabdolov fenomenine ár qyrynan baǵa berdi. Máselen, Qyrǵyz ǵylym akademııasynyń vıse-prezıdenti, akademık Abdyldajan Akmatalıev «Akademık Zeınolla Qabdolov jáne qyrǵyz ádebıeti», Ál-Farabı atyndaǵy QazUÝ-dyń Abaı atyndaǵy ǵylymı-zertteý ınstıtýtynyń dırektory, fılologııa ǵylymdarynyń doktory Janǵara Dádebaev «Zeınolla Qabdolovtyń leksııasy», fılologııa ǵylymdarynyń doktory Zınol-Ǵabden Bısenǵalı «Ádebıet pen ónerdegi rýh jáne Zeınolla Qabdolov tolǵamdary», M.Áýezov atyndaǵy Ádebıet jáne óner ınstıtýtynyń halyqaralyq baılanystar jáne álem ádebıeti bóliminiń meńgerýshisi Svetlana Ananeva «Vselennaıa akademıka Kabdolova: slovo ı obraz», UǴA korrespondent-múshesi, Qazaqstan Jazýshylar odaǵy basqarma tóraǵasynyń orynbasary Baýyrjan Jaqyp «Akademık-jazýshy Zeınolla Qabdolov – ultymyzdyń uly ustazy», Túrkııadaǵy Erciyes Universitesi PhD doktory Lıýtfıe Gıývensh «Z.Qabdolovtyń aqyn Nazym Hıkmetten aýdarmalary» taqyrybynda baıandama jasady.
– Zeınolla Qabdolov – san qyrly talant ıesi. Myńdaǵan shákirt tárbıeledi. Ádebıetti tereń zerttedi. Qazaq ǵylymynyń damýyna ólsheýsiz úles qosty. Jas ǵalymdardyń ǵylymı jumysyna jetekshilik etti. Sırek kezdesetin qalamgerdiń shyǵarmashylyǵyn áli de zertteı túsken jón, – deıdi Zınol-Ǵabden Bısenǵalı.
Konferensııada sóz óneriniń sýretkeri Zeınolla Qabdolovtyń jazýshylyq, ǵalymdyq, ustazdyq kelbeti jan-jaqty ashyldy deýge bolady. Akademıktiń proza janrynda, ádebıettaný ǵylymynda qaldyrǵan mol murasy áli talaı zertteýshiniń ǵylymı jumysyna arqaý bolary anyq.
Atyraý oblysy