Elordada «Respublica» partııasynyń kezekten tys alǵashqy sezi ótti. Saıası sahnaǵa endi qadam basqan jas partııa tyń josparlaryn usynyp, turǵyndardyń ystyq yqylasyna bólenýge nıetti. Bos sózden góri naqty ispen kózge túsýdi kózdegen partııa músheleri quryltaı kezinde Májilis depýtattyǵyna úmitkerlerdiń tizimin bekitti. Osylaısha, partııa atynan saılaý dodasyna 29 kandıdat túspek.
«Respublica» – memleket qyzmetiniń túrli salasyn qalpyna keltirýge umtylatyn belsendi azamattardy biriktirgen jańa partııa. Oǵan elimizdiń kásipkerleri men qoǵam qaıratkerleri tartylǵan. Basty maqsaty – árbir Qazaqstan azamaty saıası, áleýmettik jáne ekonomıkalyq ózgeristerge óziniń atsalysyp jatqanyn sezinýi úshin el saıasatyna yqpal etý tetikterin jasaý. Urany – «Jańa adamdar – jańa qadamdar».
Esterińizde bolsa, partııanyń qurylǵany týraly 2022 jyldyń tamyzynda jarııalandy. 2023 jyldyń 18 qańtarynda «Respublica» partııasy tirkeý qujattaryn qabyldady. Partııanyń 1 tóraǵasy jáne 7 teń tóraǵasy bar. Jańa partııa bolǵandyqtan, saıası qurylym jaıly az-kem qysqasha aqparat osy.
Quryltaıda «Respublica» partııasynyń teń tóraǵalary, kásipkerler Syrymbek Taý men Rýslan Berdenov partııalyq tizimder jáne bir mandatty aýmaqtyq saılaý okrýgteri boıynsha usynylǵan segizinshi márte saılanǵaly otyrǵan Parlament Májilisiniń depýtattyǵyna kandıdattardyń tizimin tanystyrdy.
– Tizimge túrli salanyń kásipkerleri, bıznes-qaýymdastyqtardyń, joǵary oqý oryndarynyń jetekshileri, sarapshylar men mamandar, uıymdastyrýshylar men ıdeologter endi. Olardyń árqaısysy – tájirıbeli, úzdik basqarýshy, naǵyz kóshbasshy azamattar. Árqaısysynyń jeke tabys tarıhy bar. Árkim myńdaǵan jumys ornyn ashady, tehnologııalardy, bıznes salasyna eń zamanaýı tásilderdi engizedi, ozyq tájirıbeni qoldanady, óz aımaqtarynda azamattardyń ómirin jaqsartady. Olardyń bilimi, tájirıbesi, kásibı qyzmet aıasy ártúrli bolýy múmkin, biraq olardyń bári bir ortaq sharýaǵa jumylýǵa daıyn. Atap aıtsaq, elimizge oń ózgeristerdi ákelýge, eski Qazaqstan ıdeıalarynan qutylýǵa umtylyp otyr, – dedi Syrymbek Taý.
Partııa tóraǵasy Aıdarbek Hodjanazarov «Respublica» partııasynyń mıssııasyna toqtaldy.
«Biz úshin bul jeńis nelikten mańyzdy? Qazaqstandyqtar elde halyq qoldaıtyn myqty, salamatty balama bar ekenin túsinýi kerek. Qazirgi júıeniń balama nusqasyn kórgisi keletinderdiń sany artyp keledi, sondyqtan árbir qazaqstandyqtyń memleket pen qoǵam ómirindegi róli men ornyna degen kózqarasyn ózgertý úshin jeńis mańyzdy. Jańa Qazaqstannyń barlyq azamattary saıası sheshimder qabyldaýǵa yqpal ete alýy kerek», dedi partııa tóraǵasy.
Jıynda saılaýaldy baǵdarlamanyń jobasy tanystyryldy. Partııanyń teń tóraǵalarynyń biri Qýanysh Shonbaıdyń aıtýynsha, baǵdarlamany ázirleý barysynda halyqty mazalaǵan negizgi máseleler nazarǵa alynǵan. «El azamattarynyń múddesi úshin zamanaýı jáne kúshti memleketti qalaı qurýǵa bolady? Bul baǵdarlama qazaqstandyqtardyń quqyǵy men múddesin qorǵaý jolyna bastamashy bolyp, Parlament Májilisinde de, oblystyq jáne qalalyq máslıhattardaǵy jumysymyzǵa da kózqarasymyzdy kórsetedi», dedi ol.
Partııanyń teń tóraǵasy Dınara Shúkijanova barlyq reforma tez arada aıtarlyqtaı nátıje kórsetýi kerek ekenin atap ótti. Ol úshin partııa tarapynan bar kúsh jumsalmaq.
«Adamdar barlyq bastama jaqsy jaqqa ózgeretinin sezinýi kerek. Reformalardyń barsha qazaqstandyqtyń múddesi úshin júrgizilýi óte mańyzdy. Soǵan saı adamdar óz partııalarynyń qajettilikterine saı áreket etetinine senimdi bolýy qajet», dedi D.Shúkijanova.
Partııanyń teń tóraǵasy Maksım Baryshev kásipkerlik salasy el ekonomıkasynyń shıkizatqa táýeldiligin azaıtýǵa kómektesetin baǵyt ekenin atap ótti.
«Biz ekonomıka salalaryna arnalǵan normatıvtik zańnamany utymdylyq, jańartý jáne tıimdilik baǵytynda qaıta qaraýdy josparlap otyrmyz. Zańdar bıznestiń damýyna kedergi bolmaı, onyń ósýin yntalandyrýy qajet. Salyq júktemesin azaıtý baǵytynda salyq zańnamasyn qaıta qaraǵan jón. Salyq salý qarapaıym, túsinikti jáne ózgerissiz bolýy kerek», dedi ol.
Sezd sońynda Aıdarbek Hodjanazarov «Respublica» partııasy joǵary tehnologııalyq ulttyq ekojúıeni qurýǵa qabiletti saıası kúsh ekenin aıtty.
«Aldaǵy jyldarda ótken qatelikterdiń barlyǵyn túzeıtin biz – naǵyz istiń adamdary, kásipkerler men patrıottar. Búgin biz aıtyp otyrǵan basty másele – eldi ózgertý úshin bızneste tabysty bolǵan tásilderdi saıasat pen memlekettik basqarýda qoldanýymyz kerek. Biz jas, órshil, jigerlimiz. Bizde óte aıqyn ustanym bar. Parlamentke engen soń, soǵan mindetti túrde qol jetkizemiz, el men halyqtyń ıgiligine qyzmet etetin zańdardy qabyldaımyz», dedi partııa tóraǵasy.