Búgin ótken Úkimettiń kezekti otyrysynda Premer-mınıstr Álıhan Smaıylov halyqtyń áleýmettik osal toptaryn turǵyn úımen qamtamasyz etý máselesin kóterdi, dep habarlaıdy Egemen.kz.
Úkimet basshysy halyqtyń áleýmettik osal toptaryn turǵyn úımen qamtamasyz etý máselelerin sheshý maqsatynda atqarylyp jatqan jumystardyń kem tustaryn atady.
«Kezekte turǵandarǵa turǵyn úıdi satý kezinde sapasyz josparlaýdy mysalǵa alýǵa bolady. Qazirdiń ózinde salynǵan turǵyn úıdi ala almaı jatqan azamattardan kóptegen shaǵymdar kelip túsedi, sebebi «Otbasy bankinde» jeńildetilgen nesıeleýge qajetti qarajat bolmaǵan. Mundaı jumys tásiline jol bermeý qajet», dedi Álıhan Smaıylov.
Jalpy, Premer-mınıstr atap ótkendeı, Qazaqstan boıynsha turǵyn úıdi paıdalanýǵa berý josparyna qol jetkizildi, alaıda 2021 jylmen salystyrǵanda ósý qarqyny aıtarlyqtaı tómendep barady. Onyń aıtýynsha, bıyl 15,3 mln sharshy metr turǵyn úı paıdalanýǵa beriledi, alaıda bul 2022 jylǵy kórsetkishten áldeqaıda tómen.
«Negizgi másele - qajetti ınfraqurylymnyń bolmaýy. Máselen, elordada ınfraqurylym men energoresýrstardyń tapshylyǵyna baılanysty aldaǵy jyldary jańa turǵyn úıdi iske qosýdyń tómengi kólemi josparlanǵan. Memleket basshysy elordany odan ári damytý máseleleri jónindegi keńeste atap ótkendeı, mundaı problemalardy sheshý úshin ınjenerlik ınfraqurylymdy júıeli josparlaý jáne keshendi damytý qajet», dep qosty Úkimet basshysy.