Qazaqstannyń ekinshi, álemniń 45-raketkasy Iýlııa Pýtınseva Birikken Arab Ámirlikteriniń Abý-Dabı qalasynda ótip jatqan «WTA 500» týrnıriniń ekinshi aınalymyna joldama aldy.
Negizgi dodaǵa irikteý saıystary arqyly qosylǵan Iý.Pýtınseva birinshi aınalymda álemniń 37-raketkasy, 2019 jylǵy AQSh ashyq birinshiliginiń («US Open») jeńimpazy kanadalyq Bıanka Andreeskýmen sheberlik baıqasty. 1 saǵat, 41 mınýtqa jalǵasqan matchta jerlesimiz qarsylasyn eki sette – 7:6 (7:2), 6:2 esebimen tize búktirip, jarystyń ekinshi kezeńine joldama aldy. Eki tennısshi buǵan deıin kortta bir márte kezdesip, ol kezde de jerlesimizdiń mereıi ústem bolǵan. 2017 jyly Bıllı Djın Kıng kýbogi aıasyndaǵy Qazaqstan – Kanada matchynda Pýtınseva qarsylasynan úsh sette – 6:4, 4:6, 6:4 esebimen basym túsken-di.
Endi Pýtınseva ekinshi aınalymda álemdik reıtıngte 14-orynda turǵan brazılııalyq Beatrıs Haddad Maııamen kezdesedi. Bul tennısshiniń aty-jóni Qazaqstannyń tennıs jankúıerlerine jaqsy tanys. Sebebi Beatrıs byltyr juptyq syndaǵy elimizdiń birinshi raketkasy Anna Danılınamen jup qurap, birtalaı dodada úzdikter qatarynan kóringen bolatyn.