«Azamattarǵa arnalǵan úkimet» memlekettik korporasııasy sıfrlyq seriktesterimen birlesip, Digital Almaty 2023 forýmynda jańa blokcheın-ónimin tanystyrdy. Endi qazaqstandyqtar Halyqqa qyzmet kórsetý ortalyqtary men notarıýsqa júginbeı-aq, jyljymaıtyn múlikti onlaın platformada satyp ala alady.
Blockchain tehnologııasy arqyly barlyq qoldanýshynyń jeke aqparatynyń qaýipsizdigi qamtamasyz etiledi. Atalǵan jobanyń nátıjesinde azamattar óz ýaqytyn únemdep, 8 saǵattyń ishinde qujattardy rásimdep, 10 mınýt ishinde úıdi tirkeı alady. Sonymen qatar bul qyzmettiń quny notarıýs qyzmetterinen áldeqaıda arzan bolady. Sondaı-aq azamattar jyljymaıtyn múlik nysanynyń ornalasqan jerine qaramastan, memlekettik qujattardy onlaın tirkeı alady.
Mámileni rásimdegen azamattar men satyp alynatyn nysannyń barlyq aqparatyn «Jyljymaıtyn múlik tirkelimi» memlekettik derekter qory tekseredi. Satyp alý-satý shartyna elektrondy sıfrlyq qoltańba arqyly qol qoıýǵa bolady. Bul mámileniń qaýipsizdigi men ashyqtyǵyn qamtamasyz etedi.
– Biz Freedom Bank-pen birlesip, jeke tulǵalar arasyndaǵy satyp alý-satý shartyn resimdeýge arnalǵan onlaın platformany ázirledik. Jańa platforma aldaǵy aıda iske qosylady. Bul júıege BI Group qurylys kompanııasy qatysady. Biz aqparattyq qaýipsizdikti qamtamasyz etý maqsatynda tirkeýshi organdar notarıýstardyń qyzmetine júginbesten, taraptardyń erik bildirýin onlaın rejimde tekserýge múmkindik beretin bıometrııalyq júıeni engizdik. Qol qoıylǵannan keıin jańa menshik ıesiniń quqyqtary «Jyljymaıtyn múlik tirkelimi» memlekettik derekter qorynda tirkeledi, – deıdi memlekettik korporasııanyń basqarma tóraǵasy Súıenish Ábdildın.
Freedom Bank dırektorlar keńesi tóraǵasynyń keńesshisi Aıdos Jumaǵulovtyń aıtýynsha, bank 2021 jyly turǵyn úıdi ıpotekaǵa alýdyń júıesin 90 paıyzǵa sıfrlandyrdy. Biraq mámileni jasasýdyń sońǵy kezeńi – notarıýsta shartqa qol qoıý júıesi ázirlenbegen bolatyn.
– Memlekettik servıstermen ıntegrasııalaý jáne memlekettik korporasııamen qurylǵan yntymaqtastyqtyń nátıjesinde biz qujattardy 100 paıyz onlaın-resimdeýge múmkindik beretin blokcheın-platformasyn qurdyq. Osy platformanyń kómegimen jeke tulǵalar jyljymaıtyn múlikti bıometrııa men beınesáıkestendirýden ótkennen keıin, elektrondyq formatta ashyq jáne qaýipsiz mámileler jasaı alady, – deıdi ol.
Buryn bul júıe tek B2C formatynda qoljetimdi bolsa, qazir S2S formatynda, ıaǵnı deldaldarsyz jeke tulǵalar arasynda tikeleı satýǵa múmkindik beretin júıege aýysty.