ASTANA. 18 maýsym. Keshe túnde Brazılııanyń Belý-Orızontı qalasynda chempıonattyń N tobynda Belgııa – Aljır quramalary kezdesip, nátıjesinde bulardyń aldyńǵylary 2:1 esebimen jeńiske jetti. Bul týraly egemen.kz habarlady.
Belgııa – Aljır 2:1 (0:1)
17 maýsym. Belý-Orızontı. Stadıon «Mıneıran» stadıony. 56 800 kórermen. Tóreshi - Marko Rodrıges (Meksıka).
Belgııa: Tıbo Kýrtýa, Tobı Aldverveıreld, Danıel van Bıýıten, Vensan Kompanı, Iаn Vertongen, Aksel Vıtsel, Mýssa Dembele (Marýan Fellaını, 65), Naser Shadlı (Drıs Mertens, 46), Kevın de Brıýıne, Eden Azar, Romalý Lýkaký (Dıvok Orıgı, 58).
Aljır: Raıs Mbolı, Mehdı Mostefa, Madjıd Býgerra, Rafık Allısh, Faýzı Gýlıam, Safır Taıder, Karl Medjanı (Nabıl Gılas, 84), Nabıl Bentaleb, Sofıan Fegýlı, Rııad Mahrez (Mehdı Lasen, 71), El-Arabı Sýdanı (Islam Slımanı, 66).
Goldar: Sofıan Fegýlı (25-penaltı), Marýan Fellaını (70), Drıs Mertens (80).
Eskertýler: Iаn Vertongen (24) – Nabıl Bentaleb (34).
Iá, osy matchpen birge týrnırdiń eń sońǵy N tobyndaǵy oıyndar da sóreden shyqty. Ony Belgııa jáne Aljır bastap berdi. Bulardan keıin alańǵa osy kvarttegi Reseı – Ońtústik Koreıa komandalary shyqty. Al aldyńǵy kezdesý reseılikterdiń bas jattyqtyrýshysy Fabıo Kapello úshin de oı tolǵatar biraz materıal berip ketken sııaqty. Oıynnyń eki taımy eki túrli kórinis kórsetti. Olardyń birinshisinde «qyzyl periler» ózderine tańylǵan tórttik kósh lıderi degen mártebesin aqtaı qoıǵan joq. Belgııalyqtar birinshi 45 mınýtta Aksel Vıtseldiń alystan bir soqqy jasaýy men Naser Shadlıdiń qaqpa aldyndaǵy qolaıly sátinen ózge este qalatyn eshteńe jasaı almady. Buǵan kerisinshe, «ekinshi nómirmen» oınaǵan Aljır árbir yńǵaıly mezetti tıimdi paıdalanyp, qarsy shabýylǵa jıi shyǵyp turdy. Onyń osyndaı árbir joryǵy derlik qaýipti qımyldarǵa ulasyp jatty. Solardyń 25-mınýtta oryn alǵan máýriti oıyndaǵy alǵashqy golǵa alyp bardy. Afrıkalyqtar shabýylshysy Sofıan Fegýlı qarsy qaqpa alańyna aryndap kirgen kezinde omaqasa qulatyldy. Qataldyǵymen aty tanylǵan meksıkalyq tóreshi Marko Rodrıges oılanbastan 11 metrlik núkteni nusqady. Al aljırlikti qolynan tartyp qulatqan Iаn Vertongen «sary qaǵazben» jazalandy. Penaltıdi zardap shegýshiniń ózi dál uryp túsirdi. Esep – 1:0. Alaıda, osy goldan keıin «shóldiń túlkileri» belsendi oıyndaryn toqtatty.
Mark Vılmotstyń jigitteri ekinshi taımnyń basynda oıynnyń shemasy men taktıkasyn kúrt ózgertti. Sonyń nátıjesinde alańda múlde jańa komanda oınap júrgendeı áser qaldyrdy. Aldyńǵy sheptegi Drıs Mertens, Dıvok Orıgı jáne Marýan Fellaını quramaǵa birinshi taımda kórinbegen oıynnyń úlgisin tanytty. Olardyń birte-birte ulǵaıa túsken qysymy Aljır quramasy qorǵanys shebiniń tutastyǵyn setinete berdi. Aqyrynda Kevın de Brıýıneniń áýeletip bergen dobyn ádemi paıdalana bilgen Fellaını basymen soqqy jasap, esepti teńestirýge qol jetkizdi. Arada 10 mınýt ótkende belgııalyqtar alǵa da shyqty. Bul joly Eden Azardyń pasynan gol salǵan Mertens erledi. Osylaısha úlken týrnırlerde tájirıbe jınap úlgermegen Belgııanyń qazirgi jas quramy bir matchtyń aıasynda eki t túrli ahýaldy bastan keship, onyń aqyryn óziniń paıdasyna sheshe bildi.
Damır Qojamqul.
Derekkóz: Chempıonat.Rý.
Foto: Sportbox.ru.