Pavlodarda tramvaı parkiniń damýyna basymdyq berilip otyr. Ekologııalyq jaǵynan qaýipsiz ári qaladaǵy jolaýshylar qozǵalysyn tıimdi etýde relsti kólik búginde eń qolaıly sanalady. Qazir kásiporynda jańa vagondar satyp alýdyń jospary jasalyp jatyr. Buǵan qosa, aldaǵy jyldary qalanyń shetki yqsham aýdandarynyń biri – Ekinshi Pavlodarǵa deıin relsti jol tartylmaq.
Qazaqstan boıynsha tramvaı sanaýly ǵana shaharda saqtalyp qalǵanyn aıtý kerek. Memleket basshysy Qasym-Jomart Toqaev byltyr qazan aıynda óńirimizge jumys saparymen kelgende Pavlodar qalasyndaǵy tramvaı júıesin damytýdy jalǵastyryp, quramdardy jańartýdy jedeldetý qajettigin tapsyrǵan edi.
«Pavlodar – tramvaı júretin sırek qalanyń biri. Almatyda travmaı júrdi, eshkimge kedergi keltirmedi, biraq ony qaladan alyp tastaý týraly sheshim qabyldady. Aýqymdy jumys júrgizildi, relster joıyldy, endi Almaty tramvaısyz qaldy. Tramvaı qalanyń sımvoly bolǵanyn atap ótý kerek. Menińshe, Pavlodarda tramvaıdy saqtap qalý qajet. Eger qajet bolsa, joldardy jańǵyrtyp, jańa, dybyssyz, tramvaılar satyp alý kerek shyǵar. Biraq travmaı – ózinshe tartymdy kólik túri. Eýropanyń kóptegen damyǵan qalasynda tramvaılar kedergisiz júredi. Bul – jergilikti turǵyndar unatatyn ekologııalyq jáne yńǵaıly kólik. Tramvaı júıesin damytýdy jalǵastyryp, quramdardy jańartýdy jedeldetý kerek», degen edi Prezıdent aımaq jurtshylyǵymen kezdesýinde.
Oblys basshylyǵy Prezıdent tapsyrmasyna sáıkes, tramvaı joldaryn Ekinshi Pavlodar men Dostyq shaǵyn aýdanyna deıin uzartý múmkindigin qarastyryp jatyr. О́ńir ákimi Asaıyn Baıhanovtyń aıtýynsha, relsti joldardy, kabeldik jáne baılanys jelilerin, tartqysh qosalqy stansalardy jóndeý jumystary jalǵasýda. Byltyr oblys ortalyǵynda 8 tramvaı ótkeli jóndelgenine kýámiz. Bıyl jaz-kúz mezgilinde taǵy sol shamada ótkelder jańarady dep kútilip otyr.
Kásiporyndaǵy tramvaı vagondarynyń eskirip bara jatqany da ras. Búginde qolda bar 111 vagonnyń tek 30-ynyń ǵana normatıvtik paıdalaný merzimi aıaqtalǵan joq. Jalpy sany 70-ke jýyq tramvaı jańartýdy qajet etedi. Osyny negizge alǵan A.Baıhanov tramvaı basqarmasyna jańa vagondar satyp alý jáne qarjylandyrý kózderin tańdaý boıynsha usynystar berýdi tapsyrdy.
«Tramvaı basqarmasy» AQ basqarma tóraǵasy Mýslım Mahmýdovtyń aqparynsha, búginde eńbek uıymynda 633 adam jumys isteıdi. Jalpy, kásiporynnyń jaǵdaıy jaqsy deýge turarlyq. Kásiporynda ýaqyt saıyn tehnıkalyq turǵydan jańarý jumystary qolǵa alynyp, jol qıylystaryndaǵy ótpelerge, energııa sharýashylyǵy qyzmetindegi turmystyq úı-jaılarǵa jóndeý júrgizildi. №2 jáne 3 tartqysh qosalqy stansalarǵa jańa telebasqarý engizilip, qosymsha qural-jabdyqtar aýystyrylǵan.
– Mańyzdy máseleniń biri – ınfraqurylym men jyljymaly quramnyń tozýy. Qala ishindegi tramvaı joldarynyń uzyndyǵy 90 shaqyrym bolsa, onyń 87 shaqyrymy tozýǵa jaqyn. Relsterdi kezeń-kezeńimen jańartyp otyramyz. Birneshe jyl buryn biz jańa vagondar satyp alýmen aınalyssaq, endi eski relsterdi jóndeýge kirisemiz. Deı turǵanmen, keıingi ýaqytta kadr jetispeýshiligine tap bolyp otyrmyz. Negizinen qatardaǵy jumysshy mamandyqtar boıynsha jetispeýshilik bar. Mysaly, elektromonterler, elektr slesarlary, tramvaı júrgizýshileri jáne t.b. Qazir jastar bul mamandyqtarǵa qyzyǵýshylyq tanytpaıdy, sondyqtan ózgedeı sheshimderdi izdeýge týra keledi. Áleýmettik jelilerde, tramvaı basqarmasynyń resmı akkaýntynda bos jumys oryndaryn turaqty jarııalap kelemiz. Jumyspen qamtý organdarymen turaqty baılanystamyz. Qazirgi kúni kásiporyn boıynsha shamamen 60 jumys orny bos tur, – deıdi uıym jetekshisi.
Aıtpaqshy, elektrondy jolaqysy Pavlodardaǵy tramvaı kondýktorlarynyń bir bóligin jumyssyz qaldyrýy múmkin. Tramvaı basqarmasy aldaǵy aıdan bastap kondýktor laýazymdaryn joıyp, baqylaýshylar sanyn arttyrýdy maqsat etip otyr. Búginde munda 125 kondýktor men 13 baqylaýshy eńbek etedi eken.
«О́zderińizge belgili, búgingi tańda qoǵamdyq kólik salasynda eleýli ózgerister oryn alyp jatyr. Solardyń biri – elektrondy bıletteýdi engizý. О́zge tasymaldaýshylar sııaqty biz de osy ózgeristi bastan ótkerip jatyrmyz. Jańashyldyq engizilgeli beri kondýktorlarǵa degen suranys azaıa bastady. Kondýktor laýazymy qysqarady, biraq sonymen birge baqylaýshylardyń shtattyq sany artady. Barlyq kondýktormen áńgime júrgizildi. Olardyń keıbireýi – zeınet jasyndaǵy adamdar. Bul qyzmetkerler basqa jumysqa aýysqysy keletinin nemese jumystan qol úzetinin málim etti. Al kópshiligi tramvaı ákimshiliginde baqylaýshy retinde qalýǵa kelisim berdi», deıdi M.Mahmýdov.
Tramvaı basqarmasyndaǵy ortasha jalaqy búginde 250 myń teńgeni quraıtynyn aıtyp óteıik. Bıyl mundaǵy qyzmetkerlerdiń eńbekaqysyn kezeń-kezeńimen 40 paıyzǵa ósirý jóninde sheshim qabyldanyp otyr.
PAVLODAR