Belgili bloger, Ońtústiktiń týmasy Rysbala Ikrambaı elýinshi úıdiń kiltin Shymkent qalasy Qazyǵurt shaǵyn aýdanynyń turǵyny, 8 balanyń anasy Perızat Momynqulovaǵa tabystady. Jaqynda jarynan aıyrylǵan ol jaldamaly páterde turyp kelgen. Taǵdyr tálkegine ushyraǵan 36 jastaǵy kelinshekti qalyń qazaq kóshede qaldyrmady. Kúıeýiniń 40 kúndik asyn qaıda ótkizemin dep júrgen anaǵa Qazyǵurt eldi mekeninen baspana buıyrdy.
– Bul óńim emes, túsim sııaqty. Áli de sener-senbesimdi bilmeımin. Shynymdy aıtsam, sózben aıtyp jetkize almaımyn. Áýeli Alla, sosyn myna bizdi qoldaǵan halqyma kópten-kóp rahmet. Rysbala jáne onyń oqyrmandaryna, Qazaq eliniń janashyr jandaryna alǵysym sheksiz. Basymdy ıip alǵys aıtamyn, – dedi P.Momynqulova.
Al saýapty is jasap júrgen R.Ikrambaı 2020 jyly turmys taýqymetin keshken bir jandy halyqtyń kómegimen baspanaly etken edi. Sodan beri turmysy tómen, qıyn taǵdyrdy bastan keship, shıetteı bala-shaǵasymen páter jaǵalaǵan talaı otbasyn qýanyshqa bólep, halyqtyń aq batasyn alyp keledi. Árıne, munyń bári – halyqtyń kómegimen jasalyp jatqan ıgi is.
Qazir ózderin «Yrysty armııasy» dep ataıtyn Rysbala jáne onyń oqyrmandary jarynan aıyrylǵan analar men ákelerge úı alyp beretin bolǵan. Sonyń nátıjesinde qoǵamda qaıyrymdy jandar kóbeıip jatyr. Osy ýaqytqa deıin Almaty qalasy jáne oblysynan 33 úı, Shymkent qalasynan 4 úı, Túrkistan oblysynan 7 úı, Túrkistan qalasynan 2 úı, Tarazdan 4 úı satyp áperýge járdemdesti. Sonymen qatar erekshe balalardyń da emine qarajat jınaýǵa qol ushyn sozyp, kópbalaly az qamtylǵan otbasylarǵa azyq-túlik úlestirip, kómektesip jatyr. Osy salıqaly amaly úshin de ol Aqparat jáne qoǵamdyq damý mınıstrligi uıymdastyrǵan «Jyl volonteri-2022» halyqaralyq syılyǵynyń «Belsendi volonterlik qyzmeti» úshin atalymyn jeńip aldy.
– «Jalǵyzdyń úni shyqpas, jaıaýdyń shańy shyqpas» degendeı, jalǵyz ózimniń qolymnan eshteńe kelmeıdi. Bul – qalyń qazaqtyń bir-birine degen janashyrlyǵy men kómeginiń arqasy. Halqymnyń qonaqjaılylyǵy, baýyrmaldyǵy sondaı, úımen birge kerekti turmystyq zattar men jıhazdaryna deıin áperýge daıyn turady. Sol úshin qaıyrymdylyq dese qoldan kelgenshe kómek berýge tyrysatyn aǵaıynǵa shyn rızamyn, – dedi R.Ikrambaı.
Sondaı-aq ol ıgi bastamaǵa qoldaý bildirýshilerdiń kóp bolýyna áleýmettik jeliniń oń áseri tıip jatqanyn aıtty. Áleýmettik jeli búginde tek baılanys quraly ǵana emes, sonymen birge muqtaj jandar men halyq arasyndaǵy «altyn kópir» rólin atqaryp otyr. Sonymen birge áleýmettik jeliniń kómegimen adamdar halyqtyń járdemine shynymen zárý jandardy bilýge, olarmen baılanysýǵa múmkindik aldy.
Aıta ketý kerek, áleýmettik jeli belsendisi bastaǵan «Yrysty armııasy» 30 qańtar kúni Ordabasy aýdany Temirlan eldi mekeniniń turǵyny, tórt balaly jalǵyzilikti áke Ǵabıt Qurmanbekovke 49-baspanany satyp áperse, 50-úıdiń kilti, joǵaryda aıtqanymyzdaı, kópbalaly ana Perızat Momynqulovaǵa buıyrdy.
Shymkent