Keshe elordadaǵy «Qazaq eli» alańynda Astana qalasy ákimi Imanǵalı Tasmaǵambetov Ulttyq biryńǵaı testileý qorytyndysy boıynsha ózderiniń bilimin dáleldegen 92 «Altyn belgi» ıegerlerine arnaıy tósbelgilerin saltanatty túrde tabys etti. Sóıtip, bas shahar ákimi jyldaǵy dástúr boıynsha jas túlekterge aq jol tiledi.
«Búgin jyldaǵy ıgi dástúrmen Astananyń ashyq aspany astynda, elimizdiń eń basty alańynda elorda jastarynyń taǵy bir jańa tolqynynyń er jetip, eseıgen sátine kýá bolyp otyrmyz. Uly Abaı balany oqytýǵa árkim qushtar, dese de ol bir arman qoldan ushqan dep tebirengen eken. Rasynda da, búgingideı saýatty urpaq tárbıeleý keshegi ata-babanyń san ǵasyrlyq ańsary edi. Endi, mine, bizdiń urpaq úshin bul – taǵdyrdyń bergen baǵasyz múmkindigi, táýelsiz memleketimizdiń mártebeli mindeti. Sondyqtan da búgingi zaman balany qaıda oqytamyn degen armannan emes, qaıda oqytamyn degen tańdaýdan turady. Osy kúni bul tańdaý elimizdiń bas qalasynda Elbasynyń ósıetimen bilim alyp, tálim jıǵan, tárbıe kórip, arman qýǵan ul-qyzdarymyzdyń aldynda tur», – dedi I.Tasmaǵambetov.
«Oqýshynyń bilim nátıjesi baǵasynan kórinedi. Al onyń biregeı kórsetkishi – «Altyn belgi». Atap aıtý kerek, osydan 16 jyl buryn Astanada bul tósbelgini tek 1 ǵana oqýshy ıelense, bıyl 91 bala «Altyn belgi» taǵyp, aqjoltaı úmitti aqtap shyqty. Al jalpy, kúni keshe ótken UBT-ny qalamyzdyń uzyn sany 3252 oqýshysy tapsyryp, 1081 bala 100-den joǵary ball jınady. Munyń ózi – úlken kórsetkish, zor maqtanysh. Ardaqty jastar, sizder kórsetken bul jetistik – ózderińizden keıingi ini-qaryndastaryńyzdyń yntasyn oıatyp, «men astanalyq oqýshymyn» degen sezimine serpin beretin úlken úlgi, maqtan tutar ónege. Munyń ózi – sizder ótken ómirdiń alǵashqy mejesi, al endigi taǵdyr – tek óz qoldaryńyzda. Dese de, zaıyrly ómir úzdiksiz talap, talpynys pen umtylystan, úırený men izdenýden, jańarý men jańǵyrýdan turady. Bul árbirińiz únemi este ustaıtyn urandy aqıqat. Men sizderdiń álemniń ozyq kóshinen qalmaı, ýaqyttyń talabynan talmaı, talaı tabystyń bıiginen kórinetinderińe kámil senimdimin. О́ıtkeni, sizderdiń boılaryńyzda Astananyń asqaq rýhy men júrekterińizde Elbasy jaqqan jalyny bar. Osyny esten shyǵarmańyzdar. Olaı bolsa, osynaý qýanyshty kúni barshańyzǵa tek sáttilik tileımin. О́mir joldaryńyz jaryq bolǵaı!» – deı kele, ár túlekke óz qolymen tósbelgi tabys etti. Bul qurmetke aldymen 124 ball jınaǵan úsh túlek ıe boldy. Olar: №48 mektep-lıseıden Ǵaını Dúkenqyzy Másimhan men Nazgúl Esen jáne №54 mektep-lıseıden Aıajan Satenova bolyp shyqty.
Endigi jerde eńbekpen alǵa umtylyp, qalaǵan jetistikke adal eńbek arqyly jetýdi taǵy bir ret qaıtalap ótken Astana qalasynyń ákimine jas túlekter alańsyz bilim alyp, alǵashqy jetistikterine qol jetkizýge múmkindik bergen ata-analaryna, ustazdary men qala basshysyna, Elbasy N.Nazarbaevqa alǵysyn jetkizdi.
2013-2014 oqý jylynda Astana qalasyndaǵy mektepterdiń 4042 oqýshysy jas túlek atanǵan. Olardyń 80,5 paıyzy UBT-ǵa jiberilip, jalpy bilim beretin pánder boıynsha qorytyndy emtıhandy 790 oqýshy tapsyrǵan. Al bıylǵy jyldyń ortasha baldyq kórsetkishi – 87,58 paıyzdy quraǵan. Sonymen qatar, 362 oqýshy AQSh, Brazılııa, Gollandııa, Grýzııa, Indonezııa, Reseı, Túrkııa, Qytaı, Kıpr, Koreıa, Úndi memleketterinde ótken halyqaralyq olımpıadalar men ǵylymı jobalar baıqaýyna qatysyp, 234 medal ıelenipti. 158 oqýshy jalpy orta bilim pánderi boıynsha respýblıkalyq ǵylymı jobalar baıqaýy men olımpıadalarǵa qatysqan. 85 qatysýshy júldeger atanyp, medaldarmen marapattalǵan. Respýblıkalyq olımpıada men ǵylymı jobalar baıqaýynda Astana qalasynyń komandasy 7 jyl qatarynan jalpykomandalyq esepte I orynǵa ıe bolyp, respýblıka boıynsha «úzdik komanda» atanǵan.
Úkili úmitti, úlbirep turǵan jastarǵa qarasań kóz toımaıdy. Qyzyǵa ári qýana qaraısyń. Sen tur, men ataıyn dep, jalyndap turǵan sulý da symbatty jastarǵa qarap turyp, erteńgi bolashaqqa degen senimiń kúsheıe túskendeı. Maǵjan aqyn aıtqan arystandaı aıbatty, jolbarystaı qaıratty, qyrandaı kúshti qanaty bar elordalyq túlekterge biz de aq jol tileımiz!
Venera TÚGELBAI,
«Egemen Qazaqstan».