Baletmeısterdi eske aldy

Urpaqtar sabaqtastyǵy jalǵasqanda óneri máńgi ósh­peıdi deımiz. Tursynbek Nur­qalıev qazaqstandyq ár­tis­terdiń tutas shoǵyryn tár­bıelep, kásibı tájirıbesin ós­keleń urpaqqa sińirdi. Olar­dyń qatarynda qazaq­stan­dyq ónerdi elimizde jáne shet­elderde áıgilep júrgen bı­shiler – Qazaqstannyń eńbek sińirgen qaıratkerleri Mádına О́nerbaeva, Áıgerim Beketaeva, Ánel Rústemova, Baqtııar Adamjan, Erkin Rahmatýllaev, kóptegen halyqaralyq baı­qaý­dyń laýreattary Ásel Sháı­kenova, Arman Orazov, Se­­rik Naqyspekov, Da­nııar Ju­­mataev, Baýyrjan Me­kem­baev­tar bar. Eske alý ke­shin­de talantty tulǵanyń kózin kór­gen, tálimin alǵan kópshilik oı-pikirlerimen bólisti.

Aıta keteıik, Tursynbek Nurqalıevtiń óziniń aıryqsha máneri bolatyn. Sondyqtan onyń jubaıy, Qazaqstannyń eńbek sińirgen qaıratkeri Ǵa­lııa Bóribaeva konsert baǵ­darlamasyn áıgili balet­meısterdiń jumys isteý qa­ǵı­daty boıynsha qurdy. M.Hegertıdiń «Hıkaıa», G.Fo­reniń «Pavana», D.Shosta­kovıchtiń «Jol» sekildi ho­reo­grafııalyq kompozısııalary, S.Prokofevtiń «Ro­meo men Djýletta» ba­le­tinen dýet, K.Glıýktiń tany­mal «Melodııa» dýeti baǵdar­lamanyń sánin keltirdi. Sondaı-aq balet keshinde P.Chaıkovskııdiń «Uıqydaǵy arý», «Shelkýnchık», L.Mın­kýstyń «Don Kıhot» balet­terinen nómirler, B.Asafevtiń «Baqshasaraı burqaǵy» ba­letinen «Romans» pen «Tatar bıi» aýqymdy nómiri, K.Sen-Sanstyń «О́lim aldyndaǵy aqqý», A.Hachatýrıannyń «Spar­tak», V.Solovev-Sedoıdyń «Gopak» jáne taǵy basqalar oryndaldy.

– Tursynbek Ábdibaıuly tek basshy, ustaz ǵana emes, ol balet ártisteriniń barlyǵyna qamqor áke boldy. Aldyna kó­mek surap kelgen árbir janǵa qolushyn berip, baletpen aınalysyp júrgen jas­tardyń tek teatrda ǵana emes, odan tys jerlerde de óz­derin jaıly sezinýine qol­dan kelgenniń bárin jasady. Ol elordanyń qalyptasý kezeńinde kúrdeli jaǵdaılarda jumys isteýge kelisken sanaý­ly azamattardyń biri boldy. Ártistermen birge jataqhanada turdy. Onyń qaltqysyz eńbek etýiniń nátıjesinde Astanada akademııalyq balet paıda boldy, – dep eske aldy Baqtııar Adamjan.