Qoly bostyq, qarny toqtyq adamdy azdyrar bolsa, buǵanasy bekimegen bala úshin bul qazir tipti qaýipti. Internet keńistiktegi tolassyz aǵylǵan aqparattyń aǵy men qarasyn aıyra almaı, jetkinshekterdiń arbalyp, aldanyp qalatyny – osy bos ýaqytynyń nazardan tys qalýynda. Sondyqtan da memleket qazirgi kezde balanyń ýaqyty zaıa ketpeýi úshin tegin úıirme, seksııalarǵa den qoıǵany málim.
Osy oraıda Qaraǵandy oblysynda tegin úıirme men seksııalar myńdaǵan balanyń baby men baǵyn synaýǵa múmkindik berip keledi. Máselen, Qaraǵandy aımaǵynda bıyl balalardyń tegin sport seksııalaryna 2 mlrd 164 mln teńge qarjy bólindi.
Qaraǵandy qalasyndaǵy «Sportıka» fıtnes-klýbynda júzý, hokkeı, dzıýdo jáne bı úıirmeleri bar. Klýb jetekshileriniń aıtýynsha, Artsport baǵdarlamasy iske qosylǵanǵa deıin barlyq seksııaǵa qatysýshylardyń uzyn sany 170 adam shamasynda bolypty. Keıin baǵdarlama negizinde memlekettik qarjylandyrýdan soń klýbta júzýge kelgen bala sany 527-ge jetken eken.
– Qazir júzýge – 527, hokkeıge – 271, bıge – 15, dzıýdoǵa 17 adam keledi. Bári – tegin. Hokkeıshilerimizdiń nátıjeleri kóńil kónshitedi. Olar – Qazaqstan chempıonattarynyń júldegerleri. Sondaı-aq basshylyqtyń bastamasymen bizde 10 erekshe bala tegin jattyǵady, – deıdi fıtnes-klýb ákimshisi Iýlııa Ýlıanova.
Baýyrjan Qasymovtyń shahmat akademııasy da jas shahmatshylardyń basyn qosqan. Munda Artsport baǵdarlamasy jáne aqyly negizde shahmat sabaqtary ótedi. Buǵan deıin mekteptiń úsh fılıalynda 200 adam dáris alǵan kórinedi. Qazir olardyń qatary myńdap sanalady.
– Al Artsport boıynsha jumys isteı bastaǵannan beri oqýshylar sany myńnan asty. Bul baǵdarlamaǵa deıin kóptegen bala seksııa, úıirmege qatysa almaı kelgeni belgili. О́ıtkeni onyń bári aqyly edi. Qazir bizde 500-700-ge jýyq adam – kezekte. Bizden jalpy 5 myńnan asa adam oqyp shyqty. Bes jyl qatarynan akademııa Qaraǵandy oblysynyń eń myqty mektebi retinde tanymal. Bizdiń tárbıelenýshilerimiz – respýblıkalyq, halyqaralyq jarystardyń jeńimpazdary men júldegerleri, Álem chempıonattarynyń qatysýshylary. Baǵdarlama kómegimen biz Suryptaý, Prıshahtınsk jáne seriktes qalalarda fılıaldar ashýdy josparlap otyrmyz, – deıdi shahmat akademııasynyń bas bapkeri jáne onyń negizin qalaýshy B.Qasymov.
«Amanat» fýtbol klýbyndaǵy balanyń sany da ósken. Buryn sanaýly bala kelse, búl kúni 220 adam tegin jatyǵyp júr.
– Biz de aldymen, aqyly negizde jumys istedik. Ol ýaqytta yqylas bildirgen bala az. Topta barlyǵy 10 balaǵa deıin ǵana bolatyn. Bes jattyqtyrýshy jumys istedi. Jan basyna qarjylandyrý baǵdarlamasy arqyly balalar men jattyqtyrýshylar sany kóbeıdi. Qazir bizde vaýcherler boıynsha 13 topta 220 adam tegin jattyǵady. Sondaı-aq 20-ǵa jýyq bala mekteptiń bastamasymen tegin aınalysady, olardyń 10-y – kóp balaly otbasynan, – deıdi fýtbol mektebiniń jetekshisi Andreı Mıronov.
Sport seksııalaryn uıymdastyrýǵa óńirde Qaraǵandy, Temirtaý, Balqash, Qarqaraly, Shahtınsk, Saran, Buqar jyraý, Osakarov, Abaı jáne Shet aýdandarynan 48 sport qyzmetin usynýshylar jumyldyrylyp otyr.
Qaraǵandy oblysy