Olımpıadaǵa daıyndyq barysy

Jıyn barysynda taraptar kelesi jyldyń 26 shildesi men 11 tamyzy aralyǵynda Fransııanyń bas shahary – Parıjde ótetin XXXIII jazǵy Olımpııa oıyndaryna Qazaqstan sportshylarynyń qatysýyn talqylady. Kún tár­tibinde uıymdastyrýshylyq sát­ter, onyń ishinde Qazaqstan delegasııalaryn jáne sportshylar­dy ornalastyrý, olardy kólikpen qamtamasyz etý, sondaı-aq sport­shylardyń jattyǵý jıyndaryn ót­kizetin oryndaryn naqtylaý jáne taǵy basqa máseleler sóz boldy.

«Parıjdegi Olımpııa oıyndary buǵan deıingi dodalarǵa qara­ǵanda erekshe jaǵdaıda ótpek. Sondyqtan kelesi jyly bizdi óte qyzyqty Olımpıada kútip tur dep nyq senimmen aıta alamyn. Onyń ishinde Sena ózeniniń jaǵalaýyndaǵy jarystyń resmı ashylý saltanaty da qyzyq oqıǵalarǵa toly bolmaq. Parıj­degi tórtjyldyqtyń basty dodasy Tokıo men Beıjińde ótken jazǵy jáne qysqy Olımpıadalar kezinde bárimiz tap bolǵan qıyn­dyq­tarǵa qaramastan, bir­qa­tar jańashyldyq engizip otyr. Oıyndardy joǵary deń­geıde uıymdastyrýǵa bar kúsh-ji­gerin salyp jatqan 1 200-den asa adamnan turatyn ko­man­da­nyń úılesimdi jumysy úshin bú­kil Uıymdastyrý komı­tetine alǵysymdy bildiremin», dedi Qazaqstan UOK Bas hatshysy Andreı Krıýkov.

Sondaı-aq Parıj Olımpıa­dasynyń uıymdastyrý komı­tetiniń basshysy Tonı Es­tange Qazaqstan UOK-nyń Uıymdas­tyrý komıtetimen ózara is-qı­mylyn joǵary baǵalap, yn­ty­maqtastyq úshin alǵysyn bil­dirdi.

Aıta keteıik, 2024 jylǵy jazǵy Olımpıada jáne Par­alım­pıadanyń uıymdastyrý komı­teti (Paris 2024) – Halyq­aralyq Olım­pıada komıteti (HOK), Ulttyq Olımpıada jáne sport komıteti qol qoıǵan Tórt­jyldyqtyń bas­ty dodasyn uıymdastyrýshy qala týraly shartqa sáıkes 2024 jylǵy Parıjdegi Olımpıada jáne Par­­alımpıadany josparlaýǵa, uıymdastyrýǵa, qarjylandyrýǵa jáne ótkizýge jaýapty resmı organ sanalady.

Sondaı-aq Halyqaralyq Olımpıada komıteti óziniń resmı saıtynda 2024 jyly Koreıanyń Kanvondo qalasynda jalaýy jelbireıtin jasóspirimder ara­syndaǵy qysqy Olımpıadaǵa ar­nalǵan úzdik medal dızaıny baıqaýynyń bastalǵanyn jarııa­lady.

Álemniń túkpir-túkpirindegi shyǵarmashylyq aqyl-oı ıeleri men kreatıv sheberlerine Olım­pıada tarıhynyń bir bó­ligine aınalýǵa zor múmkindik týyp tur. О́ıt­keni ár tórt jylda bir ret uıym­dastyrylatyn Jas­­ós­pirim­der olımpıadasy me­daliniń úzdik dı­zaınyna ar­nalǵan baıqaý qaıta bastaldy.

Uıymdastyrýshylar baı­qaýǵa qatysýǵa dızaınerlik tájirı­besiniń deńgeıine jáne jas shek­teýine qaramastan, álemniń túkpir-túkpirindegi kez kelgen avtorǵa óz týyndysyn usynýǵa múmkindik berip otyr. Olar jumystaryn 2023 jyldyń 8 naýryzyna deıin konkýrstyń arnaıy veb-saıty arqyly jibere aldy. Al jeńimpaz dızaın naýryz aıynyń sońynda tańdalady.

Halyqaralyq Olımpıada ko­mıtetine múshe jas reporterler, 2024 jylǵy Oıyndardyń ókilderi, HOK-tiń jas kóshbasshylary jáne Olımpıadalyq sýretshi­ler baǵdarlamasynyń qatysýshy­larynan turatyn qazylar alqasy úzdik úsh dızaındy daýys berý arqyly tańdap alady.

Eń úzdik dep tanylǵan jumys­tyń ıesine uıymdastyrýshylar tarapynan 2024 jylǵy Jas­óspirimder olımpıadasyn tamashalaý úshin eki adamǵa Koreıaǵa bılet (barýy men qaıtýyna), jarystyń ashylý saltanaty men sporttyq is-sharalaryna qa­tysýǵa múmkindik beriledi. Al ekin­shi jáne úshinshi oryn alǵan jumystarǵa arnaıy syılyqtar tapsyrylady.

Aıta keteıik, qysqy Jas­óspi­rimder olımpıadasy 2024 jyldyń 19 qańtar men 1 aqpan aralyǵynda Koreıada ótedi.