Elimizdiń TJM qutqarýshylarynyń taǵy bir borty joıqyn jer silkinisiniń saldaryn joıýǵa kómek kórsetý úshin Túrkııaǵa attandy. Tıisti tapsyrmany Prezıdent Qasym-Jomart Toqaev bergenin barsha jurt biledi.
Túrkııadaǵy jer silkinisiniń saldaryn joıýǵa attanǵan ekinshi eshelon quramynda 8 aqmolalyq qutqarýshy da bar. Qutqarýshylar barlyq qajetti quraldarmen jáne kerek-jaraqtarmen jabdyqtalǵan. О́ńir TJD basshysy atap ótkendeı, qazaqstandyq qutqarýshylardyń basty mindeti – úıindiler astynda zardap shekkenderdi izdeý jáne basqa da avarııalyq-qutqarý jumystaryn júrgizý.
«Sizderdi baýyrlas halyqqa barynsha kómek kórsetýge attandyramyz, qaýipsizdik erejelerin qatań saqtaýdy suraımyn, eń bastysy, ózderińizge saq bolyńyzdar. Aq jol, saparlaryń oń bolsyn jáne aman-esen oralyńdar!» dedi Aqmola oblysy TJD bastyǵy Nurlan Atyǵaev.
Basqa óńirlerden kelgen áriptesterimen birge jer silkinisteriniń saldaryn joıýǵa kómektesý úshin Qaraǵandy oblysy TJD qutqarýshylar toby da Túrkııa aýmaǵyna jol tartty.
Qaraǵandy komandasynyń quramynda 15 adam bar. Olar – TJD qutqarýshylary, onyń ishinde kınologııalyq esep, sondaı-aq apattar medısınasy ortalyǵynyń dárigeri men feldsheri de bar. Komanda avtonomdy jumysty eskere otyryp, avarııalyq-qutqarý quralymen, medısınalyq múlikpen, baılanys jáne tirshilikti qamtamasyz etý quraldarymen jasaqtalǵan.
Qaraǵandy oblysy TJD basshysy Murat Qatpanov qutqarýshylardy jolǵa shyǵaryp, óziniń qyzmettik boryshyn abyroımen atqarýǵa shaqyrdy.
Túrkııa men Sırııadaǵy jer silkinisi zamanymyzdyń eń qasiretti apattarynyń qataryna enetini anyq. Tabıǵat óte qatal, eshkimdi de aıamaıdy. Zilzaladan zardap shekkenderge otandastarymyz, qarakóz qandastarymyz birinshi kúnnen janushyryp, qoldan kelgen qamqorlyǵyn berip keledi. Biri qarajat jınap, kerekti dúnıeni satyp alyp attandyryp jatsa, biri kıiz úı qamdap, keler kúnniń qajetin de jetkizip berý úshin jantalasýda. Máselen, belgili ánshi Dımash Qudaıbergen óziniń Instagram paraqshasynda Stranger álemdik týry aıasynda konsertterinen túsken qarajattyń bir bóligin Túrkııa men Sırııadaǵy jer silkinisi saldarynan zardap shekkenderge kómek retinde beretinin habarlady. Al qoǵam belsendisi Arman Shoraev pen jýrnalıst Nurbek Bekbaý jurttan jylý jınap, zilzaladan japa shekken Túrkııaǵa kómek retinde kıiz úı jiberdi. Birer kúnde olardyń shotynda qazaqstandyqtardan 20 mıllıon teńgeden asa qarjy túsken.