Mádenıet jáne sport mınıstri Ashat Oralov jaqynda Indonezııanyń bas shahary – Jakartada ótken nysana kózdeý sportynan Álem kýboginde top jarǵan qazaqstandyq sportshylardy marapattady, dep habarlaıdy Egemen.kz.
Mınıstr qazaqstandyq mergenderdiń sońǵy jetistikterin atap ótip, jattyqtyrýshylar shtabyna alǵysyn bildirdi. Sondaı-aq sportshylardyń Parıjdegi Olımpııa oıyndarynda laıyqty óner kórsetetinine senim bildirdi.
«Sportshylarymyzdy jáne barsha qazaqstandyqtardy osy tarıhı jeńispen quttyqtaımyn. Elimiz alǵash ret osyndaı bedeldi jarysta jalpykomandalyq esepte kóshbasshy boldy. Jas tolqyn sportshylarymyz Olımpıada chempıondarymen teń dárejede óner kórsetip, jarqyn jeńiske qol jetkizdi. Osy rette quramanyń jattyqtyrýshylary men ózge de mamandardyń jumysyn erekshe atap ótkim keledi. Olardyń tynymsyz eńbeginsiz aıtýly nátıjege qol jetkizý múmkin emes edi. Sportshylarymyzdyń oq atýdan ǵana emes, stendtik atýdan da sońǵy jetistikteri ulttyq quramanyń aldaǵy Parıj Olımpıadasynda jaqsy nátıje kórsetetinine zor senim uıalatady», dedi mınıstr.
Álem kýboginde Qazaqstan atynan 15 sportshy (9 jigit jáne 6 qyz) óner kórsetti. Sport sheberleri men halyqaralyq dárejedegi sport sheberlerinen quralǵan bizdiń komanda úsh altyn, bes kúmis jáne úsh qola júldemen jalpykomandalyq esepte birinshi oryndy ıelendi.
Altyn medal ıegerleri:
Nıkıta Chırıýkın – myltyqtan 25 metrden jyldamdyqqa atý;
Arına Altýhova – myltyqtan úsh pozısııadan atý (50 m);
Aleksandra Le, Elızabet Bezrýkova jáne Anastasııa Grıgorevadan quralǵan áıelder komandasy – pnevmatıkalyq myltyqtan 10 metrden atý.
Kúmis medal alǵandar:
Konstantın Malınovskıı – pnevmatıkalyq myltyqtan 10 metrden atý;
Nıkıta Shahtorın, Konstantın Malınovskıı jáne Islam Sátbaev –pnevmatıkalyq myltyqtan 10 metrden atý;
Nıkıta Chırıýkın, Valerıı Rahımjan jáne Alekseı Lotarev – pnevmatıkalyq myltyqpen 10 metrden atý;
Konstantın Malınovskıı, Matveı Tımofeev, Islam Sátbaev – myltyqpen úsh pozısııadan atý (50 m);
Arına Altýhova, Aleksandra Le, Elızaveta Bezrýkova - myltyqtan úsh pozısııadan atý (50 m);
Qola júldegerler:
Irına Iýnýsmetova jáne Valerıı Rahımjan – PP-mıks;
Irına Iýnýsmetova, Olga Aksenova jáne Sáýle Álimbek – 25 metrden myltyq atý;
Elızaveta Bezrýkova jáne Islam Sátbaev – VP-mıks.
Jakartada ótken Álem kýbogi sportshylarǵa álemdik reıtıngtegi pozısııalaryn jaqsartýǵa jáne Olımpıadaǵa lısenzııa alý úshin talasqa túsýge múmkindik beretinin aıta ketken jón.