Áleýmettik jeliniń áleýetin paıdalanyp, zamanaýı medıa minberdi rýhanı alańǵa aınaldyrýǵa ábden bolady. Jeli ishinde «ómir súretin» jetkinshekterge ulttyń uly tulǵalary týraly tanymdyq habar usynyp, poezııa baıqaýyn, án-kúı saıystaryn ótkizýge bastamashy bolǵan Beıbit Bóri esimdi azamat Amerıkada turady.
Beıbit – muhıttyń arǵy betinde aýyr júk kóligin júrgizip júrgen qarapaıym qazaq balasy. Aqyn-jazýshylardyń shyǵarmashylyǵyn taldaǵanda kánigi mamandardan qalys qalmaıdy. Qazaq aqyndarynyń jyrlaryn jatqa oqıtyny taǵy bar. Beıbit pen onyń komandasy qolǵa alǵan jobany Tik Tok jelisinde kezdeısoq kórip, aıryqsha qýandyq. Myńdaǵan oqyrmany bar aýdıtorııanyń tikeleı efıri ár senbiniń keshinde qyza túsedi. Ár apta belgili bir tulǵaǵa arnalyp, túrli jastaǵy kórermender qazaq aqyndarynyń shyǵarmalaryn jatqa oqýdan, sózine jazylǵan ánderdi oryndaýdan, sondaı-aq olarǵa arnaǵan óleńderin oqýdan synǵa túsedi.
– Tik Tok jelisinde otyrǵan mıllıondaǵan oqyrman óz ýaqytyn mán-maǵynasyz vıdeolardy kórýmen ótkizip jatqanyna kóńilim qulazıtyn. Bir kúni nege osy múmkindikti paıdalanyp ádebıetimizdiń kórnekti tulǵalaryn, olardyń shyǵarmalaryn jas urpaqqa keńinen tanystyrýǵa kúsh salmasqa degen oıǵa keldim. Taqyryptyq baıqaý uıymdastyrý ıdeıasy meniki bolǵanymen, qazir biz úlken komandaǵa aınaldyq. Aınagúl Kaskına, Dilmurat Týlebaev, Aǵjan Maratqyzy, Danagúl Artyqbaeva, Elvıra Dmıtrıevna, Zulqarnaı Aıýpov esimdi ónerge jaqyn azamattar kúsh biriktirip oqyrmandarymyzǵa jaqsy kontent usynýǵa kúsh salyp júrmiz. Ádebı sarapshylarmen de keńesip otyramyz. Sáken Seıfýllın murajaıynyń ǵylymı qyzmetkeri Qabıden Qýanyshbaı bizge talapkerlerdiń ónerin baǵalaýda qolǵabys etedi. Jyr estafetasy keıde 3-4 saǵatqa deıin sozylady. Táýelsiz qazylar alqasy jeńimpazdardy kópshiliktiń kóz aldynda anyqtaıdy. Qatysýshylardy yntalandyrý maqsatynda demeýshiler usynǵan qarjylaı syılyq úlestiriledi. Ár baıqaý aldynda ózimizge de tereń izdenister jasaýǵa týra keledi, keıipkerlerdiń shyǵarmalaryn zertteımiz, ásirese tarıhı tulǵalardyń ómirine qatysty tyń derekterdi qamtýǵa tyrysamyz. Sondaı-aq murajaılar men uly adamdardyń úılerinen reportaj usynamyz, óıtkeni ol jerlerge barýǵa árkimniń múmkindigi bola bermeıdi. Ujym bir jyldyq jospardy bekitti, bıyl qazaqtyń uly tulǵalaryna arnalǵan 48 habar ótkizý oıymyzda, – deıdi Beıbit Bóri.
Atalǵan jobanyń artyqshylyǵy – álemniń kez kelgen núktesinen kez kelgen adam onlaın baıqaýǵa qatysyp baq synaı alatyndyǵy.
О́rimdeı órenderdiń óleń oqýǵa yntasy aýǵany qýantady, – degen komanda múshesi Aınagúl Kaskınanyń aıtýynsha, Abaıdyń shyǵarmashylyǵyna arnalǵan aptalyqta 71 jastaǵy Aqtóbelik Meıramgúl apa jeńimpaz bolsa, Y.Altynsarınge arnalǵan baıqaýda 3 jastaǵy Raıana kópshiliktiń yqylasyna bólengen. Al M.Jumabaev shyǵarmashylyǵyna arnalǵan jobada Jetisýlyq oqýshy Nuraı jeńiske jetse, M.Maqataev óleńderine arnalǵan jyr dodasynda astanalyq Murat esimdi taksı júrgizýshisi «Gran-prı» nomınasııasynyń ıegeri atanǵan.