Elimizde tuńǵysh ret uıymdastyrylǵan jeńil atletıkadan jabyq keshendegi H Azııa chempıonaty óz máresine jetti. Elordadaǵy «Qazaqstan» jeńil atletıkalyq sport kesheninde ótken sary qurlyq dodasynda Azııanyń 31 elinen kelgen eń tańdaýly atletter baq synady. Olardyń qatarynda jabyq keshendegi álem chempıonatynyń jeńimpazy men júldegerleri, Azııa oıyndarynyń jáne Azııa birinshiliginiń chempıondary, sonymen qatar halyqaralyq iri deńgeıdegi túrli jarystyń jeńimpazdary da bar.
Jarystyń alǵashqy kúninde «Qazaqstan» sport kesheninen jınalǵan jankúıerler erler arasyndaǵy ıadro laqtyrý, úsh qarǵyp sekirý, áıelderdiń 60 metrge, 3 myń metrge jáne bessaıys jarysyndaǵy ónerlerin tamashalady. Týrnırdiń keshki sessııasyndaǵy fınaldyq saıystarda Qazaqstan quramasynyń qorjynyna birinshi bolyp altyn júldeni áıelder arasynda 3 myń metrge júgirýde Karolın Chepkoech Kıpkırýı saldy. Atalǵan qashyqtyqty ol 9:01.98 sekýnd ishinde júgirip ótip, kórermenderdiń ystyq yqylasyna bólendi. О́kinishke qaraı, 2022 jylǵy álem chempıony Nora Djerýto úzdikter qatarynan kórine almady. Ekinshi oryndy 9:03.43 ýaqyt kórsetkishimen qytaılyq Ýga He ıelense, qola júlde 2018 jylǵy jasóspirimder arasyndaǵy Azııa chempıony japonııalyq Iýma Iamamotoǵa (9:09.29) buıyrdy.
60 metrge júgirý saıysynda Qazaqstan jankúıerleri Olga Safronovadan altyn júlde kútken edi. О́ıtkeni Qaraǵandy qalasynyń týmasy dál qazirgi ýaqytta Qazaqstannyń ǵana emes, álemniń kóshbasshy sportshysy sanalady. Biraq jerlesimizdiń fınaldyq saıysta baby kelispedi. 2017 jylǵy Azııa chempıony, 2014 jylǵy Azııa oıyndarynyń jeńimpazy Olga Safronova Astanadaǵy sary qurlyq dodasynda ekinshi nátıje kórsetti – 7.32. Asa tartysty ótken jarystyń bas júldesin ırandyq Farzane Fasıhı 7.28 sekýnd nátıjesimen jeńip alsa, ındonezııalyq Valentın Vaneza 3-orynnan (7.37 sekýnd) kórindi.
Bessaıysta ózbekstandyq Ekaterına Voronınanyń (862 upaı) baǵy jansa, erler arasyndaǵy ıadro laqtyrýda úndistandyq Tajenderpal Saıd Týr (19.49 metr) úzdik shyqty. Erler arasynda 400 metrge júgirýde Qazaqstan quramasynyń kóshbasshysy Mıhaıl Lıtvın Qatar sportshysyn alǵa jiberip, kúmisti qanaǵat tutty. Jerlesimiz irikteý saıysynda 46.97 sekýnd nátıje kórsetse, fınalda jyldamdyǵyn arttyrǵanymen (46.39) altyn júlde buıyrmady. Bul synda Ammar Ismaıl Iаhıa (46.25) birinshi, Tıanrýı Fan (47.30) úshinshi orynnan kórindi.
Ekinshi jarys kúninde áıelderdiń ıadro laqtyrý, úsh qarǵyp sekirý, syryqpen sekirý jáne erler men áıelderdiń 60, 800 (tek áıelder) jáne 1500 metrge júgirý jarystaryn tamashaladyq. Aldymen jarys jolyna ıadro laqtyrýshy áıelder shyqty. О́kinishke qaraı, bul jarysta Qazaqstan sportshylary júldeli oryndardan kórine almady. Alǵashqy eki oryndy koreıalyq sportshylar ózara bólisip alsa (Chon Iý Son (16,98 metr), Lı Sý Chjon (16.45), qola júlde Islam yntymaqtastyq oıyndarynyń jeńimpazy ındonezııalyq Ekı Febrı Ekavatıge buıyrdy.
Syryqpen sekirý saıysynda da jerlesterimiz óz jankúıerlerin qýanta almady. Bul synda Maıý Nasý (Japonııa, 4.00 metr), Pavıtra Vengatesh (Úndistan, 4.00) jáne Rozı Mına Polradj (Úndistan, 3,90) sportshylary jeńimpaz atandy. Al uzyndyqqa sekirýde Qazaqstan sportshylary aldyna jan salmady. Máselen, byltyrǵy jabyq keshendegi álem chempıonatynyń qola, 2019 jylǵy Azııa birinshiliginiń kúmis júldegeri Nadejda Dýbovıskaıa altynnan alqa taqsa, ekinshi jáne úshinshi oryndardy da jerlesterimiz jeńip aldy. Krıstına Ovchınnıkova – ekinshi, Elızaveta Matveeva úshinshi oryndy qanaǵat tutty. N.Dýbovıskaıa fınalda 1.89 m bıiktikti baǵyndyrdy. Bir qyzyǵy, mundaı jaıt sary qurlyq dodasynda alǵash ret tirkelgenin aıta ketken jón.
1500 metrge áıelder arasyndaǵy júgirýde 18 jastaǵy otandasymyz Aqbaıan Nurmamet erekshe ónerimen kózge tústi. Azııanyń úzdikterimen ıyq tirestirip óner kórsetken jerlesimiz qola júlde jeńip aldy. Azııa oıyndarynyń qola júldegeri 26 jastaǵy vetnamdyq Ngýen Thı Oan máre syzyǵyn birinshi kesse, kúmis júlde japonııalyq Iýme Gotonyń enshisinde ketti. Erler saıysynda japonııalyq Kadzýto Iızavaǵa teń keler eshkim tabylmady.
Áıelder arasyndaǵy 400 metrde jabyq keshendegi 2018 jylǵy Azııa birinshiliginde kúmispen kúptelgen jerlesimiz Elına Mıhına Astanada altynǵa qol jetkizdi. Ol bul qashyqtyqty 54.07 sekýndta baǵyndyrdy. Keıingi oryndarǵa Tı Hýen Ngýen (Vetnam, 54,68), Srı Maııa Sarı (Indonezııa, 54,88) jaıǵasty.
Jarystyń sońǵy kúnindegi estafetada (4h400 m) Qazaqstannyń qos quramasy da jeńimpaz atandy. Quramynda Adelına Zems, Aleksandra Zalıýbovskaıa, Krıstına Kondrasheva men Elına Mıhına bar áıelder quramy men Andreı Sokolov, Elnor Mýhıtdınov, Vıacheslav Zems pen Mıhaıl Lıtvınnen jasaqtalǵan erler quramasy altyn aldy. Erler quramasynyń 3:09.15 sekýnd nátıjesi jańa el rekordy ekenin aıta keteıik. Sondaı-aq Shedrak Kımýtaı Koech 3000 metrge júgirýde 7:59.84 nátıjesimen el qorjynyna qola júlde saldy. Al kúnniń núktesin Davıd Efremov jaqsy qoıdy. Ol 60 metrge kedergiler arqyly júgirýde jabyq keshendegi Azııa chempıonatynyń jeńis tuǵyrynan kórindi. Ýaqyt kórsetkishi – 7.65 sekýnd.
Osylaısha, úsh kúnge jalǵasqan jeńil atletıkadan jabyq keshendegi H Azııa chempıonaty óz máresine jetti. Jalpykomandalyq esepte 15 medal (6 altyn, 5 kúmis pen 4 qola) jeńip alǵan Japonııa quramasy bas júldeni jeńip salsa, Qazaqstan quramasy 6 altyn, 3 kúmis pen 3 qolamen ekinshi orynnan kórindi. Al Qatar atletteri 8 júldemen (2 altyn, 4 kúmis, 2 qola) úzdik úshtikti túıindedi.