2023 jyly 13 aqpanda Qazaqstanda geologııalyq barlaý negizin qalaýshylardyń biri, birqatar munaı jáne gaz ken ornyn alǵash ashqan Qazaqstan Respýblıkasy mıneraldy resýrstar akademııasynyń múshesi Oral Aqsholaqov dúnıeden ozdy.
Oral Aqsholaquly Aqsholaqov 1936 jyly 16 maýsymda Gýrev qalasynda eldegi alǵashqy munaı qubyry qurylysshysynyń otbasynda dúnıege keldi. Zamanyna saı oqyp-jetilip, bar ǵumyryn jer qoınaýyn zertteýge arnady.
Oral Aqsholaquly 170-ten astam ǵylymı maqala jarııalady. Ol asa mańyzdy – «Qazaqstan Respýblıkasynyń kómirsýtek áleýetiniń ǵylymı negizdemesi» atty zertteý eńbegi úshin 2015 jyly ózge avtorlarmen birge Memlekettik syılyqqa ıe boldy. Atalǵan irgeli eńbektiń arqasynda elimizdegi kómirsýtek qory 2012 jylǵy derektermen salystyrǵanda úsh ese ósti.
Sonymen qatar Oral Aqsholaquly iri munaı kompanııalarymen birlesip, saladaǵy basty baǵdar bolǵan Qazaqstanda 2040 jylǵa deıin munaı óndirýdiń tolyq boljamyn jasady. Ǵalym jer qoınaýyn paıdalaný salasyndaǵy kóptegen zańdy ázirleýge de eleýli úles qosty.
Búginde elimizdiń túkpir-túkpirinde Oral Aqsholaqovtyń izin jalǵaýshy shákirtteri, munaıshy-geolog mamandar tabysty eńbek etip júr. Ol ustaz retinde shákirtteriniń kásibı turǵyda ǵana emes, jeke tulǵa retinde qalyptasýyna da septesti.
Oral Aqsholaqulynyń uzaq ári jemisti eńbek jolynda birge qyzmet etken áriptesteri ony eńbekqor, ashyq minezdi, aqjarqyn, óz eliniń naǵyz patrıoty dep sıpattaıdy. Munaı-gaz salasynyń maqtanyshy bolǵan ǵalym, geolog, qaıratker tulǵa, maıtalman mamannyń eńbek joly – dara da dańqty jol.
«QazMunaıGaz» UK AQ ujymy elimizdiń munaı-gaz salasynyń ardaqty ardageri Oral Aqsholaqulynyń ómirden ótýine baılanysty onyń otbasy men jaqyndarynyń qaıǵylaryna ortaqtasyp kóńil aıtady. Marqumnyń jany jánnatta bolyp, nury peıishte shalqysyn.
«QazMunaıGaz» UK AQ ujymy