Jetisýda da qar barysynyń izi bar. Qyzyl kitapqa engen qyraǵy janýardy mamandar qyzǵyshtaı qorǵaıdy. Anda-sanda kózge túsetin túz taǵysynyń taǵdyry – búginde adamnyń qolynda. Osy maqsatta «Altynemel» tabıǵı saıabaǵynyń mamandary qar barysy mekendeıtin aýmaqty kartaǵa túsirdi.
Saıabaq mamandary ańdarǵa arnaıy GPS ornatylǵan qarǵybaý taqqan. Jobany «Altynemel» tabıǵı saıabaǵynyń qyzmetkerleri men zoologııa ınstıtýtynyń ǵalymdary iske asyrdy.
Qar barysyna qarǵybaý taqqannyń biri – Nurlan Moldahmetov. 20 jyldyq tájirbıesi bar bilikti maman ǵalymdarmen birlese erekshe jobany júzege asyrdy. Jazyqqa túsken ańdy uıyqtatqan soń ol teńbilin sanap, at qoıyp, qujat boıynsha jumysyn júrgizgen.
«Qar barysynyń jasyn anyqtadyq. Shamamen ol – 3 jasar. Bıiktigi men aıaqtary, quıryǵy, tisiniń jýandyǵyna deıin eseptep, ólshedik. Sodan onyń oıanatyn ýaqyty bolǵan kezde qaıtadan doza salyp, ınemen «Altynemel» ulttyq tabıǵı saıabaǵynyń aýmaǵyna jiberdik. 15 mınýttan keıin turyp, jan-jaǵyna qarap, taýǵa qaraı ketti», deıdi «Altynemel» memlekettik ulttyq tabıǵı saıabaǵy jedel top basshysy N.Moldahmetov.
GPS qarǵybaý eki taýtan jáne bir atalyq barysqa taǵyldy. Mamandar qurylǵy kómegimen ańdardyń kúnine qansha shaqyrym júretinin eseptegen. Ári mıgrasııasy men meken etetin aýmaǵyn anyqtap, kartaǵa túsirgen. Joba jer betinen joıylýǵa shaq qalǵan jyrtqysh jaıly tolqyqqandy zertteý júrgizýge múmkindik beredi.
«Altynemel» memlekettik ulttyq tabıǵı saıabaǵy ǵylym bóliminiń basshysy Marǵulan Musabekovtiń aıtýynsha, úsh qar barysy «Altynemel» ulttyq saıabaǵy aýmaǵynan shyqpaǵan. Qazirgi tańda qystap jatqany – Júzasý shatqaly. Bul – taýeshkiler óretin jer. Qar barysy bir kúnde 18-21 shaqyrymdy sharlap shyǵady. Onyń azyǵy da – osy jolda.
Jetisý oblysy