Búginde elimizde elektr qýatynyń tapshylyǵy bilinbeıdi. Sonda jel elektr stansasy nesimen qundy degen saýal óz-ózinen týyndaıdy emes pe? Bul taraptaǵy tamasha tabys – tabıǵı qýat kózin paıdalaný. Osy rette Jetisýda qýaty 50 MVt «Abaı-2» jel elektr stansasy iske qosyldy.
Sarqan aýdanynda ornalasqan stansada elektr qýatyn óndiretin qondyrǵylar jumys istep tur. Oblys ákimi baspasóz qyzmetiniń málimetine súıensek, osy iri ınvestısııalyq jobaǵa 19 mlrd teńgeden asa jeke qarjy ınvestısııasy tartylǵan.
Bıyl oblysta jıyntyq qýaty 23,5 MVt bolatyn taǵy 3 GES paıdalanýǵa beriledi. Qazirgi kezde óńirde jańartylǵan energııa kózderiniń 14 nysany bar, olardyń jalpy qýaty – 160 MVt.
Lepsi eldi mekenindegi ıgi jumys 2019 jyly bastalǵan. Kezeń-kezeńimen júrgizilgen qurylys jumystary kóz súıindiredi. Ásirese nysannyń ornalasatyn jerine erekshe nazar aýdaryldy. Jazyq alqap – jeldiń jyldyq ortasha jyldamdyǵy úshin taptyrmas jer, sondyqtan onda jyl boıy elektr energııasyn óndirýge bolady. Nysannyń qurylys-montajdaý jumystary 2022 jyldyń qarasha aıynda tolyq aıaqtalǵan. Sol kezden bergi JES-te óndirilgen elektr qýaty 23,767 myń KVt/saǵatqa jetti.
Jalpy, «Eneverse Kunkuat» JShS iske asyrǵan joba aıasynda 16 jel qondyrǵysy ornatylǵan. Jel machtynyń bıiktigi – 100 metr, qalaqshasynyń kólemi – 70 metr. Árbir qurylǵy shamamen 3,2 MVt elektr energııasyn óndire alady. Jalpy qýaty – 50 MVt.
Atap ótsek, Sarqan aýdanynda «jasyl» energetıkany damytý baǵytynda aýqymdy jumystar júrgizilip jatyr. Aýdanda iske qosý josparlanǵan 5 sý elektr stansasynyń búgingi tańda úsheýi tabysty jumys istep tur. Qalǵan ekeýiniń qurylysy bıyl aıaqtalyp, iske qosylady. Atap aıtqanda, «Baskan Power» JShS-nyń jalpy qýaty 14,9 Mvt bolatyn, quny 11,7 mlrd teńgelik, 24 jumys orny qurylatyn Joǵarǵy Basqan GES-2 jáne 3 jobasy. Oǵan qosa Kerbulaq aýdanynda qýaty 8,6 MVt, quny 6,3 teńgelik Kóktal GES-1 jobasy da bar.
Oblystyq energetıka jáne TÚKSh basqarmasynyń málimetine qaraǵanda, 2021-2025 jyldar aralyǵynda Jetisý oblysynda jalpy qýattylyǵy 236,7MVt bolatyn 13 jańartylǵan energııa kózi nysanyn iske qosý josparlanǵan. (GES – 10, JES – 2, KES – 1). Sonyń úsheýi paıdalanýǵa berilse, taǵy úsheýi bıyl iske qosylmaq. Jalpy qýaty 132,5 MVt qalǵan 7 nysan 2025 jylǵa deıin el ıgiligine beriledi.
Aıta keteıik, Jetisýdyń ózinde óndiriletin elektr energııasynyń kólemi 479,2 mln kVt/saǵatty qurasa, ondaǵy jańartylǵan elektr energııasy kózderiniń úlesi 340,6 mln kVt/saǵat bolyp otyr. Alǵa qoıǵan josparlar óz nátıjesin berse, jańa jel elektr stansalary óńirdegi elektr qýatynyń tapshylyǵyn azaıtýǵa kómektesedi.
Jetisý oblysy