Ortalyq saılaý komıssııasynyń kezekti otyrysynda Parlament Májilisi depýtattarynyń kezekten tys saılaýyna «Aq jol» demokratııalyq partııasy qoǵamdyq birlestiginiń partııalyq tizimin tirkeý týraly» másele qaraldy.
Jıynǵa «Aq jol» demokratııalyq partııasy qoǵamdyq birlestiginiń tóraǵasy Azat Perýashev, oblystardyń, Astana, Almaty jáne Shymkent qalalarynyń aýmaqtyq saılaý komıssııalary beınekonferensııa rejiminde qosyldy jáne buqaralyq aqparat quraldarynyń ókilderi qatysty.
Ortalyq saılaý komıssııasynyń tóraǵasy Nurlan Ábdirov elimizde tirkelgen 7 saıası partııanyń barlyǵy partııalyq tizimder boıynsha Parlament Májilisi depýtattarynyń saılaýyna qatysýǵa jiberilgenin atap ótti. Sondaı-aq ol 6 aqpanda OSK-ǵa Parlament Májilisi depýtattaryn saılaýǵa partııalyq tizimdi usyný týraly «Aq jol» demokratııalyq partııasynyń qujattary tapsyrylǵanyn eske saldy. Ortalyq saılaý komıssııasy saılaý zańnamasyna sáıkes kandıdattardyń Konstıtýsııa jáne Saılaý týraly Konstıtýsııalyq zańmen qoıylatyn talaptarǵa sáıkestigin ańyqtaý boıynsha tıisti rásimder júrgizdi.
Ortalyq saılaý komıssııasynyń múshesi Asylbek Smaǵulov «Qazaqstan Respýblıkasyndaǵy saılaý týraly» Konstıtýsııalyq zańnyń 89-babyna sáıkes tirkeýge bir saıası partııadan bir ǵana tizim jiberiletinin, oǵan saıası partııalar arasynda bólinetin depýtattyq mandattardyń belgilengen sanynyń 30 paıyzdan aspaıtyn adamdar sany engizilgenin habarlady. Partııalyq tizimde áıelder, jastar jáne múgedektigi bar adamdar sany jıyntyq boıynsha oǵan engizilgen adamdardyń jalpy sanynyń keminde 30 paıyzyn quraýǵa tıis.
Belgili bolǵandaı, «Aq jol» demokratııalyq partııasy 54 adamnan turatyn partııalyq tizimdi usynǵan. Tizimdegi 18 kandıdat áıelder, jastar jáne múgedektigi bar adamdar sanatqa jatady, ıaǵnı talapqa sáıkes 33,3 paıyzdy quraıdy. Partııalyq tizimge engizilgen barlyq adam Konstıtýsııa men saılaý týraly Konstıtýsııalyq zańnyń talaptaryna sáıkes keledi.
Asylbek Smaǵulov partııalyq tizimderdi usynǵan saıası partııalar partııalyq tizimge engizilgen árbir adam úshin zańnamada belgilengen eń tómengi jalaqynyń on bes eselengen mólsherinde Ortalyq saılaý komıssııasynyń shotyna saılaý jarnasyn engizetinin habarlady. Parlament Májilisi depýtattarynyń aldyńǵy saılaýynda daýys berýge qatysqan saılaýshylardyń 5 jáne odan da kóp paıyzyn alǵan saıası partııalar saılaý jarnasyn tólemeıdi. 2021 jylǵy qańtarda ótken Parlament Májilisi depýtattarynyń saılaýynda «Aq jol» demokratııalyq partııasy saılaýshylardyń 10,95 paıyzyn jınady. Osyǵan baılanysty atalǵan partııa saılaý jarnasyn tóleýden bosatylady.
Komıssııa músheleri sáıkestikti anyqtaý jáne tirkeý týraly tıisti hattamalarǵa qol qoıǵannan keıin «2023 jylǵy 19 naýryzǵa taǵaıyndalǵan Parlament Májilisi depýtattarynyń kezekten tys saılaýynda «Aq jol» demokratııalyq partııasy qoǵamdyq birlestiginiń partııalyq tizimin tirkeý týraly» qaýly qabyldady. Tirkelgen kandıdattar tıisti kýálikterin aldy.