Ortalyq saılaý komıssııasy saıası partııalardyń tizimin tirkeýdi jalǵastyryp jatyr. Komıssııa músheleri Jalpyulttyq sosıal-demokratııalyq partııasynyń Májilis depýtattyǵyna úmitkerleriniń tizimin qabyldap, talapqa saı keletinin málimdedi.
Májilis saılaýyna Jalpyulttyq sosıal-demokratııalyq partııasy 19 kandıdat usyndy. Onyń 31,6 paıyzyn áıelder, jastar jáne múgedektigi bar adamdar (6 adam) quraıdy. Osylaısha, partııa zań boıynsha belgilengen kvotany saqtap otyr.
«Ortalyq saılaý komıssııasy memlekettik organdarmen birlesip, tizimge engen kandıdattardyń Konstıtýsııa men «Saılaý týraly» Konstıtýsııalyq zańnyń talaptaryna sáıkestigin tekserdi. Partııalyq tizimde kórsetilgen barlyq adam Konstıtýsııanyń jáne «Saılaý týraly» Konstıtýsııalyq zańnyń talaptaryna tolyqtaı sáıkes keledi», dep málimdedi OSK múshesi Anastasııa Shegorsova.
Sondaı-aq ol atalǵan partııanyń Parlament Májilisi depýtattarynyń 6-shaqyrylymdaǵy saılaýyna qatyspaǵanyn aıtty. Sol úshin JSDP-ǵa jarna tóleý mindetteldi. Aıta keteıik, eń tómengi jalaqynyń 15 eselengen mólsheri 1 050 000 (15h70 000) teńgeni quraıdy.
«JSDP «Saılaý týraly» zańnyń 88-babyna sáıkes partııa tizimin tirkeý úshin OSK shotyna saılaý jarnasyn tóleýi qajet. Jarna somasy eń tómengi jalaqynyń 15 eselengen mólsherin quraıdy. Ol partııalyq tizimge engizilgen árbir adam úshin jeke engizilýge tıis. Qazir JSDP saılaý jarnasyn tolyq kólemde tóledi», dedi Anastasııa Shegorsova.
Jalpyulttyq sosıal-demokratııalyq partııasy ózin oppozısııalyq partııa retinde tanytyp, buǵan deıin ótkizilgen Májilis saılaýyna qatysýdan bas tartqan edi. Dese de, «bul ýaqyt aralyǵynda el nazarynan tys qalyp, tarap ketken joqpyz», deıdi partııa ókilderi.
«Biz osy joly saılaýǵa qatysamyz dep sheshim qabyldadyq. Senimimiz zor. 19 kandıdatymyzdyń barlyǵy depýtat bolýǵa laıyqty. Halyqqa da jaqsy tanys. Osyǵan deıingi saılaýǵa qatyspaǵanymyzdyń birneshe sebebi bar. Biz saılaý zańyna ózgeris engizý qajetin aıtqan edik. Qazirgi majorıtarlyq júıeni engizý, partııalyq tirkeý mólsherlemesin azaıtý, kandıdattar úlesindegi áıelder sanynyń basym bolýy sekildi máseleni aıtyp, kótergen edik. Halyqaralyq uıymnyń múshesimiz, saılaýda bekitilgen 30 paıyzdyq úlesti biz burynnan aıtyp kele jatyrmyz. Aıtqan máselemiz, talabymyz júz paıyz bolmasa da oryndalyp keledi», dedi JSDP tizimi boıynsha depýtattyqqa kandıdat Maqsut Nasıbýlov.