ASTANA. 20 maýsym. Búgin tún ortasy aýa San-Paýlýda Ýrýgvaı jáne Anglııa komandalary bir-birimen ekinshi týrdyń oıynyn ótkizdi. Match 2:1 esebimen Ońtústik Amerıka ókilderiniń paıdasyna sheshildi. Bul týraly egemen.kz habarlady.
Ýrýgvaı – Anglııa 2:1 (1:0).
19 maýsym. San-Paýlý. «Arena Korıntıans» stadıony. 62 575 kórermen. Tóreshi – Karlos Velasko Karbalıý (Ispanııa).
Ýrýgvaı: Fernando Mýslera, Martın Kaseres, Hose Hımenes, Dıego Godın, Alvaro Pereıra, Alvaro Gonsales (Horhe Fýsıle, 78), Egıdıo Arevalo, Nıkolas Lodeıro (Krıstıan Stýanı, 67), Krıstıan Rodrıges, Lýıs Sýares (Sebastıan Koates, 88), Edınson Kavanı.
Anglııa: Djo Hart, Glen Djonson, Gerı Kehıll, Fıl Djagıelka, Leıton Beıns, Stıven Djerrard, Djordan Henderson (Rıkı Lambert, 87), Rahım Sterlıng (Ross Barklı, 64), Ýeın Rýnı, Dennı Ýelbek (Adam Lallana, 7), Danıel Starrıdj.
Goldar: Lýıs Sýares (39, 85), Ýeın Rýnı (75).
Eskertýler: Dıego Godın (9) – Stıven Djerrard (68).
Brazılııadaǵy chempıonat aldynda aǵylshyn jankúıerleriniń ózi eldiń ulttyq komandasynyń dop dodasynda aıtarlyqtaı tabysqa jetetinine onshalyqty senimdi bolǵan joq. Olardyń kópshiligi «Úsh arystan» úshin shırek fınalǵa shyǵý úlken jetistik bolyp tabylatynyn jasyrmaı aıtty. Alaıda, Roı Hodjonstyń shákirtteri endi bul belesti baǵyndyra almaıtyn sııaqty.
Anglııa quramasy qazir jahandyq jarysta eki oıyn oınap úlgerdi. Jáne sonyń ekeýinde de 1:2 degen ortaq eseppen jeńilistiń ashy dámin tatty. Fýtboldyń otanynan kelgen jigitterdiń alǵy kúnge asyqqan armandarynyń alaýyn ózderine tanys Lýıs Sýares esimdi jalǵyz shabýylshy bir demmen óshirip tastady. Kezdesýdiń birinshi taımynda oıynnyń baıaý qarqynmen órbigenine qaramastan, komandalar óz jankúıerlerin birqatar tartysty oqıǵalarymen eliktirip turdy. Osy tustarda qaqpa qulpyn ashýdyń tamasha múmkindikterin Krıstıan Rodrıges, Edınson Kavanı jáne Ýeın Rýnı syndy oıynshylar jiberip aldy. Alaıda, gol bir-aq ret soǵyldy. Ony Lýıs Sýares aǵylshyndar qaqpasyna týra baǵyttady. Ýrýgvaı jankúıerleri osynyń aldynda Kosta-Rıkamen ótken oıynda alańǵa shyqpaǵan tap osy forvardtan úmit kútip otyr edi. Ras, Lýıs oıynnyń basynda óziniń áreketimen erekshelene qoımady, oıyn tizginin de qolǵa sırek aldy. Degenmen, ózine tap kelgen birinshi múmkindikti keremet paıdalanyp, Djo Harrıdi qapyda qaldyrdy.
Ekinshi taım Oskar Tabares shákirtteriniń shabýylymen bastaldy. Biraq aǵylshyndar ýaqyt ozǵan saıyn basymdylyqtaryn arttyra berdi. Nátıjesinde ekinshi taımnyń ortasynan bastap ýrýgvaılyqtar óz alańy mańyna tyqsyrylyp tastaldy. Sonyń pátinde aǵylshyndar esepti de teńestire aldy. Qaptaldan Glen Djonson jetkizgen dopqa Ýeın Rýnı egelik etti. Ol qaqpa aldyndaǵy qarbalas shaqta Fernando Mýslerany qapyda qaldyrdy.
Osydan jigerlengen brıtanııalyqtar budan da ári ketti. Qaýyrt shabýyldar ıiriminde Danıel Starrıdj aıyp alańy syzyǵynan óte qatty urdy. Ýrýgvaı qaqpashysy bul dopty áýpirimmen syrtqa jóneltti. Biraq amerıkalyqtarda osyndaı qysyltaıań kezderi tuıyqtan sańylaý taýyp, shyǵyp ketetin bir adam bar eken. Ol – Lýıs Sýares oıyn bitýge 5 mınýt qalǵanda kezekti qaýiptiń bultyn ózimen birge ilgeri áketip, alǵa tura umtyldy. Bir kezde ol Djo Hartpen birge-bir shyqty da, qaqpashy janynan dopty zý etkizdi. Gol! Sonymen, esep 2:1-ge jetti.
Oıynnyń sońynda ýrýgvaılyqtar ýaqytty sozýǵa tyrysyp baqty. Sol jappaı qorǵanys olar úshin sátti aıaqtaldy. Bul utylys endi kelesi kezeńge óte almaıtyndar sapyna Anglııa komandasynyń da enip ketkenin pash etti.
Damır Qojamqul.
Derekkóz: Chempıonat.Rý.
Foto: Sportbox.ru.