Qurlyqtyq hokkeı lıgasynda (QHL) óner kórsetetin elordanyń «Barysy» kezekti týr oıynyn «Barys Arenada» ótkizip, Sankt-Peterbýrgtiń SKA klýbyna ekinshi ret ese jiberdi.
Bir apta buryn syrt aıdynda Máskeýdiń SSKA komandasyn overtaımda jeńip, qysqa merzimdi úziliske kóterińki kóńil kúımen shyqqan Andreı Skabelka shákirtteri qaıtadan eski ádetine basty. О́z aıdynyndaǵy matchtar serııasyn jalpy lıganyń kóshbasshysy SKA hokkeıshilerimen bastaǵan jerlesterimiz 10 shaıba soǵylǵan matchta 6:4 esebimen jeńilip qaldy.
Asa tartysty ótken kezdesýdi belsendi bastaǵan qonaqtar birinshi kezeńde Iýlıýs Gýdachek qorǵaǵan qaqpadan úsh márte sańylaý taýyp, esepte alǵa uzap ketti. Sondaı-aq SKA oıynshylary ekinshi kezeńde – bir, úshinshi kezeńde eki shaıba soǵyp, match jeńimpazy atandy. Al aıdyn ıeleri sapynan ekinshi kezeńde Aleks Grant (22-mınýt), úshinshi kezeńde – Nıkıta Mıhaılıs (42), Djeremı Brakko (47) jáne Kırıll Savıskıı (54) mergendigimen kózge tústi. Osylaısha, «Barys» SKA klýbynan turaqty chempıonattyń osy maýsymynda ekinshi ret jeńilip otyr. 2022 jyldyń qyrkúıeginde Sankt-Peterbýrgte ótken matchta aıdyn ıeleri 3:1 esebimen jeńiske jetken edi.
«Barys» kelesi oıynyn búgin «Batys» konferensııasynyń týrnır kestesinde 8-orynda turǵan Mınskiniń «Dınamosymen» ótkizedi.