Germanııanyń Insell qalasynda uıymdastyrylǵan konkımen júgirýden jasóspirimder arasyndaǵy álem chempıonaty óz máresine jetti. Álemniń 30-ǵa jýyq memleketinen kelgen 200-den asa sportshy úsh kún boıy júldelerdi sarapqa saldy. Bul synda Qazaqstan quramasynyń 10 sportshysy óner kórsetip, eki medal jeńip aldy.
Inselldegi dúnıejúzilik dodada Qazaqstan erler quramasynan Nuraly Aqjol, Roman Bınozarov, Andreı Semenov, Nıkıta Vajenın, Vadım Iаkýbovskıı, al qyzdardan Alına Daýranova, Darıa Gavrılova, Arına Ilıashenko, Krıstına Shýmekova men Alena Lıfatova muzaıdynǵa shyqty. О́kinishke qaraı 10 sportshymyzdyń ishinen júldegerler qatarynan kóriný tek ulttyq quramanyń kóshbasshysy Alına Daýranovaǵa ǵana buıyrdy. Jasóspirimder arasyndaǵy kezekti álem chempıonatynda jerlesimiz bir kúmis jáne bir qola medal jeńip aldy.
Astanadaǵy Qajymuqan Muńaıtpasov atyndaǵy mektep-ınternat-kolledjinde bilim alatyn Alına keıingi bir-eki jylda óreli ónerimen kózge túsip, jankúıerlerdi qýantyp júr. 19 jastaǵy sportshy byltyr Aýstrııanyń Insbrýk qalasynda jalaýy jelbiregen álem chempıonatynda kúmis pen qola medal oljalaǵan bolsa, bıyl da dál sol bıiginen kórindi. Sondaı-aq ol ótken jyldyń qarasha aıynda Fınlıandııada shymyldyǵy túrilgen Álem kýboginde altyn medaldy moınynda jarqyratty. Odan bólek, A.Daýranova Qazaqstan spartakıadasy men el birinshiliginiń jeńimpazy atanǵan. Sonymen qatar ol ótken aptada ǵana Germanııanyń Insell qalasynda máresine jetken Álem kýbogi kezeńinde de altynnan alqa taqqanyn jankúıerler umyta qoıǵan joq. 1 000 metrge jarysta otandasymyz 1 mınýt 17,98 sekýnd ýaqyt kórsetkishimen máre syzyǵyn birinshi kesti. Nıderland ókili Pen Hersman kúmis medal ıelense, ıtalııalyq Serena Perger qolaǵa qol jetkizgen edi.
Inselldegi álem chempıonatynyń alǵashqy kúninde Alına Daýranova 500 metr qashyqtyqta baq synady. Aýstrııa, Majarstan, Germanııa, Italııa, Ispanııa, Kanada, Qytaı, Koreıa, Nıderland, Norvegııa, Polsha, Portýgalııa, AQSh jáne Japonııadan kelgen barlyǵy 48 sportshy qatysqan dodada máre syzyǵyn úshinshi bolyp kesip, qola júldeger atandy. Otandasymyz bul qashyqtyqty 39.10 sekýndta júgirip ótti.
Bas júlde Álem kýbogi kezeńderinde júldegerler qatarynan kórinip júrgen ıtalııalyq Serena Pergerge (38.61) buıyrsa, Nıderland ókili Endjel Deılman 38.93 ýaqyt kórsetkishimen kúmis medaldy qanaǵat tutty.
Ekinshi jarys kúninde ulttyq qurama kóshbasshysy 1000 metr qashyqtyqta baq synap, bul joly da júldegerler qatarynan kórindi. Alına bir shaqyrymǵa jalǵasqan jarys jolyn 1:17.76 sekýndta júgirip ótip, jeńimpaz atanǵan nıderlandtyq Endjel Deılmannan nebári 1.47 sekýndqa qalyp qoıdy. Sóıtip ol kúmis júldeni moınyna ildi. Bir aıta keterligi, Alına byltyr Aýstrııanyń Insbrýk qalasynda ótken álem chempıonatynda dál osy qashyqtyqta da kúmis medalǵa ıe bolǵan-dy. Al úzdik úshtikti amerıkalyq Greta Maıers túıindedi.
El sportshylary jasóspirimder arasyndaǵy dúnıejúzilik chempıonatta jyl saıyn tuǵyr bıigine kóterilip júrgenin aıta ketken jón. Máselen, byltyr Insbrýkte áıelder quramasy (Alına Daýranova, Inessa Shýmekova, Darıa Gavrılova) komandalyq sprıntte 3-oryn alǵan bolsa, onyń aldynda Ekaterına Aıdova 500 metrge jarysta Máskeýdegi (2010 jyl) álem chempıonatynda jeńimpaz atanǵan bolatyn. Sondaı-aq ol Fınlıandııanyń Seınıaıokı qalasyndaǵy (2011 jyl) dúbirli dodada ekinshi orynǵa taban tiregen edi. Máskeýdegi básekede taǵy bir jerlesimiz Alekseı Bondarchýk 500 metrge jarysta úshinshi nátıje kórsetken.
Al 2009 jyly Zakopane qalasynda ótken álemdik jarysta (Polsha) Roman Krech 1500 metrde kúmis, 1000 metrde qola medal ıegeri atanǵan. Sondaı-aq 2015 jylǵy álem chempıonatynda taǵy bir otandasymyz Stanıslav Palkın de myń metrge júgirýde qola medal oljalaǵan-dy.