Bas júlde – «Realda»

«Real» Afrıka qurlyǵynda ótken klýbtar arasyndaǵy álem chempıonatynyń da, fınaldyń da sózsiz favorıti edi. Kópshilik ıspanııalyq klýb fınalda byl­tyrǵy «Lıbertadores» kýboginiń jeńimpazy Brazılııanyń «Fla­mengosymen» kezdesedi dep top­shylaǵan edi. Alaıda 2021 jylǵy Azııa Chempıondar lıgasynyń ıegeri Saýd Arabııasynyń «Ál-Hılıal» komandasy jarty­laı fınalda sensasııa jasap, «Lı­bertadoresti» match sońyn­da­ǵy penaltı serııasynda jeńip ketti.

Fınaldyq match Marokko astanasy – Rabatta ornalasqan 55 myń jankúıerdi syıdyra alatyn «Mýlaı Abdýlla» atyndaǵy stadıonda ótti. Matchtyń alǵashqy 10 mınýty saýdııalyqtar úshin sátti bastalǵanymen, kezdesýdiń 13-mınýtynda Vınısıýs Jýnıor Kárim Benzemanyń pasynan keıin gol soǵyp, komandasyn esep­te alǵa shyǵardy. Arada bes mınýt ótkende «Realdyń» ýrýgvaılyq shabýylshysy Fe­derıko Valverde tablodaǵy kór­setkishti 2:0-ge jetkizdi. De­genmen, oıynnyń 26-mınýtynda «Ál-Hılıal» shabýylshysy Marega mer­gendigimen kózge túsip, esep aıyr­­masyn qysqartýǵa múmkindik aldy – 2:1. Fınaldyń birinshi taım­y dál osy eseppen aıaqtaldy.

Eýropa Chempıondar lıga­synyń byltyrǵy jeńimpaz­dary úzilisten keıin de belsen­diligin arttyryp, aınal­dyr­ǵan tórt mınýttyń ishinde qar­sylastarynyń qaqpasyna ja­ýapsyz eki gol soqty. Ekin­shi taımnyń 54-mınýtynda 2022 jylǵy «Altyn dop» ıegeri Kárim Benzema bul joly Vınısıýs Jý­nıordyń asyrǵan pasynan keıin qaqpany dál kózdese, 58-mınýtta Federıko Val­verde dýbldiń avtory atandy. Saýd Arabııasy komandasynyń oıynshylary da qarsylastaryna kýbokti ońaı berip qoıǵysy kelmeı, biraz qarsylasyp baqty. Kezdesýdiń 63-mınýtynda Lýsıano Vetto gol soǵyp, tarazy basyn bir dopqa qysqartqanymen, 69-mınýtta Vınısıýs Jýnıor esepti 5:2-ge jetkizdi. Match aıaqtalǵanǵa deıin Vetto taǵy bir márte mer­gendigimen kózge tússe de, komandasyn jeńilisten qutqaryp qala almady. Osylaısha, 5:3 esebimen jeńiske jetken «Real» óz tarıhynda besinshi márte klýbtar arasyndaǵy álem chempıonatynda top jardy.

Brazılııanyń «Flamengo» men Mysyrdyń «Ál-Ahlı» klýb­tary arasyndaǵy úshinshi oryn úshin báseke «Ibn Batýta» atyndaǵy stadıonda ótti. Bul matchta Ońtústik Amerıkadan kelgen fýtbolshylardyń mereıi ústem boldy – 4:2. Bir qyzyǵy, oıyndaǵy alty goldy úsh fýtbolshy ǵana soqty. Qola júldegerler sapynan Gabrıel Barboza men Pedro dýbl jasasa, «Ál-Ahlı» komandasynan Ahmed Ábdelkader eki márte dáldik tanytty. Sóıtip, «Flamengo» chempıonattyń qola júldegeri atandy.

2000 jyldan beri uıymdasty­rylyp kele jatqan klýbtar ara­syndaǵy álem chempıonatynda Madrıdtiń «Realy» bıyl besinshi márte top jaryp, eń kóp oljaǵa kenelgen komandalardyń kóshin bastap tur. Koroldik klýb bu­ǵan deıin 2014, 2016, 2017 jáne 2018 jyldary jeńis tuǵyrynan kóringen bolatyn. Sonymen qatar «Barselona» úsh márte (2009, 2011, 2015), «Ko­rıntıans» (2000, 2012) pen «Bavarııa» (2013, 2020) eki retten, «Internasonal» (2006), «San-Paýlý» (2005), «Mılan» (2007), «Inter» (2010), «Manchester Iýnaı­ted» (2008), «Lıverpýl» (2019) jáne «Chelsı» (2021) klýbtary bir-bir márteden jeńimpaz atanǵan.