Atyraý oblysynda «Áreket» jobasy aıasynda jalǵyzilikti, kópbalaly jáne múmkindigi shekteýli balalar tárbıelep otyrǵan 100 ana suranysqa ıe kásipterdi úırendi. «Samuryq-Qazyna» kompanııalar tobyna kiretin otandyq kásiporyn 48 mln teńge qarjy bólgen joba ótken jyly qolǵa alynǵan.
Joba aıasynda jumyssyz áıelderge tegin oqytý kýrstary uıymdastyrylyp, keıin shaǵyn kásibin ashýǵa kómek kórsetilgen. Tegin oqytý kýrstaryna Qurmanǵazy, Isataı, Inder, Mahambet, Jylyoı, Maqat jáne Qyzylqoǵa aýdandaryndaǵy shalǵaı aýyldardyń, sondaı-aq Atyraý qalasy men oǵan taıaý ornalasqan Erkinqala, Keńózek, Almaly, Damby, Aqsaı, Qaıyrshaqty eldi mekenderiniń áıelderi tartylǵan.
– Kezinde bizdiń ájelerimiz bireýin arqalap, ekinshisin jetektep, tynbaı eńbek etip, on shaqty balasyn jetkizgenin bilemiz. Al 100 ana kásibin ashyp, ne jumysqa ornalasyp, tabys tapsa, otbasynyń kirisin molaıtýǵa úlesin qosar edi. «Ana bir qolymen besikti, ekinshi qolymen álemdi terbetedi» degendeı, áıelder jumys isteýge de, úı tirligin atqarýǵa da úlgeredi, – deıdi «Embimunaıgaz» AQ bas dırektorynyń orynbasary Rysty Tasmaǵambetova.
Jańa jobaǵa qatysýshylar «Tigin», «Aspazdyq sheberlik», «Kondıterlik is», «Shashtaraz» jáne «Tazalaý qyzmeti» boıynsha teorııalyq bilim alyp, tájirıbeden ótken. Máselen, aspazdar «Aru Plaza», «Star» meıramhanalarynda, kondıterler «Take the Cake Studio» kondıterlik sehynda, tiginshiler «DART LUX» tigin sehynda, shashtarazdar «ADIA» salonynda jáne klınıng qyzmetin úırenýshiler «V pomosh hozıaıke» klınıngtik qyzmet kompanııasynda kásiptiń qyr-syryn meńgergen. Sondaı-aq «Kásipkerlik daǵdylardy oqytý», «Kontent jáne SMM – áleýmettik jelilerdi damytý», «Sheshendik óner, kópshilik aldynda sóıleý daǵdylary» boıynsha kýrstan ótken. Al tálimgerler joba túlekterine eki aı boıy qoldaý kórsetedi.
Tegin kýrsty aıaqtaǵan 100 anaǵa taýar túrindegi granttar berildi. Tiginshi kýrsyn bitirgen – 4, shashtaraz mamandyǵyn alǵan – 5, klınıngtik qyzmetti meńgergen – 3, aspazdyq sheberligin shyńdaǵan 2 ana turaqty jumysqa ornalasqan. Al 20 ana óz kásibin úı jaǵdaıynda ashyp otyr.
– Jubaıym jumystan shyǵyp qalyp, ıpotekamen satyp alǵan baspanamyzdyń bereshegi tym kóbeıip ketken bolatyn. Ákimdik úıimizge qarap, «Bári jaqsy ǵoı» degenge keltirdi. Biraq kúıeýim de, balam da – múmkindigi shekteýli jandar. Qaryzǵa batyp, qatty qınalǵan edik. Taǵdyrdyń synaǵy ǵoı dep tózip júrgende, osy jobanyń bastalǵanyn estidik. О́zim jobaǵa qatystym. Joba bizdiń úmitimizdi oıatyp, eńsemizdi kóterdi, – deıdi Aqbota О́tepbergenova.
Al bes balanyń anasy Aqbota Aldasheva da joba aıasynda shashtaraz kýrsyn bitirgen. Qazir ol sulýlyq salonyna turaqty jumysqa ornalasqan.
– Kásipti meńgerý bir basqa, áleýmettik jelide oqyrman tartýdyń qyr-syryna qanyǵý tipten bólek eken. Tipti tálimgerler adamdarmen jaıly qarym-qatynas ornatý úshin sóılesý mánerin úıretti. Osyndaı qadamdardyń jemisin kóre bastadym. Qazir meniń turaqty klıentterimniń qatary kóbeıip keledi. Kásibime qatysty túrli ıdeıany iske asyryp otyrmyn, – dep jańalyǵymen bólisti A.Aldasheva.
Atyraý oblysy