Talpynǵan jan tabysty

Jatypisher jalqaýǵa búı­regi buryla qoımaıtyn qatal naryq­tyń talaby ánsheıinde Táńir ózi jarylqaıdyny kóp aıtatyn keńqoltyq aýyl adamdaryn da qalyp­qa túsire bastady. Jalǵyz mal súmesimen kún kórý – qıynnyń qıyny. Aýyrdyń ústimen, jeńildiń astymen júrip jan baǵatyn zaman kelmeske ketken. Qazir kóp­shi­lik qoly qımyldasa, aýzy qı­myl­daıtyndy túsinip, tyrbanyp tirshilik ete bas­tady. Bir jaq­sysy, taqa masyldyq meńdep ketpese, alǵa umtylǵandy qos qol­tyǵynan perishtedeı je­beıtin memlekettik qamqorlyq shash­etekten. Aýyl adam­dary da kásip úırenip jatyr. Sharapaty da az emes. Nesibe ózderine ǵana emes, birge qanattasyp jumys isteıtin aýyldas­taryna da buıyratyn túri bar. Kúni keshe jumyssyz adam búgin jumys berýshige aınalǵan.

Shalǵaıdaǵy Jańaqıma aýyly­nyń turǵyny Tilektes Turlybekova bilim oshaǵynda otyz jylǵa jýyq tehnologııa pániniń muǵalimi bolyp eńbek etti. Kúnderdiń bir kú­ninde bıznespen aınalyssam degen úmittiń janyna baıyz tap­tyr­maǵany. Qolǵanaty – qyzy. Seneri de sol. Kóz kórip, qol jat­tyqpaǵan soń, kúmán da az bolmaıdy eken. Áýeli óz isin endi bastaıtyn bolashaq kásipkerlermen birge arnaıy kýrstarda oqydy. Ońy men solyn tarazy basyna tartty. Qolyna qaıtarymsyz grant tıgennen keıin tigin mashınasyn satyp alyp, bólmesin jabdyqtady.

– El ishi bolǵan soń suranys bolady, – deıdi kásipker Tilektes Tur­lybekova, – bizdiń isimizden qulaq­tanǵannan keıin aýyldastar kele bastady. Biz tósek jabdyqtaryn, kórpe, ártúrli ádemi perdeler tige­miz. Quraqkórpe tigip bershi dep óti­nish aıtatyndar bar. Kıim tigýge tapsyrys túse bastady. Eń bastysy, adal jumys isteý ári qyzmettiń qol­­­je­timdiligin de oılaǵanymyz jón.

Jergilikti jurt jaqsy is jaıly birden qulaqtanǵan. Pysyq kelin­shekter bizdiń keıipkerimiz tárizdi óz isin uıymdastyrýǵa beıildi. Osy aýyldyń turǵyny Aıman Súme­novanyń aıtýyna qaraǵanda, tigin­shilikke bel býyp otyrǵan jaıy bar. Alǵashqy tabysty is shaǵyn aýyl­da eki qolyn aldyna syıǵyza al­maı otyrǵan jastarǵa kádimgideı oı salǵan. «Kim bilgen, bulaı da tabys tabýǵa bolady eken ǵoı», dep tańdanysady olar. Aýdanda memlekettik granttyń kóme­gimen 10 adam óz bıznesin dóń­geletip otyr. Olar avtokólik jóndeıtin ortalyq, tigin sehy, jylyjaı ashqan. Tipti aǵylshyn tilin oqytatyn mektep te paıda bolypty. Dátke qýaty, óz kásibińdi ashyp, óz qolyńdy óz aýzyma jetkizemin dep umtylǵandardyń arasynda múm­kindigi shekteýli adamdar da bar.

– Ár jyl saıyn bıznes ashýǵa beriletin grant kólemi ulǵaıyp ke­ledi. Alǵashqy jyldary 15-20 mln teńge kóleminde bolsa, ótken jy­ly 130 mln teńge baǵyttaldy. Bıyl 180 mln teńge berilmek. Jergilikti bıýdjetten qosymsha 100 mln teńge qarastyrylyp otyr, – deıdi ob­lys­tyq Kásipkerlik jáne týrızm basqar­masynyń basshysy Erbol Ospanov.

Shynynda da, óz isin bastaımyn degenderge kóp-kórim kómek. Bir aıta keterligi, bolashaǵy bar bıznes-ıdeıalardyń ishinde eń utymdysy saralanady eken. Tıimdi istiń tigisi qashanda jatyq bolady emes pe?

Aqmola oblysy

Jaqsy aýdany